४ उरुचक्रिरात्रेयः। मित्रावरुणौ। त्रिष्टुप्।
त्री रो॑च॒ना व॑रुण॒ त्रीँरु॒त द्यून् त्रीणि॑ मित्र धारयथो॒ रजां॑सि ।
वा॒वृ॒धा॒नाव॒मतिं॑ क्ष॒त्रिय॒स्याऽनु॑ व्र॒तं रक्ष॑माणावजु॒र्यम् ॥१॥
इरा॑वतीर्वरुण धे॒नवो॑ वां॒ मधु॑मद् वां॒ सिन्ध॑वो मित्र दुह्रे ।
त्रय॑स्तस्थुर्वृष॒भास॑स्तिसृ॒णां धि॒षणा॑नां रेतो॒धा वि द्यु॒मन्त॑: ॥२॥
प्रा॒तर्दे॒वीमदि॑तिं जोहवीमि म॒ध्यंदि॑न॒ उदि॑ता॒ सूर्य॑स्य ।
रा॒ये मि॑त्रावरुणा स॒र्वता॒तेळे॑ तो॒काय॒ तन॑याय॒ शं योः ॥३॥
या ध॒र्तारा॒ रज॑सो रोच॒नस्यो॒तादि॒त्या दि॒व्या पार्थि॑वस्य ।
न वां॑ दे॒वा अ॒मृता॒ आ मि॑नन्ति व्र॒तानि॑ मित्रावरुणा ध्रु॒वाणि॑ ॥४॥
४ urucakrirātreyaḥ | mitrāvaruṇau | triṣṭup | trī ro॑ca॒nā va॑ruṇa॒ trīm̐ru॒ta dyūn trīṇi॑ mitra dhārayatho॒ rajāṃ॑si | vā॒vṛ॒dhā॒nāva॒matiṃ॑ kṣa॒triya॒syā’nu॑ vra॒taṃ rakṣa॑māṇāvaju॒ryam || १ || irā॑vatīrvaruṇa dhe॒navo॑ vāṃ॒ madhu॑mad vāṃ॒ sindha॑vo mitra duhre | traya॑stasthurvṛṣa॒bhāsa॑stisṛ॒ṇāṃ dhi॒ṣaṇā॑nāṃ reto॒dhā vi dyu॒manta॑: || २ || prā॒tarde॒vīmadi॑tiṃ johavīmi ma॒dhyaṃdi॑na॒ udi॑tā॒ sūrya॑sya | rā॒ye mi॑trāvaruṇā sa॒rvatā॒teḷe॑ to॒kāya॒ tana॑yāya॒ śaṃ yoḥ || ३ || yā dha॒rtārā॒ raja॑so roca॒nasyo॒tādi॒tyā di॒vyā pārthi॑vasya | na vāṃ॑ de॒vā a॒mṛtā॒ ā mi॑nanti vra॒tāni॑ mitrāvaruṇā dhru॒vāṇi॑ || ४ ||