EeseDharmaSanātana Library
458मण्डल 6 · सूक्त 17
15 shlokपिबा॒ सोम॑म॒भि यमु॑ग्र॒ तर्द॑ ऊ॒र्वं गव्यं॒ महि॑ गृणा॒न इ॑न्द्र ।
वि यो धृ॑ष्णो॒ वधि॑षो वज्रहस्त॒ विश्वा॑ वृ॒त्रम॑मि॒त्रिया॒ शवो॑भिः ॥१॥
pibā॒ soma॑ma॒bhi yamu॑gra॒ tarda॑ ū॒rvaṃ gavyaṃ॒ mahi॑ gṛṇā॒na i॑ndra | vi yo dhṛ॑ṣṇo॒ vadhi॑ṣo vajrahasta॒ viśvā॑ vṛ॒trama॑mi॒triyā॒ śavo॑bhiḥ || १ ||
स ईं॑ पाहि॒ य ऋ॑जी॒षी तरु॑त्रो॒ यः शिप्र॑वान् वृष॒भो यो म॑ती॒नाम् ।
यो गो॑त्र॒भिद् व॑ज्र॒भृद् यो ह॑रि॒ष्ठाः स इ॑न्द्र चि॒त्राँ अ॒भि तृ॑न्धि॒ वाजा॑न् ॥२॥
sa īṃ॑ pāhi॒ ya ṛ॑jī॒ṣī taru॑tro॒ yaḥ śipra॑vān vṛṣa॒bho yo ma॑tī॒nām | yo go॑tra॒bhid va॑jra॒bhṛd yo ha॑ri॒ṣṭhāḥ sa i॑ndra ci॒trām̐ a॒bhi tṛ॑ndhi॒ vājā॑n || २ ||
ए॒वा पा॑हि प्र॒त्नथा॒ मन्द॑तु त्वा श्रु॒धि ब्रह्म॑ वावृ॒धस्वो॒त गी॒र्भिः ।
आ॒विः सूर्यं॑ कृणु॒हि पी॑पि॒हीषो॑ ज॒हि शत्रूँ॑र॒भि गा इ॑न्द्र तृन्धि ॥३॥
e॒vā pā॑hi pra॒tnathā॒ manda॑tu tvā śru॒dhi brahma॑ vāvṛ॒dhasvo॒ta gī॒rbhiḥ | ā॒viḥ sūryaṃ॑ kṛṇu॒hi pī॑pi॒hīṣo॑ ja॒hi śatrūm̐॑ra॒bhi gā i॑ndra tṛndhi || ३ ||
ते त्वा॒ मदा॑ बृ॒हदि॑न्द्र स्वधाव इ॒मे पी॒ता उ॑क्षयन्त द्यु॒मन्त॑म् ।
म॒हामनू॑नं त॒वसं॒ विभू॑तिं मत्स॒रासो॑ जर्हृषन्त प्र॒साह॑म् ॥४॥
te tvā॒ madā॑ bṛ॒hadi॑ndra svadhāva i॒me pī॒tā u॑kṣayanta dyu॒manta॑m | ma॒hāmanū॑naṃ ta॒vasaṃ॒ vibhū॑tiṃ matsa॒rāso॑ jarhṛṣanta pra॒sāha॑m || ४ ||
येभि॒: सूर्य॑मु॒षसं॑ मन्दसा॒नो ऽवा॑स॒योऽप॑ दृ॒ळ्हानि॒ दर्द्र॑त् ।
म॒हामद्रिं॒ परि॒ गा इ॑न्द्र॒ सन्तं॑ नु॒त्था अच्यु॑तं॒ सद॑स॒स्परि॒ स्वात् ॥५॥
yebhi॒: sūrya॑mu॒ṣasaṃ॑ mandasā॒no ’vā॑sa॒yo’pa॑ dṛ॒ḷhāni॒ dardra॑t | ma॒hāmadriṃ॒ pari॒ gā i॑ndra॒ santaṃ॑ nu॒tthā acyu॑taṃ॒ sada॑sa॒spari॒ svāt || ५ ||
तव॒ क्रत्वा॒ तव॒ तद् दं॒सना॑भिरा॒मासु॑ प॒क्वं शच्या॒ नि दी॑धः ।
और्णो॒र्दुर॑ उ॒स्रिया॑भ्यो॒ वि दृ॒ळ्होदू॒र्वाद् गा अ॑सृजो॒ अङ्गि॑रस्वान् ॥६॥
tava॒ kratvā॒ tava॒ tad daṃ॒sanā॑bhirā॒māsu॑ pa॒kvaṃ śacyā॒ ni dī॑dhaḥ | aurṇo॒rdura॑ u॒sriyā॑bhyo॒ vi dṛ॒ḷhodū॒rvād gā a॑sṛjo॒ aṅgi॑rasvān || ६ ||
प॒प्राथ॒ क्षां महि॒ दंसो॒ व्यु१र्वीमुप॒ द्यामृ॒ष्वो बृ॒हदि॑न्द्र स्तभायः ।
अधा॑रयो॒ रोद॑सी दे॒वपु॑त्रे प्र॒त्ने मा॒तरा॑ य॒ह्वी ऋ॒तस्य॑ ॥७॥
pa॒prātha॒ kṣāṃ mahi॒ daṃso॒ vyu१rvīmupa॒ dyāmṛ॒ṣvo bṛ॒hadi॑ndra stabhāyaḥ | adhā॑rayo॒ roda॑sī de॒vapu॑tre pra॒tne mā॒tarā॑ ya॒hvī ṛ॒tasya॑ || ७ ||
