EeseDharmaSanātana Library
502मण्डल 6 · सूक्त 61
14 shlokइ॒यम॑ददाद्रभ॒समृ॑ण॒च्युतं॒ दिवो॑दासं वध्र्य॒श्वाय॑ दा॒शुषे॑ ।
या शश्व॑न्तमाच॒खादा॑व॒सं प॒णिं ता ते॑ दा॒त्राणि॑ तवि॒षा स॑रस्वति ॥१॥
i॒yama॑dadādrabha॒samṛ॑ṇa॒cyutaṃ॒ divo॑dāsaṃ vadhrya॒śvāya॑ dā॒śuṣe॑ | yā śaśva॑ntamāca॒khādā॑va॒saṃ pa॒ṇiṃ tā te॑ dā॒trāṇi॑ tavi॒ṣā sa॑rasvati || १ ||
इ॒यं शुष्मे॑भिर्बिस॒खा इ॑वारुज॒त्सानु॑ गिरी॒णां त॑वि॒षेभि॑रू॒र्मिभि॑: ।
पा॒रा॒व॒त॒घ्नीमव॑से सुवृ॒क्तिभि॒: सर॑स्वती॒मा वि॑वासेम धी॒तिभि॑: ॥२॥
i॒yaṃ śuṣme॑bhirbisa॒khā i॑vāruja॒tsānu॑ girī॒ṇāṃ ta॑vi॒ṣebhi॑rū॒rmibhi॑: | pā॒rā॒va॒ta॒ghnīmava॑se suvṛ॒ktibhi॒: sara॑svatī॒mā vi॑vāsema dhī॒tibhi॑: || २ ||
सर॑स्वति देव॒निदो॒ नि ब॑र्हय प्र॒जां विश्व॑स्य॒ बृस॑यस्य मा॒यिन॑: ।
उ॒त क्षि॒तिभ्यो॒ऽवनी॑रविन्दो वि॒षमे॑भ्यो अस्रवो वाजिनीवति ॥३॥
sara॑svati deva॒nido॒ ni ba॑rhaya pra॒jāṃ viśva॑sya॒ bṛsa॑yasya mā॒yina॑: | u॒ta kṣi॒tibhyo॒’vanī॑ravindo vi॒ṣame॑bhyo asravo vājinīvati || ३ ||
प्र णो॑ दे॒वी सर॑स्वती॒ वाजे॑भिर्वा॒जिनी॑वती । धी॒नाम॑वि॒त्र्य॑वतु ॥४॥
pra ṇo॑ de॒vī sara॑svatī॒ vāje॑bhirvā॒jinī॑vatī | dhī॒nāma॑vi॒trya॑vatu || ४ ||
यस्त्वा॑ देवि सरस्वत्युपब्रू॒ते धने॑ हि॒ते । इन्द्रं॒ न वृ॑त्र॒तूर्ये॑ ॥५॥
yastvā॑ devi sarasvatyupabrū॒te dhane॑ hi॒te | indraṃ॒ na vṛ॑tra॒tūrye॑ || ५ ||
त्वं दे॑वि सरस्व॒त्यवा॒ वाजे॑षु वाजिनि । रदा॑ पू॒षेव॑ नः स॒निम् ॥६॥
tvaṃ de॑vi sarasva॒tyavā॒ vāje॑ṣu vājini | radā॑ pū॒ṣeva॑ naḥ sa॒nim || ६ ||
उ॒त स्या न॒: सर॑स्वती घो॒रा हिर॑ण्यवर्तनिः । वृ॒त्र॒घ्नी व॑ष्टि सुष्टु॒तिम् ॥७॥
u॒ta syā na॒: sara॑svatī gho॒rā hira॑ṇyavartaniḥ | vṛ॒tra॒ghnī va॑ṣṭi suṣṭu॒tim || ७ ||
यस्या॑ अन॒न्तो अह्रु॑तस्त्वे॒षश्च॑रि॒ष्णुर॑र्ण॒वः । अम॒श्चर॑ति॒ रोरु॑वत् ॥८॥
yasyā॑ ana॒nto ahru॑tastve॒ṣaśca॑ri॒ṣṇura॑rṇa॒vaḥ | ama॒ścara॑ti॒ roru॑vat || ८ ||
सा नो॒ विश्वा॒ अति॒ द्विष॒: स्वसॄ॑र॒न्या ऋ॒ताव॑री । अत॒न्नहे॑व॒ सूर्य॑: ॥९॥
sā no॒ viśvā॒ ati॒ dviṣa॒: svasṝ॑ra॒nyā ṛ॒tāva॑rī | ata॒nnahe॑va॒ sūrya॑: || ९ ||
उ॒त न॑: प्रि॒या प्रि॒यासु॑ स॒प्तस्व॑सा॒ सुजु॑ष्टा । सर॑स्वती॒ स्तोम्या॑ भूत् ॥१०॥
u॒ta na॑: pri॒yā pri॒yāsu॑ sa॒ptasva॑sā॒ suju॑ṣṭā | sara॑svatī॒ stomyā॑ bhūt || १० ||
आ॒प॒प्रुषी॒ पार्थि॑वान्यु॒रु रजो॑ अ॒न्तरि॑क्षम् । सर॑स्वती नि॒दस्पा॑तु ॥११॥
ā॒pa॒pruṣī॒ pārthi॑vānyu॒ru rajo॑ a॒ntari॑kṣam | sara॑svatī ni॒daspā॑tu || ११ ||
त्रि॒ष॒धस्था॑ स॒प्तधा॑तु॒: पञ्च॑ जा॒ता व॒र्धय॑न्ती । वाजे॑वाजे॒ हव्या॑ भूत् ॥१२॥
tri॒ṣa॒dhasthā॑ sa॒ptadhā॑tu॒: pañca॑ jā॒tā va॒rdhaya॑ntī | vāje॑vāje॒ havyā॑ bhūt || १२ ||
प्र या म॑हि॒म्ना म॒हिना॑सु॒ चेकि॑ते द्यु॒म्नेभि॑र॒न्या अ॒पसा॑म॒पस्त॑मा ।
रथ॑ इव बृह॒ती वि॒भ्वने॑ कृ॒तोप॒स्तुत्या॑ चिकि॒तुषा॒ सर॑स्वती ॥१३॥
pra yā ma॑hi॒mnā ma॒hinā॑su॒ ceki॑te dyu॒mnebhi॑ra॒nyā a॒pasā॑ma॒pasta॑mā | ratha॑ iva bṛha॒tī vi॒bhvane॑ kṛ॒topa॒stutyā॑ ciki॒tuṣā॒ sara॑svatī || १३ ||
सर॑स्वत्य॒भि नो॑ नेषि॒ वस्यो॒ माप॑ स्फरी॒: पय॑सा॒ मा न॒ आ ध॑क् ।
जु॒षस्व॑ नः स॒ख्या वे॒श्या॑ च॒ मा त्वत्क्षेत्रा॒ण्यर॑णानि गन्म ॥१४॥
sara॑svatya॒bhi no॑ neṣi॒ vasyo॒ māpa॑ spharī॒: paya॑sā॒ mā na॒ ā dha॑k | ju॒ṣasva॑ naḥ sa॒khyā ve॒śyā॑ ca॒ mā tvatkṣetrā॒ṇyara॑ṇāni ganma || १४ ||