EeseDharmaSanātana Library
483मण्डल 6 · सूक्त 42
4 shlokप्रत्य॑स्मै॒ पिपी॑षते॒ विश्वा॑नि वि॒दुषे॑ भर । अ॒रं॒ग॒माय॒ जग्म॒येऽप॑श्चाद्दघ्वने॒ नरे॑ ॥१॥
pratya॑smai॒ pipī॑ṣate॒ viśvā॑ni vi॒duṣe॑ bhara | a॒raṃ॒ga॒māya॒ jagma॒ye’pa॑ścāddaghvane॒ nare॑ || १ ||
एमे॑नं प्र॒त्येत॑न॒ सोमे॑भिः सोम॒पात॑मम् । अम॑त्रेभिर्ॠजी॒षिण॒मिन्द्रं॑ सु॒तेभि॒रिन्दु॑भिः ॥२॥
eme॑naṃ pra॒tyeta॑na॒ some॑bhiḥ soma॒pāta॑mam | ama॑trebhirṝjī॒ṣiṇa॒mindraṃ॑ su॒tebhi॒rindu॑bhiḥ || २ ||
यदी॑ सु॒तेभि॒रिन्दु॑भि॒: सोमे॑भिः प्रति॒भूष॑थ । वेदा॒ विश्व॑स्य॒ मेधि॑रो धृ॒षत्तंत॒मिदेष॑ते ॥३॥
yadī॑ su॒tebhi॒rindu॑bhi॒: some॑bhiḥ prati॒bhūṣa॑tha | vedā॒ viśva॑sya॒ medhi॑ro dhṛ॒ṣattaṃta॒mideṣa॑te || ३ ||
अ॒स्माअ॑स्मा॒ इदन्ध॒सोऽध्व॑र्यो॒ प्र भ॑रा सु॒तम् । कु॒वित्स॑मस्य॒ जेन्य॑स्य॒ शर्ध॑तो॒ऽभिश॑स्तेरव॒स्पर॑त् ॥४॥
a॒smāa॑smā॒ idandha॒so’dhva॑ryo॒ pra bha॑rā su॒tam | ku॒vitsa॑masya॒ jenya॑sya॒ śardha॑to॒’bhiśa॑sterava॒spara॑t || ४ ||