७ अर्चनाना आत्रेयः। मित्रावरुणौ। जगती।
ऋत॑स्य गोपा॒वधि॑ तिष्ठथो॒ रथं॒ सत्य॑धर्माणा पर॒मे व्यो॑मनि ।
यमत्र॑ मित्रावरु॒णाव॑थो यु॒वं तस्मै॑ वृ॒ष्टिर्मधु॑मत् पिन्वते दि॒वः ॥१॥
स॒म्राजा॑व॒स्य भुव॑नस्य राजथो॒ मित्रा॑वरुणा वि॒दथे॑ स्व॒र्दृशा॑ ।
वृ॒ष्टिं वां॒ राधो॑ अमृत॒त्वमी॑महे॒ द्यावा॑पृथि॒वी वि च॑रन्ति त॒न्यव॑: ॥२॥
स॒म्राजा॑ उ॒ग्रा वृ॑ष॒भा दि॒वस्पती॑ पृथि॒व्या मि॒त्रावरु॑णा॒ विच॑र्षणी ।
चि॒त्रेभि॑र॒भ्रैरुप॑ तिष्ठथो॒ रवं॒ द्यां व॑र्षयथो॒ असु॑रस्य मा॒यया॑ ॥३॥
मा॒या वां॑ मित्रावरुणा दि॒वि श्रि॒ता सूर्यो॒ ज्योति॑श्चरति चि॒त्रमायु॑धम् ।
तम॒भ्रेण॑ वृ॒ष्ट्या गू॑हथो दि॒वि पर्ज॑न्य द्र॒प्सा मधु॑मन्त ईरते ॥४॥
रथं॑ युञ्जते म॒रुत॑: शु॒भे सु॒खं शूरो॒ न मि॑त्रावरुणा॒ गवि॑ष्टिषु ।
रजां॑सि चि॒त्रा वि च॑रन्ति त॒न्यवो॑ दि॒वः स॑म्राजा॒ पय॑सा न उक्षतम् ॥५॥
वाचं॒ सु मि॑त्रावरुणा॒विरा॑वतीं प॒र्जन्य॑श्चि॒त्रां व॑दति॒ त्विषी॑मतीम् ।
अ॒भ्रा व॑सत म॒रुत॒: सु मा॒यया॒ द्यां व॑र्षयतमरु॒णाम॑रे॒पस॑म् ॥६॥
धर्म॑णा मित्रावरुणा विपश्चिता व्र॒ता र॑क्षेथे॒ असु॑रस्य मा॒यया॑ ।
ऋ॒तेन॒ विश्वं॒ भुव॑नं॒ वि रा॑जथ॒: सूर्य॒मा ध॑त्थो दि॒वि चित्र्यं॒ रथ॑म् ॥७॥
७ arcanānā ātreyaḥ | mitrāvaruṇau | jagatī | ṛta॑sya gopā॒vadhi॑ tiṣṭhatho॒ rathaṃ॒ satya॑dharmāṇā para॒me vyo॑mani | yamatra॑ mitrāvaru॒ṇāva॑tho yu॒vaṃ tasmai॑ vṛ॒ṣṭirmadhu॑mat pinvate di॒vaḥ || १ || sa॒mrājā॑va॒sya bhuva॑nasya rājatho॒ mitrā॑varuṇā vi॒dathe॑ sva॒rdṛśā॑ | vṛ॒ṣṭiṃ vāṃ॒ rādho॑ amṛta॒tvamī॑mahe॒ dyāvā॑pṛthi॒vī vi ca॑ranti ta॒nyava॑: || २ || sa॒mrājā॑ u॒grā vṛ॑ṣa॒bhā di॒vaspatī॑ pṛthi॒vyā mi॒trāvaru॑ṇā॒ vica॑rṣaṇī | ci॒trebhi॑ra॒bhrairupa॑ tiṣṭhatho॒ ravaṃ॒ dyāṃ va॑rṣayatho॒ asu॑rasya mā॒yayā॑ || ३ || mā॒yā vāṃ॑ mitrāvaruṇā di॒vi śri॒tā sūryo॒ jyoti॑ścarati ci॒tramāyu॑dham | tama॒bhreṇa॑ vṛ॒ṣṭyā gū॑hatho di॒vi parja॑nya dra॒psā madhu॑manta īrate || ४ || rathaṃ॑ yuñjate ma॒ruta॑: śu॒bhe su॒khaṃ śūro॒ na mi॑trāvaruṇā॒ gavi॑ṣṭiṣu | rajāṃ॑si ci॒trā vi ca॑ranti ta॒nyavo॑ di॒vaḥ sa॑mrājā॒ paya॑sā na ukṣatam || ५ || vācaṃ॒ su mi॑trāvaruṇā॒virā॑vatīṃ pa॒rjanya॑ści॒trāṃ va॑dati॒ tviṣī॑matīm | a॒bhrā va॑sata ma॒ruta॒: su mā॒yayā॒ dyāṃ va॑rṣayatamaru॒ṇāma॑re॒pasa॑m || ६ || dharma॑ṇā mitrāvaruṇā vipaścitā vra॒tā ra॑kṣethe॒ asu॑rasya mā॒yayā॑ | ṛ॒tena॒ viśvaṃ॒ bhuva॑naṃ॒ vi rā॑jatha॒: sūrya॒mā dha॑ttho di॒vi citryaṃ॒ ratha॑m || ७ ||