EeseDharmaSanātana Library
479मण्डल 6 · सूक्त 38
5 shlokअपा॑दि॒त उदु॑ नश्चि॒त्रत॑मो म॒हीं भ॑र्षद्द्यु॒मती॒मिन्द्र॑हूतिम् ।
पन्य॑सीं धी॒तिं दैव्य॑स्य॒ याम॒ञ्जन॑स्य रा॒तिं व॑नते सु॒दानु॑: ॥१॥
apā॑di॒ta udu॑ naści॒trata॑mo ma॒hīṃ bha॑rṣaddyu॒matī॒mindra॑hūtim | panya॑sīṃ dhī॒tiṃ daivya॑sya॒ yāma॒ñjana॑sya rā॒tiṃ va॑nate su॒dānu॑: || १ ||
दू॒राच्चि॒दा व॑सतो अस्य॒ कर्णा॒ घोषा॒दिन्द्र॑स्य तन्यति ब्रुवा॒णः ।
एयमे॑नं दे॒वहू॑तिर्ववृत्यान्म॒द्र्य१गिन्द्र॑मि॒यमृ॒च्यमा॑ना ॥२॥
dū॒rācci॒dā va॑sato asya॒ karṇā॒ ghoṣā॒dindra॑sya tanyati bruvā॒ṇaḥ | eyame॑naṃ de॒vahū॑tirvavṛtyānma॒drya१gindra॑mi॒yamṛ॒cyamā॑nā || २ ||
तं वो॑ धि॒या प॑र॒मया॑ पुरा॒जाम॒जर॒मिन्द्र॑म॒भ्य॑नूष्य॒र्कैः ।
ब्रह्मा॑ च॒ गिरो॑ दधि॒रे सम॑स्मिन्म॒हाँश्च॒ स्तोमो॒ अधि॑ वर्ध॒दिन्द्रे॑ ॥३॥
taṃ vo॑ dhi॒yā pa॑ra॒mayā॑ purā॒jāma॒jara॒mindra॑ma॒bhya॑nūṣya॒rkaiḥ | brahmā॑ ca॒ giro॑ dadhi॒re sama॑sminma॒hām̐śca॒ stomo॒ adhi॑ vardha॒dindre॑ || ३ ||
वर्धा॒द्यं य॒ज्ञ उ॒त सोम॒ इन्द्रं॒ वर्धा॒द्ब्रह्म॒ गिर॑ उ॒क्था च॒ मन्म॑ ।
वर्धाहै॑नमु॒षसो॒ याम॑न्न॒क्तोर्वर्धा॒न्मासा॑: श॒रदो॒ द्याव॒ इन्द्र॑म् ॥४॥
vardhā॒dyaṃ ya॒jña u॒ta soma॒ indraṃ॒ vardhā॒dbrahma॒ gira॑ u॒kthā ca॒ manma॑ | vardhāhai॑namu॒ṣaso॒ yāma॑nna॒ktorvardhā॒nmāsā॑: śa॒rado॒ dyāva॒ indra॑m || ४ ||
ए॒वा ज॑ज्ञा॒नं सह॑से॒ असा॑मि वावृधा॒नं राध॑से च श्रु॒ताय॑ ।
म॒हामु॒ग्रमव॑से विप्र नू॒नमा वि॑वासेम वृत्र॒तूर्ये॑षु ॥५॥
e॒vā ja॑jñā॒naṃ saha॑se॒ asā॑mi vāvṛdhā॒naṃ rādha॑se ca śru॒tāya॑ | ma॒hāmu॒gramava॑se vipra nū॒namā vi॑vāsema vṛtra॒tūrye॑ṣu || ५ ||