EeseDharmaSanātana Library
440मण्डल 5 · सूक्त 86
6 shlokइन्द्रा॑ग्नी॒ यमव॑थ उ॒भा वाजे॑षु॒ मर्त्य॑म् । दृ॒ळहा चि॒त् स प्र भे॑दति द्यु॒म्ना वाणी॑रिव त्रि॒तः ॥१॥
indrā॑gnī॒ yamava॑tha u॒bhā vāje॑ṣu॒ martya॑m | dṛ॒ḷahā ci॒t sa pra bhe॑dati dyu॒mnā vāṇī॑riva tri॒taḥ || १ ||
या पृत॑नासु दु॒ष्टरा॒ या वाजे॑षु श्र॒वाय्या॑ । या पञ्च॑ चर्ष॒णीर॒भी॑न्द्रा॒ग्नी ता ह॑वामहे ॥२॥
yā pṛta॑nāsu du॒ṣṭarā॒ yā vāje॑ṣu śra॒vāyyā॑ | yā pañca॑ carṣa॒ṇīra॒bhī॑ndrā॒gnī tā ha॑vāmahe || २ ||
तयो॒रिदम॑व॒च्छव॑स्ति॒ग्मा दि॒द्युन्म॒घोनो॑: । प्रति॒ द्रुणा॒ गभ॑स्त्यो॒र्गवां॑ वृत्र॒घ्न एष॑ते ॥३॥
tayo॒ridama॑va॒cchava॑sti॒gmā di॒dyunma॒ghono॑: | prati॒ druṇā॒ gabha॑styo॒rgavāṃ॑ vṛtra॒ghna eṣa॑te || ३ ||
ता वा॒मेषे॒ रथा॑नामिन्द्रा॒ग्नी ह॑वामहे । पती॑ तु॒रस्य॒ राध॑सो वि॒द्वांसा॒ गिर्व॑णस्तमा ॥४॥
tā vā॒meṣe॒ rathā॑nāmindrā॒gnī ha॑vāmahe | patī॑ tu॒rasya॒ rādha॑so vi॒dvāṃsā॒ girva॑ṇastamā || ४ ||
ता वृ॒धन्ता॒वनु॒ द्यून् मर्ता॑य दे॒वाव॒दभा॑ । अर्ह॑न्ता चित् पु॒रो द॒धेंऽशे॑व दे॒वावर्व॑ते ॥५॥
tā vṛ॒dhantā॒vanu॒ dyūn martā॑ya de॒vāva॒dabhā॑ | arha॑ntā cit pu॒ro da॒dheṃ’śe॑va de॒vāvarva॑te || ५ ||
ए॒वेन्द्रा॒ग्निभ्या॒महा॑वि ह॒व्यं शू॒ष्यं॑ घृ॒तं न पू॒तमद्रि॑भिः ।
ता सू॒रिषु॒ श्रवो॑ बृ॒हद्र॒यिं गृ॒णत्सु॑ दिधृत॒मिषं॑ गृ॒णत्सु॑ दिधृतम् ॥६॥
e॒vendrā॒gnibhyā॒mahā॑vi ha॒vyaṃ śū॒ṣyaṃ॑ ghṛ॒taṃ na pū॒tamadri॑bhiḥ | tā sū॒riṣu॒ śravo॑ bṛ॒hadra॒yiṃ gṛ॒ṇatsu॑ didhṛta॒miṣaṃ॑ gṛ॒ṇatsu॑ didhṛtam || ६ ||