EeseDharmaSanātana Library
472मण्डल 6 · सूक्त 31
5 shlokइन्द्र: । त्रिष्टुप् ,४ शक्वरी ।
अभू॒रेको॑ रयिपते रयी॒णामा हस्त॑योरधिथा इन्द्र कृ॒ष्टीः ।
वि तो॒के अ॒प्सु तन॑ये च॒ सूरेऽवो॑चन्त चर्ष॒णयो॒ विवा॑चः ॥१॥
indra: | triṣṭup ,४ śakvarī | abhū॒reko॑ rayipate rayī॒ṇāmā hasta॑yoradhithā indra kṛ॒ṣṭīḥ | vi to॒ke a॒psu tana॑ye ca॒ sūre’vo॑canta carṣa॒ṇayo॒ vivā॑caḥ || १ ||
त्वद्भि॒येन्द्र॒ पार्थि॑वानि॒ विश्वाच्यु॑ता चिच्च्यावयन्ते॒ रजां॑सि ।
द्यावा॒क्षामा॒ पर्व॑तासो॒ वना॑नि॒ विश्वं॑ दृ॒ळ्हं भ॑यते॒ अज्म॒न्ना ते॑ ॥२॥
tvadbhi॒yendra॒ pārthi॑vāni॒ viśvācyu॑tā ciccyāvayante॒ rajāṃ॑si | dyāvā॒kṣāmā॒ parva॑tāso॒ vanā॑ni॒ viśvaṃ॑ dṛ॒ḷhaṃ bha॑yate॒ ajma॒nnā te॑ || २ ||
त्वं कुत्से॑ना॒भि शुष्ण॑मिन्द्रा॒शुषं॑ युध्य॒ कुय॑वं॒ गवि॑ष्टौ ।
दश॑ प्रपि॒त्वे अध॒ सूर्य॑स्य मुषा॒यश्च॒क्रमवि॑वे॒ रपां॑सि ॥३॥
tvaṃ kutse॑nā॒bhi śuṣṇa॑mindrā॒śuṣaṃ॑ yudhya॒ kuya॑vaṃ॒ gavi॑ṣṭau | daśa॑ prapi॒tve adha॒ sūrya॑sya muṣā॒yaśca॒kramavi॑ve॒ rapāṃ॑si || ३ ||
त्वं श॒तान्यव॒ शम्ब॑रस्य॒ पुरो॑ जघन्थाप्र॒तीनि॒ दस्यो॑: ।
अशि॑क्षो॒ यत्र॒ शच्या॑ शचीवो॒ दिवो॑दासाय सुन्व॒ते सु॑तक्रे भ॒रद्वा॑जाय गृण॒ते वसू॑नि ॥४॥
tvaṃ śa॒tānyava॒ śamba॑rasya॒ puro॑ jaghanthāpra॒tīni॒ dasyo॑: | aśi॑kṣo॒ yatra॒ śacyā॑ śacīvo॒ divo॑dāsāya sunva॒te su॑takre bha॒radvā॑jāya gṛṇa॒te vasū॑ni || ४ ||
स स॑त्यसत्वन्मह॒ते रणा॑य॒ रथ॒मा ति॑ष्ठ तुविनृम्ण भी॒मम् ।
या॒हि प्र॑पथि॒न्नव॒सोप॑ म॒द्रिक्प्र च॑ श्रुत श्रावय चर्ष॒णिभ्य॑: ॥५॥
sa sa॑tyasatvanmaha॒te raṇā॑ya॒ ratha॒mā ti॑ṣṭha tuvinṛmṇa bhī॒mam | yā॒hi pra॑pathi॒nnava॒sopa॑ ma॒drikpra ca॑ śruta śrāvaya carṣa॒ṇibhya॑: || ५ ||