EeseDharmaSanātana Library
486मण्डल 6 · सूक्त 45
33 shlokय आन॑यत्परा॒वत॒: सुनी॑ती तु॒र्वशं॒ यदु॑म् । इन्द्र॒: स नो॒ युवा॒ सखा॑ ॥१॥
ya āna॑yatparā॒vata॒: sunī॑tī tu॒rvaśaṃ॒ yadu॑m | indra॒: sa no॒ yuvā॒ sakhā॑ || १ ||
अ॒वि॒प्रे चि॒द्वयो॒ दध॑दना॒शुना॑ चि॒दर्व॑ता । इन्द्रो॒ जेता॑ हि॒तं धन॑म् ॥२॥
a॒vi॒pre ci॒dvayo॒ dadha॑danā॒śunā॑ ci॒darva॑tā | indro॒ jetā॑ hi॒taṃ dhana॑m || २ ||
म॒हीर॑स्य॒ प्रणी॑तयः पू॒र्वीरु॒त प्रश॑स्तयः । नास्य॑ क्षीयन्त ऊ॒तय॑: ॥३॥
ma॒hīra॑sya॒ praṇī॑tayaḥ pū॒rvīru॒ta praśa॑stayaḥ | nāsya॑ kṣīyanta ū॒taya॑: || ३ ||
सखा॑यो॒ ब्रह्म॑वाह॒सेऽर्च॑त॒ प्र च॑ गायत । स हि न॒: प्रम॑तिर्म॒ही ॥४॥
sakhā॑yo॒ brahma॑vāha॒se’rca॑ta॒ pra ca॑ gāyata | sa hi na॒: prama॑tirma॒hī || ४ ||
त्वमेक॑स्य वृत्रहन्नवि॒ता द्वयो॑रसि । उ॒तेदृशे॒ यथा॑ व॒यम् ॥५॥
tvameka॑sya vṛtrahannavi॒tā dvayo॑rasi | u॒tedṛśe॒ yathā॑ va॒yam || ५ ||
नय॒सीद्वति॒ द्विष॑: कृ॒णोष्यु॑क्थशं॒सिन॑: । नृभि॑: सु॒वीर॑ उच्यसे ॥६॥
naya॒sīdvati॒ dviṣa॑: kṛ॒ṇoṣyu॑kthaśaṃ॒sina॑: | nṛbhi॑: su॒vīra॑ ucyase || ६ ||
ब्र॒ह्माणं॒ ब्रह्म॑वाहसं गी॒र्भिः सखा॑यमृ॒ग्मिय॑म् । गां न दो॒हसे॑ हुवे ॥७॥
bra॒hmāṇaṃ॒ brahma॑vāhasaṃ gī॒rbhiḥ sakhā॑yamṛ॒gmiya॑m | gāṃ na do॒hase॑ huve || ७ ||
यस्य॒ विश्वा॑नि॒ हस्त॑योरू॒चुर्वसू॑नि॒ नि द्वि॒ता । वी॒रस्य॑ पृतना॒षह॑: ॥८॥
yasya॒ viśvā॑ni॒ hasta॑yorū॒curvasū॑ni॒ ni dvi॒tā | vī॒rasya॑ pṛtanā॒ṣaha॑: || ८ ||
वि दृ॒ळ्हानि॑ चिदद्रिवो॒ जना॑नां शचीपते । वृ॒ह मा॒या अ॑नानत ॥९॥
vi dṛ॒ḷhāni॑ cidadrivo॒ janā॑nāṃ śacīpate | vṛ॒ha mā॒yā a॑nānata || ९ ||
तमु॑ त्वा सत्य सोमपा॒ इन्द्र॑ वाजानां पते । अहू॑महि श्रव॒स्यव॑: ॥१०॥
tamu॑ tvā satya somapā॒ indra॑ vājānāṃ pate | ahū॑mahi śrava॒syava॑: || १० ||
तमु॑ त्वा॒ यः पु॒रासि॑थ॒ यो वा॑ नू॒नं हि॒ते धने॑ । हव्य॒: स श्रु॑धी॒ हव॑म् ॥११॥
tamu॑ tvā॒ yaḥ pu॒rāsi॑tha॒ yo vā॑ nū॒naṃ hi॒te dhane॑ | havya॒: sa śru॑dhī॒ hava॑m || ११ ||