अध॑ त्वा॒ विश्वे॑ पु॒र इ॑न्द्र दे॒वा एकं॑ त॒वसं॑ दधिरे॒ भरा॑य ।
अदे॑वो॒ यद॒भ्यौहि॑ष्ट दे॒वान् त्स्व॑र्षाता वृणत॒ इन्द्र॒मत्र॑ ॥८॥
adha॑ tvā॒ viśve॑ pu॒ra i॑ndra de॒vā ekaṃ॑ ta॒vasaṃ॑ dadhire॒ bharā॑ya | ade॑vo॒ yada॒bhyauhi॑ṣṭa de॒vān tsva॑rṣātā vṛṇata॒ indra॒matra॑ || ८ ||
अध॒ द्यौश्चि॑त् ते॒ अप॒ सा नु वज्रा॑द् द्वि॒तान॑मद् भि॒यसा॒ स्वस्य॑ म॒न्योः ।
अहिं॒ यदिन्द्रो॑ अ॒भ्योह॑सानं॒ नि चि॑द् वि॒श्वायु॑: श॒यथे॑ ज॒घान॑ ॥९॥
adha॒ dyauści॑t te॒ apa॒ sā nu vajrā॑d dvi॒tāna॑mad bhi॒yasā॒ svasya॑ ma॒nyoḥ | ahiṃ॒ yadindro॑ a॒bhyoha॑sānaṃ॒ ni ci॑d vi॒śvāyu॑: śa॒yathe॑ ja॒ghāna॑ || ९ ||
अध॒ त्वष्टा॑ ते म॒ह उ॑ग्र॒ वज्रं॑ स॒हस्र॑भृष्टिं ववृतच्छ॒ताश्रि॑म् ।
निका॑मम॒रम॑णसं॒ येन॒ नव॑न्त॒महिं॒ सं पि॑णगृजीषिन् ॥१०॥
adha॒ tvaṣṭā॑ te ma॒ha u॑gra॒ vajraṃ॑ sa॒hasra॑bhṛṣṭiṃ vavṛtaccha॒tāśri॑m | nikā॑mama॒rama॑ṇasaṃ॒ yena॒ nava॑nta॒mahiṃ॒ saṃ pi॑ṇagṛjīṣin || १० ||
वर्धा॒न् यं विश्वे॑ म॒रुत॑: स॒जोषा॒: पच॑च्छ॒तं म॑हि॒षाँ इ॑न्द्र॒ तुभ्य॑म् ।
पू॒षा विष्णु॒स्त्रीणि॒ सरां॑सि धावन् वृत्र॒हणं॑ मदि॒रमं॒शुम॑स्मै ॥११॥
vardhā॒n yaṃ viśve॑ ma॒ruta॑: sa॒joṣā॒: paca॑ccha॒taṃ ma॑hi॒ṣām̐ i॑ndra॒ tubhya॑m | pū॒ṣā viṣṇu॒strīṇi॒ sarāṃ॑si dhāvan vṛtra॒haṇaṃ॑ madi॒ramaṃ॒śuma॑smai || ११ ||
आ क्षोदो॒ महि॑ वृ॒तं न॒दीनां॒ परि॑ष्ठितमसृज ऊ॒र्मिम॒पाम् ।
तासा॒मनु॑ प्र॒वत॑ इन्द्र॒ पन्थां॒ प्रार्द॑यो॒ नीची॑र॒पस॑: समु॒द्रम् ॥१२॥
ā kṣodo॒ mahi॑ vṛ॒taṃ na॒dīnāṃ॒ pari॑ṣṭhitamasṛja ū॒rmima॒pām | tāsā॒manu॑ pra॒vata॑ indra॒ panthāṃ॒ prārda॑yo॒ nīcī॑ra॒pasa॑: samu॒dram || १२ ||
ए॒वा ता विश्वा॑ चकृ॒वांस॒मिन्द्रं॑ म॒हामु॒ग्रम॑जु॒र्यं स॑हो॒दाम् ।
सु॒वीरं॑ त्वा स्वायु॒धं सु॒वज्र॒मा ब्रह्म॒ नव्य॒मव॑से ववृत्यात् ॥१३॥
e॒vā tā viśvā॑ cakṛ॒vāṃsa॒mindraṃ॑ ma॒hāmu॒grama॑ju॒ryaṃ sa॑ho॒dām | su॒vīraṃ॑ tvā svāyu॒dhaṃ su॒vajra॒mā brahma॒ navya॒mava॑se vavṛtyāt || १३ ||
स नो॒ वाजा॑य॒ श्रव॑स इ॒षे च॑ रा॒ये धे॑हि द्यु॒मत॑ इन्द्र॒ विप्रा॑न् ।
भ॒रद्वा॑जे नृ॒वत॑ इन्द्र सू॒रीन् दि॒वि च॑ स्मैधि॒ पार्ये॑ न इन्द्र ॥१४॥
sa no॒ vājā॑ya॒ śrava॑sa i॒ṣe ca॑ rā॒ye dhe॑hi dyu॒mata॑ indra॒ viprā॑n | bha॒radvā॑je nṛ॒vata॑ indra sū॒rīn di॒vi ca॑ smaidhi॒ pārye॑ na indra || १४ ||
अ॒या वाजं॑ दे॒वहि॑तं सनेम॒ मदे॑म श॒तहि॑माः सु॒वीरा॑: ॥१५॥
a॒yā vājaṃ॑ de॒vahi॑taṃ sanema॒ made॑ma śa॒tahi॑māḥ su॒vīrā॑: || १५ ||