EeseDharmaSanātana Library
619मण्डल 7 · सूक्त 103
10 shlokसं॒व॒त्स॒रं श॑शया॒ना ब्रा॑ह्म॒णा व्र॑तचा॒रिण॑: ।
वाचं॑ प॒र्जन्य॑जिन्वितां॒ प्र म॒ण्डूका॑ अवादिषुः ॥१॥
saṃ॒va॒tsa॒raṃ śa॑śayā॒nā brā॑hma॒ṇā vra॑tacā॒riṇa॑: | vācaṃ॑ pa॒rjanya॑jinvitāṃ॒ pra ma॒ṇḍūkā॑ avādiṣuḥ || १ ||
दि॒व्या आपो॑ अ॒भि यदे॑न॒माय॒न्दृतिं॒ न शुष्कं॑ सर॒सी शया॑नम् ।
गवा॒मह॒ न मा॒युर्व॒त्सिनी॑नां म॒ण्डूका॑नां व॒ग्नुरत्रा॒ समे॑ति ॥२॥
di॒vyā āpo॑ a॒bhi yade॑na॒māya॒ndṛtiṃ॒ na śuṣkaṃ॑ sara॒sī śayā॑nam | gavā॒maha॒ na mā॒yurva॒tsinī॑nāṃ ma॒ṇḍūkā॑nāṃ va॒gnuratrā॒ same॑ti || २ ||
यदी॑मेनाँ उश॒तो अ॒भ्यव॑र्षीत्तृ॒ष्याव॑तः प्रा॒वृष्याग॑तायाम् ।
अ॒ख्ख॒ली॒कृत्या॑ पि॒तरं॒ न पु॒त्रो अ॒न्यो अ॒न्यमुप॒ वद॑न्तमेति ॥३॥
yadī॑menām̐ uśa॒to a॒bhyava॑rṣīttṛ॒ṣyāva॑taḥ prā॒vṛṣyāga॑tāyām | a॒khkha॒lī॒kṛtyā॑ pi॒taraṃ॒ na pu॒tro a॒nyo a॒nyamupa॒ vada॑ntameti || ३ ||
अ॒न्यो अ॒न्यमनु॑ गृभ्णात्येनोर॒पां प्र॑स॒र्गे यदम॑न्दिषाताम् ।
म॒ण्डूको॒ यद॒भिवृ॑ष्ट॒: कनि॑ष्क॒न्पृश्नि॑: सम्पृ॒ङ्क्ते हरि॑तेन॒ वाच॑म् ॥४॥
a॒nyo a॒nyamanu॑ gṛbhṇātyenora॒pāṃ pra॑sa॒rge yadama॑ndiṣātām | ma॒ṇḍūko॒ yada॒bhivṛ॑ṣṭa॒: kani॑ṣka॒npṛśni॑: sampṛ॒ṅkte hari॑tena॒ vāca॑m || ४ ||
यदे॑षाम॒न्यो अ॒न्यस्य॒ वाचं॑ शा॒क्तस्ये॑व॒ वद॑ति॒ शिक्ष॑माणः ।
सर्वं॒ तदे॑षां स॒मृधे॑व॒ पर्व॒ यत्सु॒वाचो॒ वद॑थ॒नाध्य॒प्सु ॥५॥
yade॑ṣāma॒nyo a॒nyasya॒ vācaṃ॑ śā॒ktasye॑va॒ vada॑ti॒ śikṣa॑māṇaḥ | sarvaṃ॒ tade॑ṣāṃ sa॒mṛdhe॑va॒ parva॒ yatsu॒vāco॒ vada॑tha॒nādhya॒psu || ५ ||
गोमा॑यु॒रेको॑ अ॒जमा॑यु॒रेक॒: पृश्नि॒रेको॒ हरि॑त॒ एक॑ एषाम् ।
स॒मा॒नं नाम॒ बिभ्र॑तो॒ विरू॑पाः पुरु॒त्रा वाचं॑ पिपिशु॒र्वद॑न्तः ॥६॥
gomā॑yu॒reko॑ a॒jamā॑yu॒reka॒: pṛśni॒reko॒ hari॑ta॒ eka॑ eṣām | sa॒mā॒naṃ nāma॒ bibhra॑to॒ virū॑pāḥ puru॒trā vācaṃ॑ pipiśu॒rvada॑ntaḥ || ६ ||
ब्रा॒ह्म॒णासो॑ अतिरा॒त्रे न सोमे॒ सरो॒ न पू॒र्णम॒भितो॒ वद॑न्तः ।
सं॒व॒त्स॒रस्य॒ तदह॒: परि॑ ष्ठ॒ यन्म॑ण्डूकाः प्रावृ॒षीणं॑ ब॒भूव॑ ॥७॥
brā॒hma॒ṇāso॑ atirā॒tre na some॒ saro॒ na pū॒rṇama॒bhito॒ vada॑ntaḥ | saṃ॒va॒tsa॒rasya॒ tadaha॒: pari॑ ṣṭha॒ yanma॑ṇḍūkāḥ prāvṛ॒ṣīṇaṃ॑ ba॒bhūva॑ || ७ ||
ब्रा॒ह्म॒णास॑: सो॒मिनो॒ वाच॑मक्रत॒ ब्रह्म॑ कृ॒ण्वन्त॑: परिवत्स॒रीण॑म् ।
अ॒ध्व॒र्यवो॑ घ॒र्मिण॑: सिष्विदा॒ना आ॒विर्भ॑वन्ति॒ गुह्या॒ न के चि॑त् ॥८॥
brā॒hma॒ṇāsa॑: so॒mino॒ vāca॑makrata॒ brahma॑ kṛ॒ṇvanta॑: parivatsa॒rīṇa॑m | a॒dhva॒ryavo॑ gha॒rmiṇa॑: siṣvidā॒nā ā॒virbha॑vanti॒ guhyā॒ na ke ci॑t || ८ ||
दे॒वहि॑तिं जुगुपुर्द्वाद॒शस्य॑ ऋ॒तुं नरो॒ न प्र मि॑नन्त्ये॒ते ।
सं॒व॒त्स॒रे प्रा॒वृष्याग॑तायां त॒प्ता घ॒र्मा अ॑श्नुवते विस॒र्गम् ॥९॥
de॒vahi॑tiṃ jugupurdvāda॒śasya॑ ṛ॒tuṃ naro॒ na pra mi॑nantye॒te | saṃ॒va॒tsa॒re prā॒vṛṣyāga॑tāyāṃ ta॒ptā gha॒rmā a॑śnuvate visa॒rgam || ९ ||
गोमा॑युरदाद॒जमा॑युरदा॒त्पृश्नि॑रदा॒द्धरि॑तो नो॒ वसू॑नि ।
गवां॑ म॒ण्डूका॒ दद॑तः श॒तानि॑ सहस्रसा॒वे प्र ति॑रन्त॒ आयु॑: ॥१०॥
gomā॑yuradāda॒jamā॑yuradā॒tpṛśni॑radā॒ddhari॑to no॒ vasū॑ni | gavāṃ॑ ma॒ṇḍūkā॒ dada॑taḥ śa॒tāni॑ sahasrasā॒ve pra ti॑ranta॒ āyu॑: || १० ||