EeseDharmaSanātana Library
471मण्डल 6 · सूक्त 30
5 shlokभूय॒ इद्वा॑वृधे वी॒र्या॑यँ॒ एको॑ अजु॒र्यो द॑यते॒ वसू॑नि ।
प्र रि॑रिचे दि॒व इन्द्र॑: पृथि॒व्या अ॒र्धमिद॑स्य॒ प्रति॒ रोद॑सी उ॒भे ॥१॥
bhūya॒ idvā॑vṛdhe vī॒ryā॑yam॒̐ eko॑ aju॒ryo da॑yate॒ vasū॑ni | pra ri॑rice di॒va indra॑: pṛthi॒vyā a॒rdhamida॑sya॒ prati॒ roda॑sī u॒bhe || १ ||
अधा॑ मन्ये बृ॒हद॑सु॒र्य॑मस्य॒ यानि॑ दा॒धार॒ नकि॒रा मि॑नाति ।
दि॒वेदि॑वे॒ सूर्यो॑ दर्श॒तो भू॒द्वि सद्मा॑न्युर्वि॒या सु॒क्रतु॑र्धात् ॥२॥
adhā॑ manye bṛ॒hada॑su॒rya॑masya॒ yāni॑ dā॒dhāra॒ naki॒rā mi॑nāti | di॒vedi॑ve॒ sūryo॑ darśa॒to bhū॒dvi sadmā॑nyurvi॒yā su॒kratu॑rdhāt || २ ||
अ॒द्या चि॒न्नू चि॒त्तदपो॑ न॒दीनां॒ यदा॑भ्यो॒ अर॑दो गा॒तुमि॑न्द्र ।
नि पर्व॑ता अद्म॒सदो॒ न से॑दु॒स्त्वया॑ दृ॒ळ्हानि॑ सुक्रतो॒ रजां॑सि ॥३॥
a॒dyā ci॒nnū ci॒ttadapo॑ na॒dīnāṃ॒ yadā॑bhyo॒ ara॑do gā॒tumi॑ndra | ni parva॑tā adma॒sado॒ na se॑du॒stvayā॑ dṛ॒ḷhāni॑ sukrato॒ rajāṃ॑si || ३ ||
स॒त्यमित्तन्न त्वावाँ॑ अ॒न्यो अ॒स्तीन्द्र॑ दे॒वो न मर्त्यो॒ ज्याया॑न् ।
अह॒न्नहिं॑ परि॒शया॑न॒मर्णोऽवा॑सृजो अ॒पो अच्छा॑ समु॒द्रम् ॥४॥
sa॒tyamittanna tvāvām̐॑ a॒nyo a॒stīndra॑ de॒vo na martyo॒ jyāyā॑n | aha॒nnahiṃ॑ pari॒śayā॑na॒marṇo’vā॑sṛjo a॒po acchā॑ samu॒dram || ४ ||
त्वम॒पो वि दुरो॒ विषू॑ची॒रिन्द्र॑ दृ॒ळ्हम॑रुज॒: पर्व॑तस्य ।
राजा॑भवो॒ जग॑तश्चर्षणी॒नां सा॒कं सूर्यं॑ ज॒नय॒न्द्यामु॒षास॑म् ॥५॥
tvama॒po vi duro॒ viṣū॑cī॒rindra॑ dṛ॒ḷhama॑ruja॒: parva॑tasya | rājā॑bhavo॒ jaga॑taścarṣaṇī॒nāṃ sā॒kaṃ sūryaṃ॑ ja॒naya॒ndyāmu॒ṣāsa॑m || ५ ||