EeseDharmaSanātana Library
460मण्डल 6 · सूक्त 19
13 shlokम॒हाँ इन्द्रो॑ नृ॒वदा च॑र्षणि॒प्रा उ॒त द्वि॒बर्हा॑ अमि॒नः सहो॑भिः ।
अ॒स्म॒द्र्य॑ग्वावृधे वी॒र्या॑यो॒रुः पृ॒थुः सुकृ॑तः क॒र्तृभि॑र्भूत् ॥१॥
ma॒hām̐ indro॑ nṛ॒vadā ca॑rṣaṇi॒prā u॒ta dvi॒barhā॑ ami॒naḥ saho॑bhiḥ | a॒sma॒drya॑gvāvṛdhe vī॒ryā॑yo॒ruḥ pṛ॒thuḥ sukṛ॑taḥ ka॒rtṛbhi॑rbhūt || १ ||
इन्द्र॑मे॒व धि॒षणा॑ सा॒तये॑ धाद् बृ॒हन्त॑मृ॒ष्वम॒जरं॒ युवा॑नम् ।
अषा॑ळ्हेन॒ शव॑सा शूशु॒वांसं॑ स॒द्यश्चि॒द् यो वा॑वृ॒धे असा॑मि ॥२॥
indra॑me॒va dhi॒ṣaṇā॑ sā॒taye॑ dhād bṛ॒hanta॑mṛ॒ṣvama॒jaraṃ॒ yuvā॑nam | aṣā॑ḷhena॒ śava॑sā śūśu॒vāṃsaṃ॑ sa॒dyaści॒d yo vā॑vṛ॒dhe asā॑mi || २ ||
पृ॒थू क॒रस्ना॑ बहु॒ला गभ॑स्ती अस्म॒द्र्य१क् सं मि॑मीहि॒ श्रवां॑सि ।
यू॒थेव॑ प॒श्वः प॑शु॒पा दमू॑ना अ॒स्माँ इ॑न्द्रा॒भ्या व॑वृत्स्वा॒जौ ॥३॥
pṛ॒thū ka॒rasnā॑ bahu॒lā gabha॑stī asma॒drya१k saṃ mi॑mīhi॒ śravāṃ॑si | yū॒theva॑ pa॒śvaḥ pa॑śu॒pā damū॑nā a॒smām̐ i॑ndrā॒bhyā va॑vṛtsvā॒jau || ३ ||
तं व॒ इन्द्रं॑ च॒तिन॑मस्य शा॒कैरि॒ह नू॒नं वा॑ज॒यन्तो॑ हुवेम ।
यथा॑ चि॒त् पूर्वे॑ जरि॒तार॑ आ॒सुरने॑द्या अनव॒द्या अरि॑ष्टाः ॥४॥
taṃ va॒ indraṃ॑ ca॒tina॑masya śā॒kairi॒ha nū॒naṃ vā॑ja॒yanto॑ huvema | yathā॑ ci॒t pūrve॑ jari॒tāra॑ ā॒surane॑dyā anava॒dyā ari॑ṣṭāḥ || ४ ||
धृ॒तव्र॑तो धन॒दाः सोम॑वृद्ध॒: स हि वा॒मस्य॒ वसु॑नः पुरु॒क्षुः ।
सं ज॑ग्मिरे प॒थ्या॒३ रायो॑ अस्मिन् त्समु॒द्रे न सिन्ध॑वो॒ याद॑मानाः ॥५॥
dhṛ॒tavra॑to dhana॒dāḥ soma॑vṛddha॒: sa hi vā॒masya॒ vasu॑naḥ puru॒kṣuḥ | saṃ ja॑gmire pa॒thyā॒३ rāyo॑ asmin tsamu॒dre na sindha॑vo॒ yāda॑mānāḥ || ५ ||
शवि॑ष्ठं न॒ आ भ॑र शूर॒ शव॒ ओजि॑ष्ठ॒मोजो॑ अभिभूत उ॒ग्रम् ।
विश्वा॑ द्यु॒म्ना वृष्ण्या॒ मानु॑षाणाम॒स्मभ्यं॑ दा हरिवो माद॒यध्यै॑ ॥६॥
śavi॑ṣṭhaṃ na॒ ā bha॑ra śūra॒ śava॒ oji॑ṣṭha॒mojo॑ abhibhūta u॒gram | viśvā॑ dyu॒mnā vṛṣṇyā॒ mānu॑ṣāṇāma॒smabhyaṃ॑ dā harivo māda॒yadhyai॑ || ६ ||
यस्ते॒ मद॑: पृतना॒षाळमृ॑ध्र॒ इन्द्र॒ तं न॒ आ भ॑र शूशु॒वांस॑म् ।
येन॑ तो॒कस्य॒ तन॑यस्य सा॒तौ मं॑सी॒महि॑ जिगी॒वांस॒स्त्वोता॑: ॥७॥
