EeseDharmaSanātana Library
466मण्डल 6 · सूक्त 25
9 shlokया त॑ ऊ॒तिर॑व॒मा या प॑र॒मा या म॑ध्य॒मेन्द्र॑ शुष्मि॒न्नस्ति॑ ।
ताभि॑रू॒ षु वृ॑त्र॒हत्ये॑ऽवीर्न ए॒भिश्च॒ वाजै॑र्म॒हान् न॑ उग्र ॥१॥
yā ta॑ ū॒tira॑va॒mā yā pa॑ra॒mā yā ma॑dhya॒mendra॑ śuṣmi॒nnasti॑ | tābhi॑rū॒ ṣu vṛ॑tra॒hatye॑’vīrna e॒bhiśca॒ vājai॑rma॒hān na॑ ugra || १ ||
आभि॒: स्पृधो॑ मिथ॒तीररि॑षण्यन्न॒मित्र॑स्य व्यथया म॒न्युमि॑न्द्र ।
आभि॒र्विश्वा॑ अभि॒युजो॒ विषू॑ची॒रार्या॑य॒ विशोऽव॑ तारी॒र्दासी॑: ॥२॥
ābhi॒: spṛdho॑ mitha॒tīrari॑ṣaṇyanna॒mitra॑sya vyathayā ma॒nyumi॑ndra | ābhi॒rviśvā॑ abhi॒yujo॒ viṣū॑cī॒rāryā॑ya॒ viśo’va॑ tārī॒rdāsī॑: || २ ||
इन्द्र॑ जा॒मय॑ उ॒त येऽजा॑मयोऽर्वाची॒नासो॑ व॒नुषो॑ युयु॒ज्रे ।
त्वमे॑षां विथु॒रा शवां॑सि ज॒हि वृष्ण्या॑नि कृणु॒ही परा॑चः ॥३॥
indra॑ jā॒maya॑ u॒ta ye’jā॑mayo’rvācī॒nāso॑ va॒nuṣo॑ yuyu॒jre | tvame॑ṣāṃ vithu॒rā śavāṃ॑si ja॒hi vṛṣṇyā॑ni kṛṇu॒hī parā॑caḥ || ३ ||
शूरो॑ वा॒ शूरं॑ वनते॒ शरी॑रैस्तनू॒रुचा॒ तरु॑षि॒ यत् कृ॒ण्वैते॑ ।
तो॒के वा॒ गोषु॒ तन॑ये॒ यद॒प्सु वि क्रन्द॑सी उ॒र्वरा॑सु॒ ब्रवै॑ते ॥४॥
śūro॑ vā॒ śūraṃ॑ vanate॒ śarī॑raistanū॒rucā॒ taru॑ṣi॒ yat kṛ॒ṇvaite॑ | to॒ke vā॒ goṣu॒ tana॑ye॒ yada॒psu vi kranda॑sī u॒rvarā॑su॒ bravai॑te || ४ ||
न॒हि त्वा॒ शूरो॒ न तु॒रो न धृ॒ष्णुर्न त्वा॑ यो॒धो मन्य॑मानो यु॒योध॑ ।
इन्द्र॒ नकि॑ष्ट्वा॒ प्रत्य॑स्त्येषां॒ विश्वा॑ जा॒तान्य॒भ्य॑सि॒ तानि॑ ॥५॥
na॒hi tvā॒ śūro॒ na tu॒ro na dhṛ॒ṣṇurna tvā॑ yo॒dho manya॑māno yu॒yodha॑ | indra॒ naki॑ṣṭvā॒ pratya॑styeṣāṃ॒ viśvā॑ jā॒tānya॒bhya॑si॒ tāni॑ || ५ ||
स प॑त्यत उ॒भयो॑र्नृ॒म्णम॒योर्यदी॑ वे॒धस॑: समि॒थे हव॑न्ते ।
वृ॒त्रे वा॑ म॒हो नृ॒वति॒ क्षये॑ वा॒ व्यच॑स्वन्ता॒ यदि॑ वितन्त॒सैते॑ ॥६॥
sa pa॑tyata u॒bhayo॑rnṛ॒mṇama॒yoryadī॑ ve॒dhasa॑: sami॒the hava॑nte | vṛ॒tre vā॑ ma॒ho nṛ॒vati॒ kṣaye॑ vā॒ vyaca॑svantā॒ yadi॑ vitanta॒saite॑ || ६ ||
अध॑ स्मा ते चर्ष॒णयो॒ यदेजा॒निन्द्र॑ त्रा॒तोत भ॑वा वरू॒ता ।
अ॒स्माका॑सो॒ ये नृत॑मासो अ॒र्य इन्द्र॑ सू॒रयो॑ दधि॒रे पु॒रो न॑: ॥७॥
adha॑ smā te carṣa॒ṇayo॒ yadejā॒nindra॑ trā॒tota bha॑vā varū॒tā | a॒smākā॑so॒ ye nṛta॑māso a॒rya indra॑ sū॒rayo॑ dadhi॒re pu॒ro na॑: || ७ ||
अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये॑ ।
अनु॑ क्ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये॑ ॥८॥
anu॑ te dāyi ma॒ha i॑ndri॒yāya॑ sa॒trā te॒ viśva॒manu॑ vṛtra॒hatye॑ | anu॑ kṣa॒tramanu॒ saho॑ yaja॒trendra॑ de॒vebhi॒ranu॑ te nṛ॒ṣahye॑ || ८ ||
ए॒वा न॒: स्पृध॒: सम॑जा स॒मत्स्विन्द्र॑ रार॒न्धि मि॑थ॒तीरदे॑वीः ।
वि॒द्याम॒ वस्तो॒रव॑सा गृ॒णन्तो॑ भ॒रद्वा॑जा उ॒त त॑ इन्द्र नू॒नम् ॥९॥
e॒vā na॒: spṛdha॒: sama॑jā sa॒matsvindra॑ rāra॒ndhi mi॑tha॒tīrade॑vīḥ | vi॒dyāma॒ vasto॒rava॑sā gṛ॒ṇanto॑ bha॒radvā॑jā u॒ta ta॑ indra nū॒nam || ९ ||