EeseDharmaSanātana Library
505मण्डल 6 · सूक्त 64
6 shlokउदु॑ श्रि॒य उ॒षसो॒ रोच॑माना॒ अस्थु॑र॒पां नोर्मयो॒ रुश॑न्तः ।
कृ॒णोति॒ विश्वा॑ सु॒पथा॑ सु॒गान्यभू॑दु॒ वस्वी॒ दक्षि॑णा म॒घोनी॑ ॥१॥
udu॑ śri॒ya u॒ṣaso॒ roca॑mānā॒ asthu॑ra॒pāṃ normayo॒ ruśa॑ntaḥ | kṛ॒ṇoti॒ viśvā॑ su॒pathā॑ su॒gānyabhū॑du॒ vasvī॒ dakṣi॑ṇā ma॒ghonī॑ || १ ||
भ॒द्रा द॑दृक्ष उर्वि॒या वि भा॒स्युत्ते॑ शो॒चिर्भा॒नवो॒ द्याम॑पप्तन् ।
आ॒विर्वक्ष॑: कृणुषे शु॒म्भमा॒नोषो॑ देवि॒ रोच॑माना॒ महो॑भिः ॥२॥
bha॒drā da॑dṛkṣa urvi॒yā vi bhā॒syutte॑ śo॒cirbhā॒navo॒ dyāma॑paptan | ā॒virvakṣa॑: kṛṇuṣe śu॒mbhamā॒noṣo॑ devi॒ roca॑mānā॒ maho॑bhiḥ || २ ||
वह॑न्ति सीमरु॒णासो॒ रुश॑न्तो॒ गाव॑: सु॒भगा॑मुर्वि॒या प्र॑था॒नाम् ।
अपे॑जते॒ शूरो॒ अस्ते॑व॒ शत्रू॒न्बाध॑ते॒ तमो॑ अजि॒रो न वोळ्हा॑ ॥३॥
vaha॑nti sīmaru॒ṇāso॒ ruśa॑nto॒ gāva॑: su॒bhagā॑murvi॒yā pra॑thā॒nām | ape॑jate॒ śūro॒ aste॑va॒ śatrū॒nbādha॑te॒ tamo॑ aji॒ro na voḷhā॑ || ३ ||
सु॒गोत ते॑ सु॒पथा॒ पर्व॑तेष्ववा॒ते अ॒पस्त॑रसि स्वभानो ।
सा न॒ आ व॑ह पृथुयामन्नृष्वे र॒यिं दि॑वो दुहितरिष॒यध्यै॑ ॥४॥
su॒gota te॑ su॒pathā॒ parva॑teṣvavā॒te a॒pasta॑rasi svabhāno | sā na॒ ā va॑ha pṛthuyāmannṛṣve ra॒yiṃ di॑vo duhitariṣa॒yadhyai॑ || ४ ||
सा व॑ह॒ योक्षभि॒रवा॒तोषो॒ वरं॒ वह॑सि॒ जोष॒मनु॑ ।
त्वं दि॑वो दुहित॒र्या ह॑ दे॒वी पू॒र्वहू॑तौ मं॒हना॑ दर्श॒ता भू॑: ॥५॥
sā va॑ha॒ yokṣabhi॒ravā॒toṣo॒ varaṃ॒ vaha॑si॒ joṣa॒manu॑ | tvaṃ di॑vo duhita॒ryā ha॑ de॒vī pū॒rvahū॑tau maṃ॒hanā॑ darśa॒tā bhū॑: || ५ ||
उत्ते॒ वय॑श्चिद्वस॒तेर॑पप्त॒न्नर॑श्च॒ ये पि॑तु॒भाजो॒ व्यु॑ष्टौ ।
अ॒मा स॒ते व॑हसि॒ भूरि॑ वा॒ममुषो॑ देवि दा॒शुषे॒ मर्त्या॑य ॥६॥
utte॒ vaya॑ścidvasa॒tera॑papta॒nnara॑śca॒ ye pi॑tu॒bhājo॒ vyu॑ṣṭau | a॒mā sa॒te va॑hasi॒ bhūri॑ vā॒mamuṣo॑ devi dā॒śuṣe॒ martyā॑ya || ६ ||