धी॒भिरर्व॑द्भि॒रर्व॑तो॒ वाजाँ॑ इन्द्र श्र॒वाय्या॑न् । त्वया॑ जेष्म हि॒तं धन॑म् ॥१२॥
dhī॒bhirarva॑dbhi॒rarva॑to॒ vājām̐॑ indra śra॒vāyyā॑n | tvayā॑ jeṣma hi॒taṃ dhana॑m || १२ ||
अभू॑रु वीर गिर्वणो म॒हाँ इ॑न्द्र॒ धने॑ हि॒ते । भरे॑ वितन्त॒साय्य॑: ॥१३॥
abhū॑ru vīra girvaṇo ma॒hām̐ i॑ndra॒ dhane॑ hi॒te | bhare॑ vitanta॒sāyya॑: || १३ ||
या त॑ ऊ॒तिर॑मित्रहन्म॒क्षूज॑वस्त॒मास॑ति । तया॑ नो हिनुही॒ रथ॑म् ॥१४॥
yā ta॑ ū॒tira॑mitrahanma॒kṣūja॑vasta॒māsa॑ti | tayā॑ no hinuhī॒ ratha॑m || १४ ||
स रथे॑न र॒थीत॑मो॒ऽस्माके॑नाभि॒युग्व॑ना । जेषि॑ जिष्णो हि॒तं धन॑म् ॥१५॥
sa rathe॑na ra॒thīta॑mo॒’smāke॑nābhi॒yugva॑nā | jeṣi॑ jiṣṇo hi॒taṃ dhana॑m || १५ ||
य एक॒ इत्तमु॑ ष्टुहि कृष्टी॒नां विच॑र्षणिः । पति॑र्ज॒ज्ञे वृष॑क्रतुः ॥१६॥
ya eka॒ ittamu॑ ṣṭuhi kṛṣṭī॒nāṃ vica॑rṣaṇiḥ | pati॑rja॒jñe vṛṣa॑kratuḥ || १६ ||
यो गृ॑ण॒तामिदासि॑था॒ऽऽपिरू॒ती शि॒वः सखा॑ । स त्वं न॑ इन्द्र मृळय ॥१७॥
yo gṛ॑ṇa॒tāmidāsi॑thā॒’’pirū॒tī śi॒vaḥ sakhā॑ | sa tvaṃ na॑ indra mṛḷaya || १७ ||
धि॒ष्व वज्रं॒ गभ॑स्त्यो रक्षो॒हत्या॑य वज्रिवः । सा॒स॒ही॒ष्ठा अ॒भि स्पृध॑: ॥१८॥
dhi॒ṣva vajraṃ॒ gabha॑styo rakṣo॒hatyā॑ya vajrivaḥ | sā॒sa॒hī॒ṣṭhā a॒bhi spṛdha॑: || १८ ||
प्र॒त्नं र॑यी॒णां युजं॒ सखा॑यं कीरि॒चोद॑नम् । ब्रह्म॑वाहस्तमं हुवे ॥१९॥
pra॒tnaṃ ra॑yī॒ṇāṃ yujaṃ॒ sakhā॑yaṃ kīri॒coda॑nam | brahma॑vāhastamaṃ huve || १९ ||
स हि विश्वा॑नि॒ पार्थि॑वाँ॒ एको॒ वसू॑नि॒ पत्य॑ते । गिर्व॑णस्तमो॒ अध्रि॑गुः ॥२०॥
sa hi viśvā॑ni॒ pārthi॑vām॒̐ eko॒ vasū॑ni॒ patya॑te | girva॑ṇastamo॒ adhri॑guḥ || २० ||
स नो॑ नि॒युद्भि॒रा पृ॑ण॒ कामं॒ वाजे॑भिर॒श्विभि॑: । गोम॑द्भिर्गोपते धृ॒षत् ॥२१॥
sa no॑ ni॒yudbhi॒rā pṛ॑ṇa॒ kāmaṃ॒ vāje॑bhira॒śvibhi॑: | goma॑dbhirgopate dhṛ॒ṣat || २१ ||
तद्वो॑ गाय सु॒ते सचा॑ पुरुहू॒ताय॒ सत्व॑ने । शं यद्गवे॒ न शा॒किने॑ ॥२२॥
tadvo॑ gāya su॒te sacā॑ puruhū॒tāya॒ satva॑ne | śaṃ yadgave॒ na śā॒kine॑ || २२ ||
न घा॒ वसु॒र्नि य॑मते दा॒नं वाज॑स्य॒ गोम॑तः । यत्सी॒मुप॒ श्रव॒द्गिर॑: ॥२३॥
