EeseDharmaSanātana Library
433मण्डल 5 · सूक्त 79
10 shlokम॒हे नो॑ अ॒द्य बो॑ध॒योषो॑ रा॒ये दि॒वित्म॑ती ।
यथा॑ चिन्नो॒ अबो॑धयः स॒त्यश्र॑वसि वा॒य्ये सुजा॑ते॒ अश्व॑सूनृते ॥१॥
ma॒he no॑ a॒dya bo॑dha॒yoṣo॑ rā॒ye di॒vitma॑tī | yathā॑ cinno॒ abo॑dhayaḥ sa॒tyaśra॑vasi vā॒yye sujā॑te॒ aśva॑sūnṛte || १ ||
या सु॑नी॒थे शौ॑चद्र॒थे व्यौच्छो॑ दुहितर्दिवः ।
सा व्यु॑च्छ॒ सही॑यसि स॒त्यश्र॑वसि वा॒य्ये सुजा॑ते॒ अश्व॑सूनृते ॥२॥
yā su॑nī॒the śau॑cadra॒the vyauccho॑ duhitardivaḥ | sā vyu॑ccha॒ sahī॑yasi sa॒tyaśra॑vasi vā॒yye sujā॑te॒ aśva॑sūnṛte || २ ||
सा नो॑ अ॒द्याभ॒रद्व॑सु॒र्व्यु॑च्छा दुहितर्दिवः ।
यो व्यौच्छ॒: सही॑यसि स॒त्यश्र॑वसि वा॒य्ये सुजा॑ते॒ अश्व॑सूनृते ॥३॥
sā no॑ a॒dyābha॒radva॑su॒rvyu॑cchā duhitardivaḥ | yo vyauccha॒: sahī॑yasi sa॒tyaśra॑vasi vā॒yye sujā॑te॒ aśva॑sūnṛte || ३ ||
अ॒भि ये त्वा॑ विभावरि॒ स्तोमै॑र्गृ॒णन्ति॒ वह्न॑यः ।
म॒घैर्म॑घोनि सु॒श्रियो॒ दाम॑न्वन्तः सुरा॒तय॒: सुजा॑त॒॑ अश्व॑सूनृते ॥४॥
a॒bhi ye tvā॑ vibhāvari॒ stomai॑rgṛ॒ṇanti॒ vahna॑yaḥ | ma॒ghairma॑ghoni su॒śriyo॒ dāma॑nvantaḥ surā॒taya॒: sujā॑ta॒॑ aśva॑sūnṛte || ४ ||
यच्चि॒द्धि ते॑ ग॒णा इ॒मे छ॒दय॑न्ति म॒घत्त॑ये ।
परि॑ चि॒द् वष्ट॑यो दधु॒र्दद॑तो॒ राधो॒ अह्र॑यं॒ सुजा॑ते॒ अश्व॑सूनृते ॥५॥
yacci॒ddhi te॑ ga॒ṇā i॒me cha॒daya॑nti ma॒ghatta॑ye | pari॑ ci॒d vaṣṭa॑yo dadhu॒rdada॑to॒ rādho॒ ahra॑yaṃ॒ sujā॑te॒ aśva॑sūnṛte || ५ ||
ऐषु॑ धा वी॒रव॒द् यश॒ उषो॑ मघोनि सू॒रिषु॑ ।
ये नो॒ राधां॒स्यह्र॑या म॒घवा॑नो॒ अरा॑सत॒ सुजा॑ते॒ अश्व॑सूनृते ॥६॥
aiṣu॑ dhā vī॒rava॒d yaśa॒ uṣo॑ maghoni sū॒riṣu॑ | ye no॒ rādhāṃ॒syahra॑yā ma॒ghavā॑no॒ arā॑sata॒ sujā॑te॒ aśva॑sūnṛte || ६ ||
तेभ्यो॑ द्यु॒म्नं बृ॒हद् यश॒ उषो॑ मघो॒न्या व॑ह ।
ये नो॒ राधां॒स्यश्व्या॑ ग॒व्या भज॑न्त सू॒रय॒: सुजा॑ते॒ अश्व॑सूनृते ॥७॥
tebhyo॑ dyu॒mnaṃ bṛ॒had yaśa॒ uṣo॑ magho॒nyā va॑ha | ye no॒ rādhāṃ॒syaśvyā॑ ga॒vyā bhaja॑nta sū॒raya॒: sujā॑te॒ aśva॑sūnṛte || ७ ||
उ॒त नो॒ गोम॑ती॒रिष॒ आ व॑हा दुहितर्दिवः ।
सा॒कं सूर्य॑स्य र॒श्मिभि॑: शु॒क्रैः शोच॑द्भिर॒र्चिभि॒: सुजा॑ते॒ अश्व॑सूनृते ॥८॥
u॒ta no॒ goma॑tī॒riṣa॒ ā va॑hā duhitardivaḥ | sā॒kaṃ sūrya॑sya ra॒śmibhi॑: śu॒kraiḥ śoca॑dbhira॒rcibhi॒: sujā॑te॒ aśva॑sūnṛte || ८ ||
व्यु॑च्छा दुहितर्दिवो॒ मा चि॒रं त॑नुथा॒ अप॑: ।
नेत् त्वा॑ स्ते॒नं यथा॑ रि॒पुं तपा॑ति॒ सूरो॑ अ॒र्चिषा॒ सुजा॑ते॒ अश्व॑सूनृते ॥९॥
vyu॑cchā duhitardivo॒ mā ci॒raṃ ta॑nuthā॒ apa॑: | net tvā॑ ste॒naṃ yathā॑ ri॒puṃ tapā॑ti॒ sūro॑ a॒rciṣā॒ sujā॑te॒ aśva॑sūnṛte || ९ ||
ए॒ताव॒द् वेदु॑ष॒स्त्वं भूयो॑ वा॒ दातु॑मर्हसि ।
या स्तो॒तृभ्यो॑ विभावर्यु॒च्छन्ती॒ न प्र॒मीय॑से॒ सुजा॑ते॒ अश्व॑सूनृते ॥१०॥
e॒tāva॒d vedu॑ṣa॒stvaṃ bhūyo॑ vā॒ dātu॑marhasi | yā sto॒tṛbhyo॑ vibhāvaryu॒cchantī॒ na pra॒mīya॑se॒ sujā॑te॒ aśva॑sūnṛte || १० ||