EeseDharmaSanātana Library
447मण्डल 6 · सूक्त 6
7 shlokप्र नव्य॑सा॒ सह॑सः सू॒नुमच्छा॑ य॒ज्ञेन॑ गा॒तुमव॑ इ॒च्छमा॑नः ।
वृ॒श्चद्व॑नं कृ॒ष्णया॑मं॒ रुश॑न्तं वी॒ती होता॑रं दि॒व्यं जि॑गाति ॥१॥
pra navya॑sā॒ saha॑saḥ sū॒numacchā॑ ya॒jñena॑ gā॒tumava॑ i॒cchamā॑naḥ | vṛ॒ścadva॑naṃ kṛ॒ṣṇayā॑maṃ॒ ruśa॑ntaṃ vī॒tī hotā॑raṃ di॒vyaṃ ji॑gāti || १ ||
स श्वि॑ता॒नस्त॑न्य॒तू रो॑चन॒स्था अ॒जरे॑भि॒र्नान॑दद्भि॒र्यवि॑ष्ठः ।
यः पा॑व॒कः पु॑रु॒तम॑: पु॒रूणि॑ पृ॒थून्य॒ग्निर॑नु॒याति॒ भर्व॑न् ॥२॥
sa śvi॑tā॒nasta॑nya॒tū ro॑cana॒sthā a॒jare॑bhi॒rnāna॑dadbhi॒ryavi॑ṣṭhaḥ | yaḥ pā॑va॒kaḥ pu॑ru॒tama॑: pu॒rūṇi॑ pṛ॒thūnya॒gnira॑nu॒yāti॒ bharva॑n || २ ||
वि ते॒ विष्व॒ग्वात॑जूतासो अग्ने॒ भामा॑सः शुचे॒ शुच॑यश्चरन्ति ।
तु॒वि॒म्र॒क्षासो॑ दि॒व्या नव॑ग्वा॒ वना॑ वनन्ति धृष॒ता रु॒जन्त॑: ॥३॥
vi te॒ viṣva॒gvāta॑jūtāso agne॒ bhāmā॑saḥ śuce॒ śuca॑yaścaranti | tu॒vi॒mra॒kṣāso॑ di॒vyā nava॑gvā॒ vanā॑ vananti dhṛṣa॒tā ru॒janta॑: || ३ ||
ये ते॑ शु॒क्रास॒: शुच॑यः शुचिष्म॒: क्षां वप॑न्ति॒ विषि॑तासो॒ अश्वा॑: ।
अध॑ भ्र॒मस्त॑ उर्वि॒या वि भा॑ति या॒तय॑मानो॒ अधि॒ सानु॒ पृश्ने॑: ॥४॥
ye te॑ śu॒krāsa॒: śuca॑yaḥ śuciṣma॒: kṣāṃ vapa॑nti॒ viṣi॑tāso॒ aśvā॑: | adha॑ bhra॒masta॑ urvi॒yā vi bhā॑ti yā॒taya॑māno॒ adhi॒ sānu॒ pṛśne॑: || ४ ||
अध॑ जि॒ह्वा पा॑पतीति॒ प्र वृष्णो॑ गोषु॒युधो॒ नाशनि॑: सृजा॒ना ।
शूर॑स्येव॒ प्रसि॑तिः क्षा॒तिर॒ग्नेर्दु॒र्वर्तु॑र्भी॒मो द॑यते॒ वना॑नि ॥५॥
adha॑ ji॒hvā pā॑patīti॒ pra vṛṣṇo॑ goṣu॒yudho॒ nāśani॑: sṛjā॒nā | śūra॑syeva॒ prasi॑tiḥ kṣā॒tira॒gnerdu॒rvartu॑rbhī॒mo da॑yate॒ vanā॑ni || ५ ||
आ भा॒नुना॒ पार्थि॑वानि॒ ज्रयां॑सि म॒हस्तो॒दस्य॑ धृष॒ता त॑तन्थ ।
स बा॑ध॒स्वाप॑ भ॒या सहो॑भि॒: स्पृधो॑ वनु॒ष्यन् व॒नुषो॒ नि जू॑र्व ॥६॥
ā bhā॒nunā॒ pārthi॑vāni॒ jrayāṃ॑si ma॒hasto॒dasya॑ dhṛṣa॒tā ta॑tantha | sa bā॑dha॒svāpa॑ bha॒yā saho॑bhi॒: spṛdho॑ vanu॒ṣyan va॒nuṣo॒ ni jū॑rva || ६ ||
स चि॑त्र चि॒त्रं चि॒तय॑न्तम॒स्मे चित्र॑क्षत्र चि॒त्रत॑मं वयो॒धाम् ।
च॒न्द्रं र॒यिं पु॑रु॒वीरं॑ बृ॒हन्तं॒ चन्द्र॑ च॒न्द्राभि॑र्गृण॒ते यु॑वस्व ॥७॥
sa ci॑tra ci॒traṃ ci॒taya॑ntama॒sme citra॑kṣatra ci॒trata॑maṃ vayo॒dhām | ca॒ndraṃ ra॒yiṃ pu॑ru॒vīraṃ॑ bṛ॒hantaṃ॒ candra॑ ca॒ndrābhi॑rgṛṇa॒te yu॑vasva || ७ ||