EeseDharmaSanātana Library
452मण्डल 6 · सूक्त 11
6 shlokयज॑स्व होतरिषि॒तो यजी॑या॒नग्ने॒ बाधो॑ म॒रुतां॒ न प्रयु॑क्ति ।
आ नो॑ मि॒त्रावरु॑णा॒ नास॑त्या॒ द्यावा॑ हो॒त्राय॑ पृथि॒वी व॑वृत्याः ॥१॥
yaja॑sva hotariṣi॒to yajī॑yā॒nagne॒ bādho॑ ma॒rutāṃ॒ na prayu॑kti | ā no॑ mi॒trāvaru॑ṇā॒ nāsa॑tyā॒ dyāvā॑ ho॒trāya॑ pṛthi॒vī va॑vṛtyāḥ || १ ||
त्वं होता॑ म॒न्द्रत॑मो नो अ॒ध्रुग॒न्तर्दे॒वो वि॒दथा॒ मर्त्ये॑षु ।
पा॒व॒कया॑ जु॒ह्वा॒३ वह्नि॑रा॒सा ऽग्ने॒ यज॑स्व त॒न्वं१ तव॒ स्वाम् ॥२॥
tvaṃ hotā॑ ma॒ndrata॑mo no a॒dhruga॒ntarde॒vo vi॒dathā॒ martye॑ṣu | pā॒va॒kayā॑ ju॒hvā॒३ vahni॑rā॒sā ’gne॒ yaja॑sva ta॒nvaṃ१ tava॒ svām || २ ||
धन्या॑ चि॒द्धि त्वे धि॒षणा॒ वष्टि॒ प्र दे॒वाञ्जन्म॑ गृण॒ते यज॑ध्यै ।
वेपि॑ष्ठो॒ अङ्गि॑रसां॒ यद्ध॒ विप्रो॒ मधु॑ च्छ॒न्दो भन॑ति रे॒भ इ॒ष्टौ ॥३॥
dhanyā॑ ci॒ddhi tve dhi॒ṣaṇā॒ vaṣṭi॒ pra de॒vāñjanma॑ gṛṇa॒te yaja॑dhyai | vepi॑ṣṭho॒ aṅgi॑rasāṃ॒ yaddha॒ vipro॒ madhu॑ ccha॒ndo bhana॑ti re॒bha i॒ṣṭau || ३ ||
अदि॑द्युत॒त् स्वपा॑को वि॒भावा ऽग्ने॒ यज॑स्व॒ रोद॑सी उरू॒ची ।
आ॒युं न यं नम॑सा रा॒तह॑व्या अ॒ञ्जन्ति॑ सुप्र॒यसं॒ पञ्च॒ जना॑: ॥४॥
adi॑dyuta॒t svapā॑ko vi॒bhāvā ’gne॒ yaja॑sva॒ roda॑sī urū॒cī | ā॒yuṃ na yaṃ nama॑sā rā॒taha॑vyā a॒ñjanti॑ supra॒yasaṃ॒ pañca॒ janā॑: || ४ ||
वृ॒ञ्जे ह॒ यन्नम॑सा ब॒र्हिर॒ग्नावया॑मि॒ स्रुग्घृ॒तव॑ती सुवृ॒क्तिः ।
अम्य॑क्षि॒ सद्म॒ सद॑ने पृथि॒व्या अश्रा॑यि य॒ज्ञः सूर्ये॒ न चक्षु॑: ॥५॥
vṛ॒ñje ha॒ yannama॑sā ba॒rhira॒gnāvayā॑mi॒ srugghṛ॒tava॑tī suvṛ॒ktiḥ | amya॑kṣi॒ sadma॒ sada॑ne pṛthi॒vyā aśrā॑yi ya॒jñaḥ sūrye॒ na cakṣu॑: || ५ ||
द॒श॒स्या न॑: पुर्वणीक होतर्दे॒वेभि॑रग्ने अ॒ग्निभि॑रिधा॒नः ।
रा॒यः सू॑नो सहसो वावसा॒ना अति॑ स्रसेम वृ॒जनं॒ नांह॑: ॥६॥
da॒śa॒syā na॑: purvaṇīka hotarde॒vebhi॑ragne a॒gnibhi॑ridhā॒naḥ | rā॒yaḥ sū॑no sahaso vāvasā॒nā ati॑ srasema vṛ॒janaṃ॒ nāṃha॑: || ६ ||