EeseDharmaSanātana Library
470मण्डल 6 · सूक्त 29
6 shlokइन्द्रं॑ वो॒ नर॑: स॒ख्याय॑ सेपुर्म॒हो यन्त॑: सुम॒तये॑ चका॒नाः ।
म॒हो हि दा॒ता वज्र॑हस्तो॒ अस्ति॑ म॒हामु॑ र॒ण्वमव॑से यजध्वम् ॥१॥
indraṃ॑ vo॒ nara॑: sa॒khyāya॑ sepurma॒ho yanta॑: suma॒taye॑ cakā॒nāḥ | ma॒ho hi dā॒tā vajra॑hasto॒ asti॑ ma॒hāmu॑ ra॒ṇvamava॑se yajadhvam || १ ||
आ यस्मि॒न्हस्ते॒ नर्या॑ मिमि॒क्षुरा रथे॑ हिर॒ण्यये॑ रथे॒ष्ठाः ।
आ र॒श्मयो॒ गभ॑स्त्योः स्थू॒रयो॒राध्व॒न्नश्वा॑सो॒ वृष॑णो युजा॒नाः ॥२॥
ā yasmi॒nhaste॒ naryā॑ mimi॒kṣurā rathe॑ hira॒ṇyaye॑ rathe॒ṣṭhāḥ | ā ra॒śmayo॒ gabha॑styoḥ sthū॒rayo॒rādhva॒nnaśvā॑so॒ vṛṣa॑ṇo yujā॒nāḥ || २ ||
श्रि॒ये ते॒ पादा॒ दुव॒ आ मि॑मिक्षुर्धृ॒ष्णुर्व॒ज्री शव॑सा॒ दक्षि॑णावान् ।
वसा॑नो॒ अत्कं॑ सुर॒भिं दृ॒शे कं स्व१र्ण नृ॑तविषि॒रो ब॑भूथ ॥३॥
śri॒ye te॒ pādā॒ duva॒ ā mi॑mikṣurdhṛ॒ṣṇurva॒jrī śava॑sā॒ dakṣi॑ṇāvān | vasā॑no॒ atkaṃ॑ sura॒bhiṃ dṛ॒śe kaṃ sva१rṇa nṛ॑taviṣi॒ro ba॑bhūtha || ३ ||
स सोम॒ आमि॑श्लतमः सु॒तो भू॒द्यस्मि॑न्प॒क्तिः प॒च्यते॒ सन्ति॑ धा॒नाः ।
इन्द्रं॒ नर॑: स्तु॒वन्तो॑ ब्रह्मका॒रा उ॒क्था शंस॑न्तो दे॒ववा॑ततमाः ॥४॥
sa soma॒ āmi॑ślatamaḥ su॒to bhū॒dyasmi॑npa॒ktiḥ pa॒cyate॒ santi॑ dhā॒nāḥ | indraṃ॒ nara॑: stu॒vanto॑ brahmakā॒rā u॒kthā śaṃsa॑nto de॒vavā॑tatamāḥ || ४ ||
न ते॒ अन्त॒: शव॑सो धाय्य॒स्य वि तु बा॑बधे॒ रोद॑सी महि॒त्वा ।
आ ता सू॒रिः पृ॑णति॒ तूतु॑जानो यू॒थेवा॒प्सु स॒मीज॑मान ऊ॒ती ॥५॥
na te॒ anta॒: śava॑so dhāyya॒sya vi tu bā॑badhe॒ roda॑sī mahi॒tvā | ā tā sū॒riḥ pṛ॑ṇati॒ tūtu॑jāno yū॒thevā॒psu sa॒mīja॑māna ū॒tī || ५ ||
ए॒वेदिन्द्र॑: सु॒हव॑ ऋ॒ष्वो अ॑स्तू॒ती अनू॑ती हिरिशि॒प्रः सत्वा॑ ।
ए॒वा हि जा॒तो अस॑मात्योजाः पु॒रू च॑ वृ॒त्रा ह॑नति॒ नि दस्यू॑न् ॥६॥
e॒vedindra॑: su॒hava॑ ṛ॒ṣvo a॑stū॒tī anū॑tī hiriśi॒praḥ satvā॑ | e॒vā hi jā॒to asa॑mātyojāḥ pu॒rū ca॑ vṛ॒trā ha॑nati॒ ni dasyū॑n || ६ ||