yaste॒ mada॑: pṛtanā॒ṣāḷamṛ॑dhra॒ indra॒ taṃ na॒ ā bha॑ra śūśu॒vāṃsa॑m | yena॑ to॒kasya॒ tana॑yasya sā॒tau maṃ॑sī॒mahi॑ jigī॒vāṃsa॒stvotā॑: || ७ ||
आ नो॑ भर॒ वृष॑णं॒ शुष्म॑मिन्द्र धन॒स्पृतं॑ शूशु॒वांसं॑ सु॒दक्ष॑म् ।
येन॒ वंसा॑म॒ पृत॑नासु॒ शत्रू॒न् तवो॒तिभि॑रु॒त जा॒मीँरजा॑मीन् ॥८॥
ā no॑ bhara॒ vṛṣa॑ṇaṃ॒ śuṣma॑mindra dhana॒spṛtaṃ॑ śūśu॒vāṃsaṃ॑ su॒dakṣa॑m | yena॒ vaṃsā॑ma॒ pṛta॑nāsu॒ śatrū॒n tavo॒tibhi॑ru॒ta jā॒mīm̐rajā॑mīn || ८ ||
आ ते॒ शुष्मो॑ वृष॒भ ए॑तु प॒श्चादोत्त॒राद॑ध॒रादा पु॒रस्ता॑त् ।
आ वि॒श्वतो॑ अ॒भि समे॑त्व॒र्वाङिन्द्र॑ द्यु॒म्नं स्व॑र्वद्धेह्य॒स्मे ॥९॥
ā te॒ śuṣmo॑ vṛṣa॒bha e॑tu pa॒ścādotta॒rāda॑dha॒rādā pu॒rastā॑t | ā vi॒śvato॑ a॒bhi same॑tva॒rvāṅindra॑ dyu॒mnaṃ sva॑rvaddhehya॒sme || ९ ||
नृ॒वत् त॑ इन्द्र॒ नृत॑माभिरू॒ती वं॑सी॒महि॑ वा॒मं श्रोम॑तेभिः ।
ईक्षे॒ हि वस्व॑ उ॒भय॑स्य राज॒न् धा रत्नं॒ महि॑ स्थू॒रं बृ॒हन्त॑म् ॥१०॥
nṛ॒vat ta॑ indra॒ nṛta॑mābhirū॒tī vaṃ॑sī॒mahi॑ vā॒maṃ śroma॑tebhiḥ | īkṣe॒ hi vasva॑ u॒bhaya॑sya rāja॒n dhā ratnaṃ॒ mahi॑ sthū॒raṃ bṛ॒hanta॑m || १० ||
म॒रुत्व॑न्तं वृष॒भं वा॑वृधा॒नमक॑वारिं दि॒व्यं शा॒समिन्द्र॑म् ।
वि॒श्वा॒साह॒मव॑से॒ नूत॑नायो॒ग्रं स॑हो॒दामि॒ह तं हु॑वेम ॥११॥
ma॒rutva॑ntaṃ vṛṣa॒bhaṃ vā॑vṛdhā॒namaka॑vāriṃ di॒vyaṃ śā॒samindra॑m | vi॒śvā॒sāha॒mava॑se॒ nūta॑nāyo॒graṃ sa॑ho॒dāmi॒ha taṃ hu॑vema || ११ ||
जनं॑ वज्रि॒न् महि॑ चि॒न्मन्य॑मानमे॒भ्यो नृभ्यो॑ रन्धया॒ येष्वस्मि॑ ।
अधा॒ हि त्वा॑ पृथि॒व्यां शूर॑सातौ॒ हवा॑महे॒ तन॑ये॒ गोष्व॒प्सु ॥१२॥
janaṃ॑ vajri॒n mahi॑ ci॒nmanya॑māname॒bhyo nṛbhyo॑ randhayā॒ yeṣvasmi॑ | adhā॒ hi tvā॑ pṛthi॒vyāṃ śūra॑sātau॒ havā॑mahe॒ tana॑ye॒ goṣva॒psu || १२ ||
व॒यं त॑ ए॒भिः पु॑रुहूत स॒ख्यैः शत्रो॑:शत्रो॒रुत्त॑र॒ इत् स्या॑म ।
घ्नन्तो॑ वृ॒त्राण्यु॒भया॑नि शूर रा॒या म॑देम बृह॒ता त्वोता॑: ॥१३॥
va॒yaṃ ta॑ e॒bhiḥ pu॑ruhūta sa॒khyaiḥ śatro॑:śatro॒rutta॑ra॒ it syā॑ma | ghnanto॑ vṛ॒trāṇyu॒bhayā॑ni śūra rā॒yā ma॑dema bṛha॒tā tvotā॑: || १३ ||