EeseDharmaSanātana Library
527मण्डल 7 · सूक्त 11
5 shlokम॒हाँ अ॑स्यध्व॒रस्य॑ प्रके॒तो न ऋ॒ते त्वद॒मृता॑ मादयन्ते ।
आ विश्वे॑भिः स॒रथं॑ याहि दे॒वैर्न्य॑ग्ने॒ होता॑ प्रथ॒मः स॑दे॒ह ॥१॥
ma॒hām̐ a॑syadhva॒rasya॑ prake॒to na ṛ॒te tvada॒mṛtā॑ mādayante | ā viśve॑bhiḥ sa॒rathaṃ॑ yāhi de॒vairnya॑gne॒ hotā॑ pratha॒maḥ sa॑de॒ha || १ ||
त्वामी॑ळते अजि॒रं दू॒त्या॑य ह॒विष्म॑न्त॒: सद॒मिन्मानु॑षासः ।
यस्य॑ दे॒वैरास॑दो ब॒र्हिर॒ग्नेऽहा॑न्यस्मै सु॒दिना॑ भवन्ति ॥२॥
tvāmī॑ḷate aji॒raṃ dū॒tyā॑ya ha॒viṣma॑nta॒: sada॒minmānu॑ṣāsaḥ | yasya॑ de॒vairāsa॑do ba॒rhira॒gne’hā॑nyasmai su॒dinā॑ bhavanti || २ ||
त्रिश्चि॑द॒क्तोः प्र चि॑कितु॒र्वसू॑नि॒ त्वे अ॒न्तर्दा॒शुषे॒ मर्त्या॑य ।
म॒नु॒ष्वद॑ग्न इ॒ह य॑क्षि दे॒वान्भवा॑ नो दू॒तो अ॑भिशस्ति॒पावा॑ ॥३॥
triści॑da॒ktoḥ pra ci॑kitu॒rvasū॑ni॒ tve a॒ntardā॒śuṣe॒ martyā॑ya | ma॒nu॒ṣvada॑gna i॒ha ya॑kṣi de॒vānbhavā॑ no dū॒to a॑bhiśasti॒pāvā॑ || ३ ||
अ॒ग्निरी॑शे बृह॒तो अ॑ध्व॒रस्या॒ऽग्निर्विश्व॑स्य ह॒विष॑: कृ॒तस्य॑ ।
क्रतुं॒ ह्य॑स्य॒ वस॑वो जु॒षन्ताऽथा॑ दे॒वा द॑धिरे हव्य॒वाह॑म् ॥४॥
a॒gnirī॑śe bṛha॒to a॑dhva॒rasyā॒’gnirviśva॑sya ha॒viṣa॑: kṛ॒tasya॑ | kratuṃ॒ hya॑sya॒ vasa॑vo ju॒ṣantā’thā॑ de॒vā da॑dhire havya॒vāha॑m || ४ ||
आग्ने॑ वह हवि॒रद्या॑य दे॒वानिन्द्र॑ज्येष्ठास इ॒ह मा॑दयन्ताम् ।
इ॒मं य॒ज्ञं दि॒वि दे॒वेषु॑ धेहि यू॒यं पा॑त स्व॒स्तिभि॒: सदा॑ नः ॥५॥
āgne॑ vaha havi॒radyā॑ya de॒vānindra॑jyeṣṭhāsa i॒ha mā॑dayantām | i॒maṃ ya॒jñaṃ di॒vi de॒veṣu॑ dhehi yū॒yaṃ pā॑ta sva॒stibhi॒: sadā॑ naḥ || ५ ||