EeseDharmaSanātana Library
451मण्डल 6 · सूक्त 10
7 shlokपु॒रो वो॑ म॒न्द्रं दि॒व्यं सु॑वृ॒क्तिं प्र॑य॒ति य॒ज्ञे अ॒ग्निम॑ध्व॒रे द॑धिध्वम् ।
पु॒र उ॒क्थेभि॒: स हि नो॑ वि॒भावा॑ स्वध्व॒रा क॑रति जा॒तवे॑दाः ॥१॥
pu॒ro vo॑ ma॒ndraṃ di॒vyaṃ su॑vṛ॒ktiṃ pra॑ya॒ti ya॒jñe a॒gnima॑dhva॒re da॑dhidhvam | pu॒ra u॒kthebhi॒: sa hi no॑ vi॒bhāvā॑ svadhva॒rā ka॑rati jā॒tave॑dāḥ || १ ||
तमु॑ द्युमः पुर्वणीक होत॒रग्ने॑ अ॒ग्निभि॒र्मनु॑ष इधा॒नः ।
स्तोमं॒ यम॑स्मै म॒मते॑व शू॒षं घृ॒तं न शुचि॑ म॒तय॑: पवन्ते ॥२॥
tamu॑ dyumaḥ purvaṇīka hota॒ragne॑ a॒gnibhi॒rmanu॑ṣa idhā॒naḥ | stomaṃ॒ yama॑smai ma॒mate॑va śū॒ṣaṃ ghṛ॒taṃ na śuci॑ ma॒taya॑: pavante || २ ||
पी॒पाय॒ स श्रव॑सा॒ मर्त्ये॑षु॒ यो अ॒ग्नये॑ द॒दाश॒ विप्र॑ उ॒क्थैः ।
चि॒त्राभि॒स्तमू॒तिभि॑श्चि॒त्रशो॑चिर्व्र॒जस्य॑ सा॒ता गोम॑तो दधाति ॥३॥
pī॒pāya॒ sa śrava॑sā॒ martye॑ṣu॒ yo a॒gnaye॑ da॒dāśa॒ vipra॑ u॒kthaiḥ | ci॒trābhi॒stamū॒tibhi॑ści॒traśo॑cirvra॒jasya॑ sā॒tā goma॑to dadhāti || ३ ||
आ यः प॒प्रौ जाय॑मान उ॒र्वी दू॑रे॒दृशा॑ भा॒सा कृ॒ष्णाध्वा॑ ।
अध॑ ब॒हु चि॒त् तम॒ ऊर्म्या॑यास्ति॒रः शो॒चिषा॑ ददृशे पाव॒कः ॥४॥
ā yaḥ pa॒prau jāya॑māna u॒rvī dū॑re॒dṛśā॑ bhā॒sā kṛ॒ṣṇādhvā॑ | adha॑ ba॒hu ci॒t tama॒ ūrmyā॑yāsti॒raḥ śo॒ciṣā॑ dadṛśe pāva॒kaḥ || ४ ||
नू न॑श्चि॒त्रं पु॑रु॒वाजा॑भिरू॒ती अग्ने॑ र॒यिं म॒घव॑द्भ्यश्च धेहि ।
ये राध॑सा॒ श्रव॑सा॒ चात्य॒न्यान् त्सु॒वीर्ये॑भिश्चा॒भि सन्ति॒ जना॑न् ॥५॥
nū na॑ści॒traṃ pu॑ru॒vājā॑bhirū॒tī agne॑ ra॒yiṃ ma॒ghava॑dbhyaśca dhehi | ye rādha॑sā॒ śrava॑sā॒ cātya॒nyān tsu॒vīrye॑bhiścā॒bhi santi॒ janā॑n || ५ ||
इ॒मं य॒ज्ञं चनो॑ धा अग्न उ॒शन् यं त॑ आसा॒नो जु॑हु॒ते ह॒विष्मा॑न् ।
भ॒रद्वा॑जेषु दधिषे सुवृ॒क्तिमवी॒र्वाज॑स्य॒ गध्य॑स्य सा॒तौ ॥६॥
i॒maṃ ya॒jñaṃ cano॑ dhā agna u॒śan yaṃ ta॑ āsā॒no ju॑hu॒te ha॒viṣmā॑n | bha॒radvā॑jeṣu dadhiṣe suvṛ॒ktimavī॒rvāja॑sya॒ gadhya॑sya sā॒tau || ६ ||
वि द्वेषां॑सीनु॒हि व॒र्धयेळां॒ मदे॑म श॒तहि॑माः सु॒वीरा॑: ॥७॥
vi dveṣāṃ॑sīnu॒hi va॒rdhayeḷāṃ॒ made॑ma śa॒tahi॑māḥ su॒vīrā॑: || ७ ||