१० पौर आत्रेयः। अश्विनौ। अनुष्टुप्, ८ निचृत्।
कूष्ठो॑ देवावश्विना॒ ऽद्या दि॒वो म॑नावसू । तच्छ्र॑वथो वृषण्वसू॒ अत्रि॑र्वा॒मा वि॑वासति ॥१॥
कुह॒ त्या कुह॒ नु श्रु॒ता दि॒वि दे॒वा नास॑त्या । कस्मि॒न्ना य॑तथो॒ जने॒ को वां॑ न॒दीनां॒ सचा॑ ॥२॥
कं या॑थ॒: कं ह॑ गच्छथ॒: कमच्छा॑ युञ्जाथे॒ रथ॑म् । कस्य॒ ब्रह्मा॑णि रण्यथो व॒यं वा॑मुश्मसी॒ष्टये॑ ॥३॥
पौ॒रं चि॒द्ध्यु॑द॒प्रुतं॒ पौर॑ पौ॒राय॒ जिन्व॑थः । यदीं॑ गृभी॒तता॑तये सिं॒हमि॑व द्रु॒हस्प॒दे ॥४॥
प्र च्यवा॑नाज्जुजु॒रुषो॑ व॒व्रिमत्कं॒ न मु॑ञ्चथः । युवा॒ यदी॑ कृ॒थः पुन॒रा काम॑मृण्वे व॒ध्व॑: ॥५॥
अस्ति॒ हि वा॑मि॒ह स्तो॒ता स्मसि॑ वां सं॒दृशि॑ श्रि॒ये । नू श्रु॒तं म॒ आ ग॑त॒मवो॑भिर्वाजिनीवसू ॥६॥
को वा॑म॒द्य पु॑रू॒णामा व॑व्ने॒ मर्त्या॑नाम् । को विप्रो॑ विप्रवाहसा॒ को य॒ज्ञैर्वा॑जिनीवसू ॥७॥
आ वां॒ रथो॒ रथा॑नां॒ येष्ठो॑ यात्वश्विना । पु॒रू चि॑दस्म॒युस्ति॒र आ॑ङ्गू॒षो मर्त्ये॒ष्वा ॥८॥
शमू॒ षु वां॑ मधूयुवा॒स्माक॑मस्तु चर्कृ॒तिः । अ॒र्वा॒ची॒ना वि॑चेतसा॒ विभि॑: श्ये॒नेव॑ दीयतम् ॥९॥
अश्वि॑ना॒ यद्ध॒ कर्हि॑ चिच्छुश्रू॒यात॑मि॒मं हव॑म् । वस्वी॑रू॒ षु वां॒ भुज॑: पृ॒ञ्चन्ति॒ सु वां॒ पृच॑: ॥१०॥
१० paura ātreyaḥ | aśvinau | anuṣṭup, ८ nicṛt | kūṣṭho॑ devāvaśvinā॒ ’dyā di॒vo ma॑nāvasū | tacchra॑vatho vṛṣaṇvasū॒ atri॑rvā॒mā vi॑vāsati || १ || kuha॒ tyā kuha॒ nu śru॒tā di॒vi de॒vā nāsa॑tyā | kasmi॒nnā ya॑tatho॒ jane॒ ko vāṃ॑ na॒dīnāṃ॒ sacā॑ || २ || kaṃ yā॑tha॒: kaṃ ha॑ gacchatha॒: kamacchā॑ yuñjāthe॒ ratha॑m | kasya॒ brahmā॑ṇi raṇyatho va॒yaṃ vā॑muśmasī॒ṣṭaye॑ || ३ || pau॒raṃ ci॒ddhyu॑da॒prutaṃ॒ paura॑ pau॒rāya॒ jinva॑thaḥ | yadīṃ॑ gṛbhī॒tatā॑taye siṃ॒hami॑va dru॒haspa॒de || ४ || pra cyavā॑nājjuju॒ruṣo॑ va॒vrimatkaṃ॒ na mu॑ñcathaḥ | yuvā॒ yadī॑ kṛ॒thaḥ puna॒rā kāma॑mṛṇve va॒dhva॑: || ५ || asti॒ hi vā॑mi॒ha sto॒tā smasi॑ vāṃ saṃ॒dṛśi॑ śri॒ye | nū śru॒taṃ ma॒ ā ga॑ta॒mavo॑bhirvājinīvasū || ६ || ko vā॑ma॒dya pu॑rū॒ṇāmā va॑vne॒ martyā॑nām | ko vipro॑ vipravāhasā॒ ko ya॒jñairvā॑jinīvasū || ७ || ā vāṃ॒ ratho॒ rathā॑nāṃ॒ yeṣṭho॑ yātvaśvinā | pu॒rū ci॑dasma॒yusti॒ra ā॑ṅgū॒ṣo martye॒ṣvā || ८ || śamū॒ ṣu vāṃ॑ madhūyuvā॒smāka॑mastu carkṛ॒tiḥ | a॒rvā॒cī॒nā vi॑cetasā॒ vibhi॑: śye॒neva॑ dīyatam || ९ || aśvi॑nā॒ yaddha॒ karhi॑ cicchuśrū॒yāta॑mi॒maṃ hava॑m | vasvī॑rū॒ ṣu vāṃ॒ bhuja॑: pṛ॒ñcanti॒ su vāṃ॒ pṛca॑: || १० ||