EeseDharmaSanātana Library
482मण्डल 6 · सूक्त 41
5 shlokअहे॑ळमान॒ उप॑ याहि य॒ज्ञं तुभ्यं॑ पवन्त॒ इन्द॑वः सु॒तास॑: ।
गावो॒ न व॑ज्रि॒न्त्स्वमोको॒ अच्छेन्द्रा ग॑हि प्रथ॒मो य॒ज्ञिया॑नाम् ॥१॥
ahe॑ḷamāna॒ upa॑ yāhi ya॒jñaṃ tubhyaṃ॑ pavanta॒ inda॑vaḥ su॒tāsa॑: | gāvo॒ na va॑jri॒ntsvamoko॒ acchendrā ga॑hi pratha॒mo ya॒jñiyā॑nām || १ ||
या ते॑ का॒कुत्सुकृ॑ता॒ या वरि॑ष्ठा॒ यया॒ शश्व॒त्पिब॑सि॒ मध्व॑ ऊ॒र्मिम् ।
तया॑ पाहि॒ प्र ते॑ अध्व॒र्युर॑स्था॒त्सं ते॒ वज्रो॑ वर्ततामिन्द्र ग॒व्युः ॥२॥
yā te॑ kā॒kutsukṛ॑tā॒ yā vari॑ṣṭhā॒ yayā॒ śaśva॒tpiba॑si॒ madhva॑ ū॒rmim | tayā॑ pāhi॒ pra te॑ adhva॒ryura॑sthā॒tsaṃ te॒ vajro॑ vartatāmindra ga॒vyuḥ || २ ||
ए॒ष द्र॒प्सो वृ॑ष॒भो वि॒श्वरू॑प॒ इन्द्रा॑य॒ वृष्णे॒ सम॑कारि॒ सोम॑: ।
ए॒तं पि॑ब हरिवः स्थातरुग्र॒ यस्येशि॑षे प्र॒दिवि॒ यस्ते॒ अन्न॑म् ॥३॥
e॒ṣa dra॒pso vṛ॑ṣa॒bho vi॒śvarū॑pa॒ indrā॑ya॒ vṛṣṇe॒ sama॑kāri॒ soma॑: | e॒taṃ pi॑ba harivaḥ sthātarugra॒ yasyeśi॑ṣe pra॒divi॒ yaste॒ anna॑m || ३ ||
सु॒तः सोमो॒ असु॑तादिन्द्र॒ वस्या॑न॒यं श्रेया॑ञ्चिकि॒तुषे॒ रणा॑य ।
ए॒तं ति॑तिर्व॒ उप॑ याहि य॒ज्ञं तेन॒ विश्वा॒स्तवि॑षी॒रा पृ॑णस्व ॥४॥
su॒taḥ somo॒ asu॑tādindra॒ vasyā॑na॒yaṃ śreyā॑ñciki॒tuṣe॒ raṇā॑ya | e॒taṃ ti॑tirva॒ upa॑ yāhi ya॒jñaṃ tena॒ viśvā॒stavi॑ṣī॒rā pṛ॑ṇasva || ४ ||
ह्वया॑मसि॒ त्वेन्द्र॑ याह्य॒र्वाङरं॑ ते॒ सोम॑स्त॒न्वे॑ भवाति ।
शत॑क्रतो मा॒दय॑स्वा सु॒तेषु॒ प्रास्माँ अ॑व॒ पृत॑नासु॒ प्र वि॒क्षु ॥५॥
hvayā॑masi॒ tvendra॑ yāhya॒rvāṅaraṃ॑ te॒ soma॑sta॒nve॑ bhavāti | śata॑krato mā॒daya॑svā su॒teṣu॒ prāsmām̐ a॑va॒ pṛta॑nāsu॒ pra vi॒kṣu || ५ ||