EeseDharmaSanātana Library
453मण्डल 6 · सूक्त 12
6 shlok[ ६ पुरस्ताज्ज्योतिर्वा ]।
मध्ये॒ होता॑ दुरो॒णे ब॒र्हिषो॒ राळ॒ग्निस्तो॒दस्य॒ रोद॑सी॒ यज॑ध्यै ।
अ॒यं स सू॒नुः सह॑स ऋ॒तावा॑ दू॒रात् सूर्यो॒ न शो॒चिषा॑ ततान ॥१॥
[ ६ purastājjyotirvā ] | madhye॒ hotā॑ duro॒ṇe ba॒rhiṣo॒ rāḷa॒gnisto॒dasya॒ roda॑sī॒ yaja॑dhyai | a॒yaṃ sa sū॒nuḥ saha॑sa ṛ॒tāvā॑ dū॒rāt sūryo॒ na śo॒ciṣā॑ tatāna || १ ||
आ यस्मि॒न् त्वे स्वपा॑के यजत्र॒ यक्ष॑द् राजन् त्स॒र्वता॑तेव॒ नु द्यौः ।
त्रि॒ष॒धस्थ॑स्तत॒रुषो॒ न जंहो॑ ह॒व्या म॒घानि॒ मानु॑षा॒ यज॑ध्यै ॥२॥
ā yasmi॒n tve svapā॑ke yajatra॒ yakṣa॑d rājan tsa॒rvatā॑teva॒ nu dyauḥ | tri॒ṣa॒dhastha॑stata॒ruṣo॒ na jaṃho॑ ha॒vyā ma॒ghāni॒ mānu॑ṣā॒ yaja॑dhyai || २ ||
तेजि॑ष्ठा॒ यस्या॑र॒तिर्व॑ने॒राट् तो॒दो अध्व॒न् न वृ॑धसा॒नो अ॑द्यौत् ।
अ॒द्रो॒घो न द्र॑वि॒ता चे॑तति॒ त्मन्नम॑र्त्योऽव॒र्त्र ओष॑धीषु ॥३॥
teji॑ṣṭhā॒ yasyā॑ra॒tirva॑ne॒rāṭ to॒do adhva॒n na vṛ॑dhasā॒no a॑dyaut | a॒dro॒gho na dra॑vi॒tā ce॑tati॒ tmannama॑rtyo’va॒rtra oṣa॑dhīṣu || ३ ||
सास्माके॑भिरे॒तरी॒ न शू॒षैर॒ग्निः ष्ट॑वे॒ दम॒ आ जा॒तवे॑दाः ।
द्र्व॑न्नो व॒न्वन् क्रत्वा॒ नार्वो॒स्रः पि॒तेव॑ जार॒यायि॑ य॒ज्ञैः ॥४॥
sāsmāke॑bhire॒tarī॒ na śū॒ṣaira॒gniḥ ṣṭa॑ve॒ dama॒ ā jā॒tave॑dāḥ | drva॑nno va॒nvan kratvā॒ nārvo॒sraḥ pi॒teva॑ jāra॒yāyi॑ ya॒jñaiḥ || ४ ||
अध॑ स्मास्य पनयन्ति॒ भासो॒ वृथा॒ यत् तक्ष॑दनु॒याति॑ पृ॒थ्वीम् ।
स॒द्यो यः स्प॒न्द्रो विषि॑तो॒ धवी॑यानृ॒णो न ता॒युरति॒ धन्वा॑ राट् ॥५॥
adha॑ smāsya panayanti॒ bhāso॒ vṛthā॒ yat takṣa॑danu॒yāti॑ pṛ॒thvīm | sa॒dyo yaḥ spa॒ndro viṣi॑to॒ dhavī॑yānṛ॒ṇo na tā॒yurati॒ dhanvā॑ rāṭ || ५ ||
स त्वं नो॑ अर्व॒न् निदा॑या॒ विश्वे॑भिरग्ने अ॒ग्निभि॑रिधा॒नः ।
वेषि॑ रा॒यो वि या॑सि दु॒च्छुना॒ मदे॑म श॒तहि॑माः सु॒वीरा॑: ॥६॥
sa tvaṃ no॑ arva॒n nidā॑yā॒ viśve॑bhiragne a॒gnibhi॑ridhā॒naḥ | veṣi॑ rā॒yo vi yā॑si du॒cchunā॒ made॑ma śa॒tahi॑māḥ su॒vīrā॑: || ६ ||