EeseDharmaSanātana Library
499मण्डल 6 · सूक्त 58
4 shlokशु॒क्रं ते॑ अ॒न्यद्य॑ज॒तं ते॑ अ॒न्यद्विषु॑रूपे॒ अह॑नी॒ द्यौरि॑वासि ।
विश्वा॒ हि मा॒या अव॑सि स्वधावो भ॒द्रा ते॑ पूषन्नि॒ह रा॒तिर॑स्तु ॥१॥
śu॒kraṃ te॑ a॒nyadya॑ja॒taṃ te॑ a॒nyadviṣu॑rūpe॒ aha॑nī॒ dyauri॑vāsi | viśvā॒ hi mā॒yā ava॑si svadhāvo bha॒drā te॑ pūṣanni॒ha rā॒tira॑stu || १ ||
अ॒जाश्व॑: पशु॒पा वाज॑पस्त्यो धियंजि॒न्वो भुव॑ने॒ विश्वे॒ अर्पि॑तः ।
अष्ट्रां॑ पू॒षा शि॑थि॒रामु॒द्वरी॑वृजत्सं॒चक्षा॑णो॒ भुव॑ना दे॒व ई॑यते ॥२॥
a॒jāśva॑: paśu॒pā vāja॑pastyo dhiyaṃji॒nvo bhuva॑ne॒ viśve॒ arpi॑taḥ | aṣṭrāṃ॑ pū॒ṣā śi॑thi॒rāmu॒dvarī॑vṛjatsaṃ॒cakṣā॑ṇo॒ bhuva॑nā de॒va ī॑yate || २ ||
यास्ते॑ पूष॒न्नावो॑ अ॒न्तः स॑मु॒द्रे हि॑र॒ण्ययी॑र॒न्तरि॑क्षे॒ चर॑न्ति ।
ताभि॑र्यासि दू॒त्यां सूर्य॑स्य॒ कामे॑न कृत॒ श्रव॑ इ॒च्छमा॑नः ॥३॥
yāste॑ pūṣa॒nnāvo॑ a॒ntaḥ sa॑mu॒dre hi॑ra॒ṇyayī॑ra॒ntari॑kṣe॒ cara॑nti | tābhi॑ryāsi dū॒tyāṃ sūrya॑sya॒ kāme॑na kṛta॒ śrava॑ i॒cchamā॑naḥ || ३ ||
पू॒षा सु॒बन्धु॑र्दि॒व आ पृ॑थि॒व्या इ॒ळस्पति॑र्म॒घवा॑ द॒स्मव॑र्चाः ।
यं दे॒वासो॒ अद॑दुः सू॒र्यायै॒ कामे॑न कृ॒तं त॒वसं॒ स्वञ्च॑म् ॥४॥
pū॒ṣā su॒bandhu॑rdi॒va ā pṛ॑thi॒vyā i॒ḷaspati॑rma॒ghavā॑ da॒smava॑rcāḥ | yaṃ de॒vāso॒ ada॑duḥ sū॒ryāyai॒ kāme॑na kṛ॒taṃ ta॒vasaṃ॒ svañca॑m || ४ ||