EeseDharmaSanātana Library
536मण्डल 7 · सूक्त 20
10 shlokउ॒ग्रो ज॑ज्ञे वी॒र्या॑य स्व॒धावा॒ञ्चक्रि॒रपो॒ नर्यो॒ यत्क॑रि॒ष्यन् ।
जग्मि॒र्युवा॑ नृ॒षद॑न॒मवो॑भिस्त्रा॒ता न॒ इन्द्र॒ एन॑सो म॒हश्चि॑त् ॥१॥
u॒gro ja॑jñe vī॒ryā॑ya sva॒dhāvā॒ñcakri॒rapo॒ naryo॒ yatka॑ri॒ṣyan | jagmi॒ryuvā॑ nṛ॒ṣada॑na॒mavo॑bhistrā॒tā na॒ indra॒ ena॑so ma॒haści॑t || १ ||
हन्ता॑ वृ॒त्रमिन्द्र॒: शूशु॑वान॒: प्रावी॒न्नु वी॒रो ज॑रि॒तार॑मू॒ती ।
कर्ता॑ सु॒दासे॒ अह॒ वा उ॑ लो॒कं दाता॒ वसु॒ मुहु॒रा दा॒शुषे॑ भूत् ॥२॥
hantā॑ vṛ॒tramindra॒: śūśu॑vāna॒: prāvī॒nnu vī॒ro ja॑ri॒tāra॑mū॒tī | kartā॑ su॒dāse॒ aha॒ vā u॑ lo॒kaṃ dātā॒ vasu॒ muhu॒rā dā॒śuṣe॑ bhūt || २ ||
यु॒ध्मो अ॑न॒र्वा ख॑ज॒कृत्स॒मद्वा॒ शूर॑: सत्रा॒षाड्ज॒नुषे॒मषा॑ळ्हः ।
व्या॑स॒ इन्द्र॒: पृत॑ना॒: स्वोजा॒ अधा॒ विश्वं॑ शत्रू॒यन्तं॑ जघान ॥३॥
yu॒dhmo a॑na॒rvā kha॑ja॒kṛtsa॒madvā॒ śūra॑: satrā॒ṣāḍja॒nuṣe॒maṣā॑ḷhaḥ | vyā॑sa॒ indra॒: pṛta॑nā॒: svojā॒ adhā॒ viśvaṃ॑ śatrū॒yantaṃ॑ jaghāna || ३ ||
उ॒भे चि॑दिन्द्र॒ रोद॑सी महि॒त्वा ऽऽप॑प्राथ॒ तवि॑षीभिस्तुविष्मः ।
नि वज्र॒मिन्द्रो॒ हरि॑वा॒न्मिमि॑क्ष॒न्त्समन्ध॑सा॒ मदे॑षु॒ वा उ॑वोच ॥४॥
u॒bhe ci॑dindra॒ roda॑sī mahi॒tvā ’’pa॑prātha॒ tavi॑ṣībhistuviṣmaḥ | ni vajra॒mindro॒ hari॑vā॒nmimi॑kṣa॒ntsamandha॑sā॒ made॑ṣu॒ vā u॑voca || ४ ||
वृषा॑ जजान॒ वृष॑णं॒ रणा॑य॒ तमु॑ चि॒न्नारी॒ नर्यं॑ ससूव ।
प्र यः से॑ना॒नीरध॒ नृभ्यो॒ अस्ती॒नः सत्वा॑ ग॒वेष॑ण॒: स धृ॒ष्णुः ॥५॥
vṛṣā॑ jajāna॒ vṛṣa॑ṇaṃ॒ raṇā॑ya॒ tamu॑ ci॒nnārī॒ naryaṃ॑ sasūva | pra yaḥ se॑nā॒nīradha॒ nṛbhyo॒ astī॒naḥ satvā॑ ga॒veṣa॑ṇa॒: sa dhṛ॒ṣṇuḥ || ५ ||
नू चि॒त्स भ्रे॑षते॒ जनो॒ न रे॑ष॒न्मनो॒ यो अ॑स्य घो॒रमा॒विवा॑सात् ।
य॒ज्ञैर्य इन्द्रे॒ दध॑ते॒ दुवां॑सि॒ क्षय॒त्स रा॒य ऋ॑त॒पा ऋ॑ते॒जाः ॥६॥
nū ci॒tsa bhre॑ṣate॒ jano॒ na re॑ṣa॒nmano॒ yo a॑sya gho॒ramā॒vivā॑sāt | ya॒jñairya indre॒ dadha॑te॒ duvāṃ॑si॒ kṣaya॒tsa rā॒ya ṛ॑ta॒pā ṛ॑te॒jāḥ || ६ ||
यदि॑न्द्र॒ पूर्वो॒ अप॑राय॒ शिक्ष॒न्नय॒ज्ज्याया॒न्कनी॑यसो दे॒ष्णम् ।
अ॒मृत॒ इत्पर्या॑सीत दू॒रमा चि॑त्र॒ चित्र्यं॑ भरा र॒यिं न॑: ॥७॥
yadi॑ndra॒ pūrvo॒ apa॑rāya॒ śikṣa॒nnaya॒jjyāyā॒nkanī॑yaso de॒ṣṇam | a॒mṛta॒ itparyā॑sīta dū॒ramā ci॑tra॒ citryaṃ॑ bharā ra॒yiṃ na॑: || ७ ||
यस्त॑ इन्द्र प्रि॒यो जनो॒ ददा॑श॒दस॑न्निरे॒के अ॑द्रिव॒: सखा॑ ते ।
व॒यं ते॑ अ॒स्यां सु॑म॒तौ चनि॑ष्ठा॒: स्याम॒ वरू॑थे॒ अघ्न॑तो॒ नृपी॑तौ ॥८॥
yasta॑ indra pri॒yo jano॒ dadā॑śa॒dasa॑nnire॒ke a॑driva॒: sakhā॑ te | va॒yaṃ te॑ a॒syāṃ su॑ma॒tau cani॑ṣṭhā॒: syāma॒ varū॑the॒ aghna॑to॒ nṛpī॑tau || ८ ||
ए॒ष स्तोमो॑ अचिक्रद॒द्वृषा॑ त उ॒त स्ता॒मुर्म॑घवन्नक्रपिष्ट ।
रा॒यस्कामो॑ जरि॒तारं॑ त॒ आग॒न्त्वम॒ङ्ग श॑क्र॒ वस्व॒ आ श॑को नः ॥९॥
e॒ṣa stomo॑ acikrada॒dvṛṣā॑ ta u॒ta stā॒murma॑ghavannakrapiṣṭa | rā॒yaskāmo॑ jari॒tāraṃ॑ ta॒ āga॒ntvama॒ṅga śa॑kra॒ vasva॒ ā śa॑ko naḥ || ९ ||
स न॑ इन्द्र॒ त्वय॑ताया इ॒षे धा॒स्त्मना॑ च॒ ये म॒घवा॑नो जु॒नन्ति॑ ।
वस्वी॒ षु ते॑ जरि॒त्रे अ॑स्तु श॒क्तिर्यू॒यं पा॑त स्व॒स्तिभि॒: सदा॑ नः ॥१०॥
sa na॑ indra॒ tvaya॑tāyā i॒ṣe dhā॒stmanā॑ ca॒ ye ma॒ghavā॑no ju॒nanti॑ | vasvī॒ ṣu te॑ jari॒tre a॑stu śa॒ktiryū॒yaṃ pā॑ta sva॒stibhi॒: sadā॑ naḥ || १० ||