EeseDharmaSanātana Library
455मण्डल 6 · सूक्त 14
6 shlokअ॒ग्ना यो मर्त्यो॒ दुवो॒ धियं॑ जु॒जोष॑ धी॒तिभि॑: । भस॒न्नु ष प्र पू॒र्व्य इषं॑ वुरी॒ताव॑से ॥१॥
a॒gnā yo martyo॒ duvo॒ dhiyaṃ॑ ju॒joṣa॑ dhī॒tibhi॑: | bhasa॒nnu ṣa pra pū॒rvya iṣaṃ॑ vurī॒tāva॑se || १ ||
अ॒ग्निरिद्धि प्रचे॑ता अ॒ग्निर्वे॒धस्त॑म॒ ऋषि॑: । अ॒ग्निं होता॑रमीळते य॒ज्ञेषु॒ मनु॑षो॒ विश॑: ॥२॥
a॒gniriddhi prace॑tā a॒gnirve॒dhasta॑ma॒ ṛṣi॑: | a॒gniṃ hotā॑ramīḷate ya॒jñeṣu॒ manu॑ṣo॒ viśa॑: || २ ||
नाना॒ ह्य१ग्नेऽव॑से॒ स्पर्ध॑न्ते॒ रायो॑ अ॒र्यः । तूर्व॑न्तो॒ दस्यु॑मा॒यवो॑ व्र॒तैः सीक्ष॑न्तो अव्र॒तम् ॥३॥
nānā॒ hya१gne’va॑se॒ spardha॑nte॒ rāyo॑ a॒ryaḥ | tūrva॑nto॒ dasyu॑mā॒yavo॑ vra॒taiḥ sīkṣa॑nto avra॒tam || ३ ||
अ॒ग्निर॒प्सामृ॑ती॒षहं॑ वी॒रं द॑दाति॒ सत्प॑तिम् । यस्य॒ त्रस॑न्ति॒ शव॑सः सं॒चक्षि॒ शत्र॑वो भि॒या ॥४॥
a॒gnira॒psāmṛ॑tī॒ṣahaṃ॑ vī॒raṃ da॑dāti॒ satpa॑tim | yasya॒ trasa॑nti॒ śava॑saḥ saṃ॒cakṣi॒ śatra॑vo bhi॒yā || ४ ||
अ॒ग्निर्हि वि॒द्मना॑ नि॒दो दे॒वो मर्त॑मुरु॒ष्यति॑ । स॒हावा॒ यस्यावृ॑तो र॒यिर्वाजे॒ष्ववृ॑तः ॥५॥
a॒gnirhi vi॒dmanā॑ ni॒do de॒vo marta॑muru॒ṣyati॑ | sa॒hāvā॒ yasyāvṛ॑to ra॒yirvāje॒ṣvavṛ॑taḥ || ५ ||
अच्छा॑ नो मित्रमहो देव दे॒वानग्ने॒ वोच॑: सुम॒तिं रोद॑स्योः ।
वी॒हि स्व॒स्तिं सु॑क्षि॒तिं दि॒वो नॄन् द्वि॒षो अंहां॑सि दुरि॒ता त॑रेम॒ ता त॑रेम॒ तवाव॑सा तरेम ॥६॥
acchā॑ no mitramaho deva de॒vānagne॒ voca॑: suma॒tiṃ roda॑syoḥ | vī॒hi sva॒stiṃ su॑kṣi॒tiṃ di॒vo nṝn dvi॒ṣo aṃhāṃ॑si duri॒tā ta॑rema॒ tā ta॑rema॒ tavāva॑sā tarema || ६ ||