EeseDharmaSanātana Library
492मण्डल 6 · सूक्त 51
16 shlokउदु॒ त्यच्चक्षु॒र्महि॑ मि॒त्रयो॒राँ एति॑ प्रि॒यं वरु॑णयो॒रद॑ब्धम् ।
ऋ॒तस्य॒ शुचि॑ दर्श॒तमनी॑कं रु॒क्मो न दि॒व उदि॑ता॒ व्य॑द्यौत् ॥१॥
udu॒ tyaccakṣu॒rmahi॑ mi॒trayo॒rām̐ eti॑ pri॒yaṃ varu॑ṇayo॒rada॑bdham | ṛ॒tasya॒ śuci॑ darśa॒tamanī॑kaṃ ru॒kmo na di॒va udi॑tā॒ vya॑dyaut || १ ||
वेद॒ यस्त्रीणि॑ वि॒दथा॑न्येषां दे॒वानां॒ जन्म॑ सनु॒तरा च॒ विप्र॑: ।
ऋ॒जु मर्ते॑षु वृजि॒ना च॒ पश्य॑न्न॒भि च॑ष्टे॒ सूरो॑ अ॒र्य एवा॑न् ॥२॥
veda॒ yastrīṇi॑ vi॒dathā॑nyeṣāṃ de॒vānāṃ॒ janma॑ sanu॒tarā ca॒ vipra॑: | ṛ॒ju marte॑ṣu vṛji॒nā ca॒ paśya॑nna॒bhi ca॑ṣṭe॒ sūro॑ a॒rya evā॑n || २ ||
स्तु॒ष उ॑ वो म॒ह ऋ॒तस्य॑ गो॒पानदि॑तिं मि॒त्रं वरु॑णं सुजा॒तान् ।
अ॒र्य॒मणं॒ भग॒मद॑ब्धधीती॒नच्छा॑ वोचे सध॒न्य॑: पाव॒कान् ॥३॥
stu॒ṣa u॑ vo ma॒ha ṛ॒tasya॑ go॒pānadi॑tiṃ mi॒traṃ varu॑ṇaṃ sujā॒tān | a॒rya॒maṇaṃ॒ bhaga॒mada॑bdhadhītī॒nacchā॑ voce sadha॒nya॑: pāva॒kān || ३ ||
रि॒शाद॑स॒: सत्प॑तीँ॒रद॑ब्धान्म॒हो राज्ञ॑: सुवस॒नस्य॑ दा॒तॄन् ।
यून॑: सुक्ष॒त्रान्क्षय॑तो दि॒वो नॄना॑दि॒त्यान्या॒म्यदि॑तिं दुवो॒यु ॥४॥
ri॒śāda॑sa॒: satpa॑tīm॒̐rada॑bdhānma॒ho rājña॑: suvasa॒nasya॑ dā॒tṝn | yūna॑: sukṣa॒trānkṣaya॑to di॒vo nṝnā॑di॒tyānyā॒myadi॑tiṃ duvo॒yu || ४ ||
द्यौ॒३ष्पित॒: पृथि॑वि॒ मात॒रध्रु॒गग्ने॑ भ्रातर्वसवो मृ॒ळता॑ नः ।
विश्व॑ आदित्या अदिते स॒जोषा॑ अ॒स्मभ्यं॒ शर्म॑ बहु॒लं वि य॑न्त ॥५॥
dyau॒३ṣpita॒: pṛthi॑vi॒ māta॒radhru॒gagne॑ bhrātarvasavo mṛ॒ḷatā॑ naḥ | viśva॑ ādityā adite sa॒joṣā॑ a॒smabhyaṃ॒ śarma॑ bahu॒laṃ vi ya॑nta || ५ ||
मा नो॒ वृका॑य वृ॒क्ये॑ समस्मा अघाय॒ते री॑रधता यजत्राः ।
यू॒यं हि ष्ठा र॒थ्यो॑ नस्त॒नूनां॑ यू॒यं दक्ष॑स्य॒ वच॑सो बभू॒व ॥६॥
mā no॒ vṛkā॑ya vṛ॒kye॑ samasmā aghāya॒te rī॑radhatā yajatrāḥ | yū॒yaṃ hi ṣṭhā ra॒thyo॑ nasta॒nūnāṃ॑ yū॒yaṃ dakṣa॑sya॒ vaca॑so babhū॒va || ६ ||
मा व॒ एनो॑ अ॒न्यकृ॑तं भुजेम॒ मा तत्क॑र्म वसवो॒ यच्चय॑ध्वे ।
विश्व॑स्य॒ हि क्षय॑थ विश्वदेवाः स्व॒यं रि॒पुस्त॒न्वं॑ रीरिषीष्ट ॥७॥
mā va॒ eno॑ a॒nyakṛ॑taṃ bhujema॒ mā tatka॑rma vasavo॒ yaccaya॑dhve | viśva॑sya॒ hi kṣaya॑tha viśvadevāḥ sva॒yaṃ ri॒pusta॒nvaṃ॑ rīriṣīṣṭa || ७ ||
नम॒ इदु॒ग्रं नम॒ आ वि॑वासे॒ नमो॑ दाधार पृथि॒वीमु॒त द्याम् ।
