EeseDharmaSanātana Library
439मण्डल 5 · सूक्त 85
8 shlokप्र स॒म्राजे॑ बृ॒हद॑र्चा गभी॒रं ब्रह्म॑ प्रि॒यं वरु॑णाय श्रु॒ताय॑ ।
वि यो ज॒घान॑ शमि॒तेव॒ चर्मो॑प॒स्तिरे॑ पृथि॒वीं सूर्या॑य ॥१॥
pra sa॒mrāje॑ bṛ॒hada॑rcā gabhī॒raṃ brahma॑ pri॒yaṃ varu॑ṇāya śru॒tāya॑ | vi yo ja॒ghāna॑ śami॒teva॒ carmo॑pa॒stire॑ pṛthi॒vīṃ sūryā॑ya || १ ||
वने॑षु॒ व्य१न्तरि॑क्षं ततान॒ वाज॒मर्व॑त्सु॒ पय॑ उ॒स्रिया॑सु ।
हृ॒त्सु क्रतुं॒ वरु॑णो अ॒प्स्व१ग्निं दि॒वि सूर्य॑मदधा॒त् सोम॒मद्रौ॑ ॥२॥
vane॑ṣu॒ vya१ntari॑kṣaṃ tatāna॒ vāja॒marva॑tsu॒ paya॑ u॒sriyā॑su | hṛ॒tsu kratuṃ॒ varu॑ṇo a॒psva१gniṃ di॒vi sūrya॑madadhā॒t soma॒madrau॑ || २ ||
नी॒चीन॑बारं॒ वरु॑ण॒: कव॑न्धं॒ प्र स॑सर्ज॒ रोद॑सी अ॒न्तरि॑क्षम् ।
तेन॒ विश्व॑स्य॒ भुव॑नस्य॒ राजा॒ यवं॒ न वृ॒ष्टिर्व्यु॑नत्ति॒ भूम॑ ॥३॥
nī॒cīna॑bāraṃ॒ varu॑ṇa॒: kava॑ndhaṃ॒ pra sa॑sarja॒ roda॑sī a॒ntari॑kṣam | tena॒ viśva॑sya॒ bhuva॑nasya॒ rājā॒ yavaṃ॒ na vṛ॒ṣṭirvyu॑natti॒ bhūma॑ || ३ ||
उ॒नत्ति॒ भूमिं॑ पृथि॒वीमु॒त द्यां य॒दा दु॒ग्धं वरु॑णो॒ वष्ट्यादित् ।
सम॒भ्रेण॑ वसत॒ पर्व॑तासस्तविषी॒यन्त॑: श्रथयन्त वी॒राः ॥४॥
u॒natti॒ bhūmiṃ॑ pṛthi॒vīmu॒ta dyāṃ ya॒dā du॒gdhaṃ varu॑ṇo॒ vaṣṭyādit | sama॒bhreṇa॑ vasata॒ parva॑tāsastaviṣī॒yanta॑: śrathayanta vī॒rāḥ || ४ ||
इ॒मामू॒ ष्वा॑सु॒रस्य॑ श्रु॒तस्य॑ म॒हीं मा॒यां वरु॑णस्य॒ प्र वो॑चम् ।
माने॑नेव तस्थि॒वाँ अ॒न्तरि॑क्षे॒ वि यो म॒मे पृ॑थि॒वीं सूर्ये॑ण ॥५॥
i॒māmū॒ ṣvā॑su॒rasya॑ śru॒tasya॑ ma॒hīṃ mā॒yāṃ varu॑ṇasya॒ pra vo॑cam | māne॑neva tasthi॒vām̐ a॒ntari॑kṣe॒ vi yo ma॒me pṛ॑thi॒vīṃ sūrye॑ṇa || ५ ||
इ॒मामू॒ नु क॒वित॑मस्य मा॒यां म॒हीं दे॒वस्य॒ नकि॒रा द॑धर्ष ।
एकं॒ यदु॒द्ना न पृ॒णन्त्येनी॑रासि॒ञ्चन्ती॑र॒वन॑यः समु॒द्रम् ॥६॥
i॒māmū॒ nu ka॒vita॑masya mā॒yāṃ ma॒hīṃ de॒vasya॒ naki॒rā da॑dharṣa | ekaṃ॒ yadu॒dnā na pṛ॒ṇantyenī॑rāsi॒ñcantī॑ra॒vana॑yaḥ samu॒dram || ६ ||
अ॒र्य॒म्यं॑ वरुण मि॒त्र्यं॑ वा॒ सखा॑यं वा॒ सद॒मिद् भ्रात॑रं वा ।
वे॒शं वा॒ नित्यं॑ वरु॒णार॑णं वा॒ यत् सी॒माग॑श्चकृ॒मा शि॒श्रथ॒स्तत् ॥७॥
a॒rya॒myaṃ॑ varuṇa mi॒tryaṃ॑ vā॒ sakhā॑yaṃ vā॒ sada॒mid bhrāta॑raṃ vā | ve॒śaṃ vā॒ nityaṃ॑ varu॒ṇāra॑ṇaṃ vā॒ yat sī॒māga॑ścakṛ॒mā śi॒śratha॒stat || ७ ||
कि॒त॒वासो॒ यद् रि॑रि॒पुर्न दी॒वि यद् वा॑ घा स॒त्यमु॒त यन्न वि॒द्म ।
सर्वा॒ ता वि ष्य॑ शिथि॒रेव॑ दे॒वाऽधा॑ ते स्याम वरुण प्रि॒यास॑: ॥८॥
ki॒ta॒vāso॒ yad ri॑ri॒purna dī॒vi yad vā॑ ghā sa॒tyamu॒ta yanna vi॒dma | sarvā॒ tā vi ṣya॑ śithi॒reva॑ de॒vā’dhā॑ te syāma varuṇa pri॒yāsa॑: || ८ ||