EeseDharmaSanātana Library
500मण्डल 6 · सूक्त 59
10 shlokप्र नु वो॑चा सु॒तेषु॑ वां वी॒र्या॒३ यानि॑ च॒क्रथु॑: ।
ह॒तासो॑ वां पि॒तरो॑ दे॒वश॑त्रव॒ इन्द्रा॑ग्नी॒ जीव॑थो यु॒वम् ॥१॥
pra nu vo॑cā su॒teṣu॑ vāṃ vī॒ryā॒३ yāni॑ ca॒krathu॑: | ha॒tāso॑ vāṃ pi॒taro॑ de॒vaśa॑trava॒ indrā॑gnī॒ jīva॑tho yu॒vam || १ ||
बळि॒त्था म॑हि॒मा वा॒मिन्द्रा॑ग्नी॒ पनि॑ष्ठ॒ आ । स॒मा॒नो वां॑ जनि॒ता भ्रात॑रा यु॒वं य॒मावि॒हेह॑मातरा ॥२॥
baḷi॒tthā ma॑hi॒mā vā॒mindrā॑gnī॒ pani॑ṣṭha॒ ā | sa॒mā॒no vāṃ॑ jani॒tā bhrāta॑rā yu॒vaṃ ya॒māvi॒heha॑mātarā || २ ||
ओ॒कि॒वांसा॑ सु॒ते सचाँ॒ अश्वा॒ सप्ती॑ इ॒वाद॑ने । इन्द्रा॒ न्व१ग्नी अव॑से॒ह व॒ज्रिणा॑ व॒यं दे॒वा ह॑वामहे ॥३॥
o॒ki॒vāṃsā॑ su॒te sacām॒̐ aśvā॒ saptī॑ i॒vāda॑ne | indrā॒ nva१gnī ava॑se॒ha va॒jriṇā॑ va॒yaṃ de॒vā ha॑vāmahe || ३ ||
य इ॑न्द्राग्नी सु॒तेषु॑ वां॒ स्तव॒त्तेष्वृ॑तावृधा । जो॒ष॒वा॒कं वद॑तः पज्रहोषिणा॒ न दे॑वा भ॒सथ॑श्च॒न ॥४॥
ya i॑ndrāgnī su॒teṣu॑ vāṃ॒ stava॒tteṣvṛ॑tāvṛdhā | jo॒ṣa॒vā॒kaṃ vada॑taḥ pajrahoṣiṇā॒ na de॑vā bha॒satha॑śca॒na || ४ ||
इन्द्रा॑ग्नी॒ को अ॒स्य वां॒ देवौ॒ मर्त॑श्चिकेतति ।
विषू॑चो॒ अश्वा॑न्युयुजा॒न ई॑यत॒ एक॑: समा॒न आ रथे॑ ॥५॥
indrā॑gnī॒ ko a॒sya vāṃ॒ devau॒ marta॑ściketati | viṣū॑co॒ aśvā॑nyuyujā॒na ī॑yata॒ eka॑: samā॒na ā rathe॑ || ५ ||
इन्द्रा॑ग्नी अ॒पादि॒यं पूर्वागा॑त्प॒द्वती॑भ्यः । हि॒त्वी शिरो॑ जि॒ह्वया॒ वाव॑द॒च्चर॑त्त्रिं॒शत्प॒दा न्य॑क्रमीत् ॥६॥
indrā॑gnī a॒pādi॒yaṃ pūrvāgā॑tpa॒dvatī॑bhyaḥ | hi॒tvī śiro॑ ji॒hvayā॒ vāva॑da॒ccara॑ttriṃ॒śatpa॒dā nya॑kramīt || ६ ||
इन्द्रा॑ग्नी॒ आ हि त॑न्व॒ते नरो॒ धन्वा॑नि बा॒ह्वोः । मा नो॑ अ॒स्मिन्म॑हाध॒ने परा॑ वर्क्तं॒ गवि॑ष्टिषु ॥७॥
indrā॑gnī॒ ā hi ta॑nva॒te naro॒ dhanvā॑ni bā॒hvoḥ | mā no॑ a॒sminma॑hādha॒ne parā॑ varktaṃ॒ gavi॑ṣṭiṣu || ७ ||
इन्द्रा॑ग्नी॒ तप॑न्ति मा॒ऽघा अ॒र्यो अरा॑तयः । अप॒ द्वेषां॒स्या कृ॑तं युयु॒तं सूर्या॒दधि॑ ॥८॥
indrā॑gnī॒ tapa॑nti mā॒’ghā a॒ryo arā॑tayaḥ | apa॒ dveṣāṃ॒syā kṛ॑taṃ yuyu॒taṃ sūryā॒dadhi॑ || ८ ||
इन्द्रा॑ग्नी यु॒वोरपि॒ वसु॑ दि॒व्यानि॒ पार्थि॑वा । आ न॑ इ॒ह प्र य॑च्छतं र॒यिं वि॒श्वायु॑पोषसम् ॥९॥
indrā॑gnī yu॒vorapi॒ vasu॑ di॒vyāni॒ pārthi॑vā | ā na॑ i॒ha pra ya॑cchataṃ ra॒yiṃ vi॒śvāyu॑poṣasam || ९ ||
इन्द्रा॑ग्नी उक्थवाहसा॒ स्तोमे॑भिर्हवनश्रुता । विश्वा॑भिर्गी॒र्भिरा ग॑तम॒स्य सोम॑स्य पी॒तये॑ ॥१०॥
indrā॑gnī ukthavāhasā॒ stome॑bhirhavanaśrutā | viśvā॑bhirgī॒rbhirā ga॑tama॒sya soma॑sya pī॒taye॑ || १० ||