नमो॑ दे॒वेभ्यो॒ नम॑ ईश एषां कृ॒तं चि॒देनो॒ नम॒सा वि॑वासे ॥८॥
nama॒ idu॒graṃ nama॒ ā vi॑vāse॒ namo॑ dādhāra pṛthi॒vīmu॒ta dyām | namo॑ de॒vebhyo॒ nama॑ īśa eṣāṃ kṛ॒taṃ ci॒deno॒ nama॒sā vi॑vāse || ८ ||
ऋ॒तस्य॑ वो र॒थ्य॑: पू॒तद॑क्षानृ॒तस्य॑ पस्त्य॒सदो॒ अद॑ब्धान् ।
ताँ आ नमो॑भिरुरु॒चक्ष॑सो॒ नॄन्विश्वा॑न्व॒ आ न॑मे म॒हो य॑जत्राः ॥९॥
ṛ॒tasya॑ vo ra॒thya॑: pū॒tada॑kṣānṛ॒tasya॑ pastya॒sado॒ ada॑bdhān | tām̐ ā namo॑bhiruru॒cakṣa॑so॒ nṝnviśvā॑nva॒ ā na॑me ma॒ho ya॑jatrāḥ || ९ ||
ते हि श्रेष्ठ॑वर्चस॒स्त उ॑ नस्ति॒रो विश्वा॑नि दुरि॒ता नय॑न्ति ।
सु॒क्ष॒त्रासो॒ वरु॑णो मि॒त्रो अ॒ग्निॠ॒तधी॑तयो वक्म॒राज॑सत्याः ॥१०॥
te hi śreṣṭha॑varcasa॒sta u॑ nasti॒ro viśvā॑ni duri॒tā naya॑nti | su॒kṣa॒trāso॒ varu॑ṇo mi॒tro a॒gniṝ॒tadhī॑tayo vakma॒rāja॑satyāḥ || १० ||
ते न॒ इन्द्र॑: पृथि॒वी क्षाम॑ वर्धन्पू॒षा भगो॒ अदि॑ति॒: पञ्च॒ जना॑: ।
सु॒शर्मा॑ण॒: स्वव॑सः सुनी॒था भव॑न्तु नः सुत्रा॒त्रास॑: सुगो॒पाः ॥११॥
te na॒ indra॑: pṛthi॒vī kṣāma॑ vardhanpū॒ṣā bhago॒ adi॑ti॒: pañca॒ janā॑: | su॒śarmā॑ṇa॒: svava॑saḥ sunī॒thā bhava॑ntu naḥ sutrā॒trāsa॑: sugo॒pāḥ || ११ ||
नू स॒द्मानं॑ दि॒व्यं नंशि॑ देवा॒ भार॑द्वाजः सुम॒तिं या॑ति॒ होता॑ ।
आ॒सा॒नेभि॒र्यज॑मानो मि॒येधै॑र्दे॒वानां॒ जन्म॑ वसू॒युर्व॑वन्द ॥१२॥
nū sa॒dmānaṃ॑ di॒vyaṃ naṃśi॑ devā॒ bhāra॑dvājaḥ suma॒tiṃ yā॑ti॒ hotā॑ | ā॒sā॒nebhi॒ryaja॑māno mi॒yedhai॑rde॒vānāṃ॒ janma॑ vasū॒yurva॑vanda || १२ ||
अप॒ त्यं वृ॑जि॒नं रि॒पुं स्ते॒नम॑ग्ने दुरा॒ध्य॑म् । द॒वि॒ष्ठम॑स्य सत्पते कृ॒धी सु॒गम् ॥१३॥
apa॒ tyaṃ vṛ॑ji॒naṃ ri॒puṃ ste॒nama॑gne durā॒dhya॑m | da॒vi॒ṣṭhama॑sya satpate kṛ॒dhī su॒gam || १३ ||
ग्रावा॑णः सोम नो॒ हि कं॑ सखित्व॒नाय॑ वाव॒शुः । ज॒ही न्य१त्रिणं॑ प॒णिं वृको॒ हि षः ॥१४॥
grāvā॑ṇaḥ soma no॒ hi kaṃ॑ sakhitva॒nāya॑ vāva॒śuḥ | ja॒hī nya१triṇaṃ॑ pa॒ṇiṃ vṛko॒ hi ṣaḥ || १४ ||
यू॒यं हि ष्ठा सु॑दानव॒ इन्द्र॑ज्येष्ठा अ॒भिद्य॑वः । कर्ता॑ नो॒ अध्व॒न्ना सु॒गं गो॒पा अ॒मा ॥१५॥
yū॒yaṃ hi ṣṭhā su॑dānava॒ indra॑jyeṣṭhā a॒bhidya॑vaḥ | kartā॑ no॒ adhva॒nnā su॒gaṃ go॒pā a॒mā || १५ ||
अपि॒ पन्था॑मगन्महि स्वस्ति॒गाम॑ने॒हस॑म् । येन॒ विश्वा॒: परि॒ द्विषो॑ वृ॒णक्ति॑ वि॒न्दते॒ वसु॑ ॥१६॥
api॒ panthā॑maganmahi svasti॒gāma॑ne॒hasa॑m | yena॒ viśvā॒: pari॒ dviṣo॑ vṛ॒ṇakti॑ vi॒ndate॒ vasu॑ || १६ ||