na ghā॒ vasu॒rni ya॑mate dā॒naṃ vāja॑sya॒ goma॑taḥ | yatsī॒mupa॒ śrava॒dgira॑: || २३ ||
कु॒वित्स॑स्य॒ प्र हि व्र॒जं गोम॑न्तं दस्यु॒हा गम॑त् । शची॑भि॒रप॑ नो वरत् ॥२४॥
ku॒vitsa॑sya॒ pra hi vra॒jaṃ goma॑ntaṃ dasyu॒hā gama॑t | śacī॑bhi॒rapa॑ no varat || २४ ||
इ॒मा उ॑ त्वा शतक्रतो॒ऽभि प्र णो॑नुवु॒र्गिर॑: । इन्द्र॑ व॒त्सं न मा॒तर॑: ॥२५॥
i॒mā u॑ tvā śatakrato॒’bhi pra ṇo॑nuvu॒rgira॑: | indra॑ va॒tsaṃ na mā॒tara॑: || २५ ||
दू॒णाशं॑ स॒ख्यं तव॒ गौर॑सि वीर गव्य॒ते । अश्वो॑ अश्वाय॒ते भ॑व ॥२६॥
dū॒ṇāśaṃ॑ sa॒khyaṃ tava॒ gaura॑si vīra gavya॒te | aśvo॑ aśvāya॒te bha॑va || २६ ||
स म॑न्दस्वा॒ ह्यन्ध॑सो॒ राध॑से त॒न्वा॑ म॒हे । न स्तो॒तारं॑ नि॒दे क॑रः ॥२७॥
sa ma॑ndasvā॒ hyandha॑so॒ rādha॑se ta॒nvā॑ ma॒he | na sto॒tāraṃ॑ ni॒de ka॑raḥ || २७ ||
इ॒मा उ॑ त्वा सु॒तेसु॑ते॒ नक्ष॑न्ते गिर्वणो॒ गिर॑: । व॒त्सं गावो॒ न धे॒नव॑: ॥२८॥
i॒mā u॑ tvā su॒tesu॑te॒ nakṣa॑nte girvaṇo॒ gira॑: | va॒tsaṃ gāvo॒ na dhe॒nava॑: || २८ ||
पु॒रू॒तमं॑ पुरू॒णां स्तो॑तॄ॒णां विवा॑चि । वाजे॑भिर्वाजय॒ताम् ॥२९॥
pu॒rū॒tamaṃ॑ purū॒ṇāṃ sto॑tṝ॒ṇāṃ vivā॑ci | vāje॑bhirvājaya॒tām || २९ ||
अ॒स्माक॑मिन्द्र भूतु ते॒ स्तोमो॒ वाहि॑ष्ठो॒ अन्त॑मः । अ॒स्मान्रा॒ये म॒हे हि॑नु ॥३०॥
a॒smāka॑mindra bhūtu te॒ stomo॒ vāhi॑ṣṭho॒ anta॑maḥ | a॒smānrā॒ye ma॒he hi॑nu || ३० ||
अधि॑ बृ॒बुः प॑णी॒नां वर्षि॑ष्ठे मू॒र्धन्न॑स्थात् । उ॒रुः कक्षो॒ न गा॒ङ्ग्यः ॥३१॥
adhi॑ bṛ॒buḥ pa॑ṇī॒nāṃ varṣi॑ṣṭhe mū॒rdhanna॑sthāt | u॒ruḥ kakṣo॒ na gā॒ṅgyaḥ || ३१ ||
यस्य॑ वा॒योरि॑व द्र॒वद्भ॒द्रा रा॒तिः स॑ह॒स्रिणी॑ । स॒द्यो दा॒नाय॒ मंह॑ते ॥३२॥
yasya॑ vā॒yori॑va dra॒vadbha॒drā rā॒tiḥ sa॑ha॒sriṇī॑ | sa॒dyo dā॒nāya॒ maṃha॑te || ३२ ||
तत्सु नो॒ विश्वे॑ अ॒र्य आ सदा॑ गृणन्ति का॒रव॑: । बृ॒बुं स॑हस्र॒दात॑मं सू॒रिं स॑हस्र॒सात॑मम् ॥३३॥
tatsu no॒ viśve॑ a॒rya ā sadā॑ gṛṇanti kā॒rava॑: | bṛ॒buṃ sa॑hasra॒dāta॑maṃ sū॒riṃ sa॑hasra॒sāta॑mam || ३३ ||