EeseDharmaSanātana Library
435मण्डल 5 · सूक्त 81
5 shlokयु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चित॑: ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः ॥१॥
yu॒ñjate॒ mana॑ u॒ta yu॑ñjate॒ dhiyo॒ viprā॒ vipra॑sya bṛha॒to vi॑pa॒ścita॑: | vi hotrā॑ dadhe vayunā॒videka॒ inma॒hī de॒vasya॑ savi॒tuḥ pari॑ṣṭutiḥ || १ ||
विश्वा॑ रू॒पाणि॒ प्रति॑ मुञ्चते क॒विः प्रासा॑वीद् भ॒द्रं द्वि॒पदे॒ चतु॑ष्पदे ।
वि नाक॑मख्यत् सवि॒ता वरे॒ण्योऽनु॑ प्र॒याण॑मु॒षसो॒ वि रा॑जति ॥२॥
viśvā॑ rū॒pāṇi॒ prati॑ muñcate ka॒viḥ prāsā॑vīd bha॒draṃ dvi॒pade॒ catu॑ṣpade | vi nāka॑makhyat savi॒tā vare॒ṇyo’nu॑ pra॒yāṇa॑mu॒ṣaso॒ vi rā॑jati || २ ||
यस्य॑ प्र॒याण॒मन्व॒न्य इद् य॒युर्दे॒वा दे॒वस्य॑ महि॒मान॒मोज॑सा ।
यः पार्थि॑वानि विम॒मे स एत॑शो॒ रजां॑सि दे॒वः स॑वि॒ता म॑हित्व॒ना ॥३॥
yasya॑ pra॒yāṇa॒manva॒nya id ya॒yurde॒vā de॒vasya॑ mahi॒māna॒moja॑sā | yaḥ pārthi॑vāni vima॒me sa eta॑śo॒ rajāṃ॑si de॒vaḥ sa॑vi॒tā ma॑hitva॒nā || ३ ||
उ॒त या॑सि सवित॒स्त्रीणि॑ रोच॒नोत सूर्य॑स्य र॒श्मिभि॒: समु॑च्यसि ।
उ॒त रात्री॑मुभ॒यत॒: परी॑यस उ॒त मि॒त्रो भ॑वसि देव॒ धर्म॑भिः ॥४॥
u॒ta yā॑si savita॒strīṇi॑ roca॒nota sūrya॑sya ra॒śmibhi॒: samu॑cyasi | u॒ta rātrī॑mubha॒yata॒: parī॑yasa u॒ta mi॒tro bha॑vasi deva॒ dharma॑bhiḥ || ४ ||
उ॒तेशि॑षे प्रस॒वस्य॒ त्वमेक॒ इदु॒त पू॒षा भ॑वसि देव॒ याम॑भिः ।
उ॒तेदं विश्वं॒ भुव॑नं॒ वि रा॑जसि श्या॒वाश्व॑स्ते सवित॒ स्तोम॑मानशे ॥५॥
u॒teśi॑ṣe prasa॒vasya॒ tvameka॒ idu॒ta pū॒ṣā bha॑vasi deva॒ yāma॑bhiḥ | u॒tedaṃ viśvaṃ॒ bhuva॑naṃ॒ vi rā॑jasi śyā॒vāśva॑ste savita॒ stoma॑mānaśe || ५ ||