EeseDharmaSanātana Library
443मण्डल 6 · सूक्त 2
11 shlokत्वं हि क्षैत॑व॒द् यशो ऽग्ने॑ मि॒त्रो न पत्य॑से । त्वं वि॑चर्षणे॒ श्रवो॒ वसो॑ पु॒ष्टिं न पु॑ष्यसि ॥१॥
tvaṃ hi kṣaita॑va॒d yaśo ’gne॑ mi॒tro na patya॑se | tvaṃ vi॑carṣaṇe॒ śravo॒ vaso॑ pu॒ṣṭiṃ na pu॑ṣyasi || १ ||
त्वां हि ष्मा॑ चर्ष॒णयो॑ य॒ज्ञेभि॑र्गी॒र्भिरीळ॑ते । त्वां वा॒जी या॑त्यवृ॒को र॑ज॒स्तूर्वि॒श्वच॑र्षणिः ॥२॥
tvāṃ hi ṣmā॑ carṣa॒ṇayo॑ ya॒jñebhi॑rgī॒rbhirīḷa॑te | tvāṃ vā॒jī yā॑tyavṛ॒ko ra॑ja॒stūrvi॒śvaca॑rṣaṇiḥ || २ ||
स॒जोष॑स्त्वा दि॒वो नरो॑ य॒ज्ञस्य॑ के॒तुमि॑न्धते । यद्ध॒ स्य मानु॑षो॒ जन॑: सुम्ना॒युर्जु॒ह्वे अ॑ध्व॒रे ॥३॥
sa॒joṣa॑stvā di॒vo naro॑ ya॒jñasya॑ ke॒tumi॑ndhate | yaddha॒ sya mānu॑ṣo॒ jana॑: sumnā॒yurju॒hve a॑dhva॒re || ३ ||
ऋध॒द् यस्ते॑ सु॒दान॑वे धि॒या मर्त॑: श॒शम॑ते । ऊ॒ती ष बृ॑ह॒तो दि॒वो द्वि॒षो अंहो॒ न त॑रति ॥४॥
ṛdha॒d yaste॑ su॒dāna॑ve dhi॒yā marta॑: śa॒śama॑te | ū॒tī ṣa bṛ॑ha॒to di॒vo dvi॒ṣo aṃho॒ na ta॑rati || ४ ||
स॒मिधा॒ यस्त॒ आहु॑तिं॒ निशि॑तिं॒ मर्त्यो॒ नश॑त् । व॒याव॑न्तं॒ स पु॑ष्यति॒ क्षय॑मग्ने श॒तायु॑षम् ॥५॥
sa॒midhā॒ yasta॒ āhu॑tiṃ॒ niśi॑tiṃ॒ martyo॒ naśa॑t | va॒yāva॑ntaṃ॒ sa pu॑ṣyati॒ kṣaya॑magne śa॒tāyu॑ṣam || ५ ||
त्वे॒षस्ते॑ धू॒म ऋ॑ण्वति दि॒वि षञ्छु॒क्र आत॑तः । सूरो॒ न हि द्यु॒ता त्वं कृ॒पा पा॑वक॒ रोच॑से ॥६॥
tve॒ṣaste॑ dhū॒ma ṛ॑ṇvati di॒vi ṣañchu॒kra āta॑taḥ | sūro॒ na hi dyu॒tā tvaṃ kṛ॒pā pā॑vaka॒ roca॑se || ६ ||
अधा॒ हि वि॒क्ष्वीड्यो ऽसि॑ प्रि॒यो नो॒ अति॑थिः । र॒ण्वः पु॒री॑व॒ जूर्य॑: सू॒नुर्न त्र॑य॒याय्य॑: ॥७॥
adhā॒ hi vi॒kṣvīḍyo ’si॑ pri॒yo no॒ ati॑thiḥ | ra॒ṇvaḥ pu॒rī॑va॒ jūrya॑: sū॒nurna tra॑ya॒yāyya॑: || ७ ||
क्रत्वा॒ हि द्रोणे॑ अ॒ज्यसे ऽग्ने॑ वा॒जी न कृत्व्य॑: । परि॑ज्मेव स्व॒धा गयो ऽत्यो॒ न ह्वा॒र्यः शिशु॑: ॥८॥
kratvā॒ hi droṇe॑ a॒jyase ’gne॑ vā॒jī na kṛtvya॑: | pari॑jmeva sva॒dhā gayo ’tyo॒ na hvā॒ryaḥ śiśu॑: || ८ ||
त्वं त्या चि॒दच्यु॒ता ऽग्ने॑ प॒शुर्न यव॑से । धामा॑ ह॒ यत् ते॑ अजर॒ वना॑ वृ॒श्चन्ति॒ शिक्व॑सः ॥९॥
tvaṃ tyā ci॒dacyu॒tā ’gne॑ pa॒śurna yava॑se | dhāmā॑ ha॒ yat te॑ ajara॒ vanā॑ vṛ॒ścanti॒ śikva॑saḥ || ९ ||
वेषि॒ ह्य॑ध्वरीय॒तामग्ने॒ होता॒ दमे॑ वि॒शां । स॒मृधो॑ विश्पते कृणु जु॒षस्व॑ ह॒व्यम॑ङ्गिरः ॥१०॥
veṣi॒ hya॑dhvarīya॒tāmagne॒ hotā॒ dame॑ vi॒śāṃ | sa॒mṛdho॑ viśpate kṛṇu ju॒ṣasva॑ ha॒vyama॑ṅgiraḥ || १० ||
अच्छा॑ नो मित्रमहो देव दे॒वानग्ने॒ वोच॑: सुम॒तिं रोद॑स्योः । वी॒हि स्व॒स्तिं सु॑क्षि॒तिं दि॒वो नॄन् द्वि॒षो अंहां॑सि दुरि॒ता त॑रेम॒ ता त॑रेम॒ तवाव॑सा तरेम ॥११॥
acchā॑ no mitramaho deva de॒vānagne॒ voca॑: suma॒tiṃ roda॑syoḥ | vī॒hi sva॒stiṃ su॑kṣi॒tiṃ di॒vo nṝn dvi॒ṣo aṃhāṃ॑si duri॒tā ta॑rema॒ tā ta॑rema॒ tavāva॑sā tarema || ११ ||