EeseDharmaSanātana Library
454मण्डल 6 · सूक्त 13
6 shlokत्वद् विश्वा॑ सुभग॒ सौभ॑गा॒न्यग्ने॒ वि य॑न्ति व॒निनो॒ न व॒याः ।
श्रु॒ष्टी र॒यिर्वाजो॑ वृत्र॒तूर्ये॑ दि॒वो वृ॒ष्टिरीड्यो॑ री॒तिर॒पाम् ॥१॥
tvad viśvā॑ subhaga॒ saubha॑gā॒nyagne॒ vi ya॑nti va॒nino॒ na va॒yāḥ | śru॒ṣṭī ra॒yirvājo॑ vṛtra॒tūrye॑ di॒vo vṛ॒ṣṭirīḍyo॑ rī॒tira॒pām || १ ||
त्वं भगो॑ न॒ आ हि रत्न॑मि॒षे परि॑ज्मेव क्षयसि द॒स्मव॑र्चाः ।
अग्ने॑ मि॒त्रो न बृ॑ह॒त ऋ॒तस्याऽसि॑ क्ष॒त्ता वा॒मस्य॑ देव॒ भूरे॑: ॥२॥
tvaṃ bhago॑ na॒ ā hi ratna॑mi॒ṣe pari॑jmeva kṣayasi da॒smava॑rcāḥ | agne॑ mi॒tro na bṛ॑ha॒ta ṛ॒tasyā’si॑ kṣa॒ttā vā॒masya॑ deva॒ bhūre॑: || २ ||
स सत्प॑ति॒: शव॑सा हन्ति वृ॒त्रमग्ने॒ विप्रो॒ वि प॒णेर्भ॑र्ति॒ वाज॑म् ।
यं त्वं प्र॑चेत ऋतजात रा॒या स॒जोषा॒ नप्त्रा॒पां हि॒नोषि॑ ॥३॥
sa satpa॑ti॒: śava॑sā hanti vṛ॒tramagne॒ vipro॒ vi pa॒ṇerbha॑rti॒ vāja॑m | yaṃ tvaṃ pra॑ceta ṛtajāta rā॒yā sa॒joṣā॒ naptrā॒pāṃ hi॒noṣi॑ || ३ ||
यस्ते॑ सूनो सहसो गी॒र्भिरु॒क्थैर्य॒ज्ञैर्मर्तो॒ निशि॑तिं वे॒द्यान॑ट् ।
विश्वं॒ स दे॑व॒ प्रति॒ वार॑मग्ने ध॒त्ते धा॒न्यं१ पत्य॑ते वस॒व्यै॑: ॥४॥
yaste॑ sūno sahaso gī॒rbhiru॒kthairya॒jñairmarto॒ niśi॑tiṃ ve॒dyāna॑ṭ | viśvaṃ॒ sa de॑va॒ prati॒ vāra॑magne dha॒tte dhā॒nyaṃ१ patya॑te vasa॒vyai॑: || ४ ||
ता नृभ्य॒ आ सौ॑श्रव॒सा सु॒वीरा ऽग्ने॑ सूनो सहसः पु॒ष्यसे॑ धाः ।
कृ॒णोषि॒ यच्छव॑सा॒ भूरि॑ प॒श्वो वयो॒ वृका॑या॒रये॒ जसु॑रये ॥५॥
tā nṛbhya॒ ā sau॑śrava॒sā su॒vīrā ’gne॑ sūno sahasaḥ pu॒ṣyase॑ dhāḥ | kṛ॒ṇoṣi॒ yacchava॑sā॒ bhūri॑ pa॒śvo vayo॒ vṛkā॑yā॒raye॒ jasu॑raye || ५ ||
व॒द्मा सू॑नो सहसो नो॒ विहा॑या॒ अग्ने॑ तो॒कं तन॑यं वा॒जि नो॑ दाः ।
विश्वा॑भिर्गी॒र्भिर॒भि पू॒र्तिम॑श्यां॒ मदे॑म श॒तहि॑माः सु॒वीरा॑: ॥६॥
va॒dmā sū॑no sahaso no॒ vihā॑yā॒ agne॑ to॒kaṃ tana॑yaṃ vā॒ji no॑ dāḥ | viśvā॑bhirgī॒rbhira॒bhi pū॒rtima॑śyāṃ॒ made॑ma śa॒tahi॑māḥ su॒vīrā॑: || ६ ||