EeseDharmaSanātana Library
541मण्डल 7 · सूक्त 25
6 shlokआ ते॑ म॒ह इ॑न्द्रो॒त्यु॑ग्र॒ सम॑न्यवो॒ यत्स॒मर॑न्त॒ सेना॑: ।
पता॑ति दि॒द्युन्नर्य॑स्य बा॒ह्वोर्मा ते॒ मनो॑ विष्व॒द्र्य१ग्वि चा॑रीत् ॥१॥
ā te॑ ma॒ha i॑ndro॒tyu॑gra॒ sama॑nyavo॒ yatsa॒mara॑nta॒ senā॑: | patā॑ti di॒dyunnarya॑sya bā॒hvormā te॒ mano॑ viṣva॒drya१gvi cā॑rīt || १ ||
नि दु॒र्ग इ॑न्द्र श्नथिह्य॒मित्रा॑न॒भि ये नो॒ मर्ता॑सो अ॒मन्ति॑ ।
आ॒रे तं शंसं॑ कृणुहि निनि॒त्सोरा नो॑ भर सं॒भर॑णं॒ वसू॑नाम् ॥२॥
ni du॒rga i॑ndra śnathihya॒mitrā॑na॒bhi ye no॒ martā॑so a॒manti॑ | ā॒re taṃ śaṃsaṃ॑ kṛṇuhi nini॒tsorā no॑ bhara saṃ॒bhara॑ṇaṃ॒ vasū॑nām || २ ||
श॒तं ते॑ शिप्रिन्नू॒तय॑: सु॒दासे॑ स॒हस्रं॒ शंसा॑ उ॒त रा॒तिर॑स्तु ।
ज॒हि वध॑र्व॒नुषो॒ मर्त्य॑स्या॒ऽस्मे द्यु॒म्नमधि॒ रत्नं॑ च धेहि ॥३॥
śa॒taṃ te॑ śiprinnū॒taya॑: su॒dāse॑ sa॒hasraṃ॒ śaṃsā॑ u॒ta rā॒tira॑stu | ja॒hi vadha॑rva॒nuṣo॒ martya॑syā॒’sme dyu॒mnamadhi॒ ratnaṃ॑ ca dhehi || ३ ||
त्वाव॑तो॒ ही॑न्द्र॒ क्रत्वे॒ अस्मि॒ त्वाव॑तोऽवि॒तुः शू॑र रा॒तौ ।
विश्वेदहा॑नि तविषीव उग्रँ॒ ओक॑: कृणुष्व हरिवो॒ न म॑र्धीः ॥४॥
tvāva॑to॒ hī॑ndra॒ kratve॒ asmi॒ tvāva॑to’vi॒tuḥ śū॑ra rā॒tau | viśvedahā॑ni taviṣīva ugram॒̐ oka॑: kṛṇuṣva harivo॒ na ma॑rdhīḥ || ४ ||
कुत्सा॑ ए॒ते हर्य॑श्वाय शू॒षमिन्द्रे॒ सहो॑ दे॒वजू॑तमिया॒नाः ।
स॒त्रा कृ॑धि सु॒हना॑ शूर वृ॒त्रा व॒यं तरु॑त्राः सनुयाम॒ वाज॑म् ॥५॥
kutsā॑ e॒te harya॑śvāya śū॒ṣamindre॒ saho॑ de॒vajū॑tamiyā॒nāḥ | sa॒trā kṛ॑dhi su॒hanā॑ śūra vṛ॒trā va॒yaṃ taru॑trāḥ sanuyāma॒ vāja॑m || ५ ||
ए॒वा न॑ इन्द्र॒ वार्य॑स्य पूर्धि॒ प्र ते॑ म॒हीं सु॑म॒तिं वे॑विदाम ।
इषं॑ पिन्व म॒घव॑द्भ्यः सु॒वीरां॑ यू॒यं पा॑त स्व॒स्तिभि॒: सदा॑ नः ॥६॥
e॒vā na॑ indra॒ vārya॑sya pūrdhi॒ pra te॑ ma॒hīṃ su॑ma॒tiṃ ve॑vidāma | iṣaṃ॑ pinva ma॒ghava॑dbhyaḥ su॒vīrāṃ॑ yū॒yaṃ pā॑ta sva॒stibhi॒: sadā॑ naḥ || ६ ||