१० वसुश्रुत आत्रेयः। अग्निः। पंक्तिः।
अ॒ग्निं तं म॑न्ये॒ यो वसु॒रस्तं॒ यं यन्ति॑ धे॒नव॑: ।
अस्त॒मर्व॑न्त आ॒शवोऽस्तं॒ नित्या॑सो वा॒जिन॒ इषं॑ स्तो॒तृभ्य॒ आ भ॑र ॥१॥
सो अ॒ग्निर्यो वसु॑र्गृ॒णे सं यमा॒यन्ति॑ धे॒नव॑: ।
समर्व॑न्तो रघु॒द्रुव॒: सं सु॑जा॒तास॑: सू॒रय॒ इषं॑ स्तो॒तृभ्य॒ आ भ॑र ॥२॥
अ॒ग्निर्हि वा॒जिनं॑ वि॒शे ददा॑ति वि॒श्वच॑र्षणिः ।
अ॒ग्नी रा॒ये स्वा॒भुवं॒ स प्री॒तो या॑ति॒ वार्य॒मिषं॑ स्तो॒तृभ्य॒ आ भ॑र ॥३॥
आ ते॑ अग्न इधीमहि द्यु॒मन्तं॑ देवा॒जर॑म् ।
यद्ध॒ स्या ते॒ पनी॑यसी स॒मिद् दी॒दय॑ति॒ द्यवीषं॑ स्तो॒तृभ्य॒ आ भ॑र ॥४॥
आ ते॑ अग्न ऋ॒चा ह॒विः शुक्र॑स्य शोचिषस्पते ।
सुश्च॑न्द्र॒ दस्म॒ विश्प॑ते॒ हव्य॑वा॒ट् तुभ्यं॑ हूयत॒ इषं॑ स्तो॒तृभ्य॒ आ भ॑र ॥५॥
प्रो त्ये अ॒ग्नयो॒ऽग्निषु॒ विश्वं॑ पुष्यन्ति॒ वार्य॑म् ।
ते हि॑न्विरे॒ त इ॑न्विरे॒ त इ॑षण्यन्त्यानु॒षगिषं॑ स्तो॒तृभ्य॒ आ भ॑र ॥६॥
तव॒ त्ये अ॑ग्ने अ॒र्चयो॒ महि॑ व्राधन्त वा॒जिन॑: ।
ये पत्व॑भिः श॒फानां॑ व्र॒जा भु॒रन्त॒ गोना॒मिषं॑ स्तो॒तृभ्य॒ आ भ॑र ॥७॥
नवा॑ नो अग्न॒ आ भ॑र स्तो॒तृभ्य॑: सुक्षि॒तीरिष॑: ।
ते स्या॑म॒ य आ॑नृ॒चुस्त्वादू॑तासो॒ दमे॑दम॒ इषं॑ स्तो॒तृभ्य॒ आ भ॑र ॥८॥
उ॒भे सु॑श्चन्द्र स॒र्पिषो॒ दर्वी॑ श्रीणीष आ॒सनि॑ ।
उ॒तो न॒ उत् पु॑पूर्या उ॒क्थेषु॑ शवसस्पत॒ इषं॑ स्तो॒तृभ्य॒ आ भ॑र ॥९॥
ए॒वाँ अ॒ग्निम॑जुर्यमुर्गी॒र्भिर्य॒ज्ञेभि॑रानु॒षक् ।
दध॑द॒स्मे सु॒वीर्य॑मु॒त त्यदा॒श्वश्व्य॒मिषं॑ स्तो॒तृभ्य॒ आ भ॑र ॥१०॥
१० vasuśruta ātreyaḥ | agniḥ | paṃktiḥ | a॒gniṃ taṃ ma॑nye॒ yo vasu॒rastaṃ॒ yaṃ yanti॑ dhe॒nava॑: | asta॒marva॑nta ā॒śavo’staṃ॒ nityā॑so vā॒jina॒ iṣaṃ॑ sto॒tṛbhya॒ ā bha॑ra || १ || so a॒gniryo vasu॑rgṛ॒ṇe saṃ yamā॒yanti॑ dhe॒nava॑: | samarva॑nto raghu॒druva॒: saṃ su॑jā॒tāsa॑: sū॒raya॒ iṣaṃ॑ sto॒tṛbhya॒ ā bha॑ra || २ || a॒gnirhi vā॒jinaṃ॑ vi॒śe dadā॑ti vi॒śvaca॑rṣaṇiḥ | a॒gnī rā॒ye svā॒bhuvaṃ॒ sa prī॒to yā॑ti॒ vārya॒miṣaṃ॑ sto॒tṛbhya॒ ā bha॑ra || ३ || ā te॑ agna idhīmahi dyu॒mantaṃ॑ devā॒jara॑m | yaddha॒ syā te॒ panī॑yasī sa॒mid dī॒daya॑ti॒ dyavīṣaṃ॑ sto॒tṛbhya॒ ā bha॑ra || ४ || ā te॑ agna ṛ॒cā ha॒viḥ śukra॑sya śociṣaspate | suśca॑ndra॒ dasma॒ viśpa॑te॒ havya॑vā॒ṭ tubhyaṃ॑ hūyata॒ iṣaṃ॑ sto॒tṛbhya॒ ā bha॑ra || ५ || pro tye a॒gnayo॒’gniṣu॒ viśvaṃ॑ puṣyanti॒ vārya॑m | te hi॑nvire॒ ta i॑nvire॒ ta i॑ṣaṇyantyānu॒ṣagiṣaṃ॑ sto॒tṛbhya॒ ā bha॑ra || ६ || tava॒ tye a॑gne a॒rcayo॒ mahi॑ vrādhanta vā॒jina॑: | ye patva॑bhiḥ śa॒phānāṃ॑ vra॒jā bhu॒ranta॒ gonā॒miṣaṃ॑ sto॒tṛbhya॒ ā bha॑ra || ७ || navā॑ no agna॒ ā bha॑ra sto॒tṛbhya॑: sukṣi॒tīriṣa॑: | te syā॑ma॒ ya ā॑nṛ॒custvādū॑tāso॒ dame॑dama॒ iṣaṃ॑ sto॒tṛbhya॒ ā bha॑ra || ८ || u॒bhe su॑ścandra sa॒rpiṣo॒ darvī॑ śrīṇīṣa ā॒sani॑ | u॒to na॒ ut pu॑pūryā u॒ktheṣu॑ śavasaspata॒ iṣaṃ॑ sto॒tṛbhya॒ ā bha॑ra || ९ || e॒vām̐ a॒gnima॑juryamurgī॒rbhirya॒jñebhi॑rānu॒ṣak | dadha॑da॒sme su॒vīrya॑mu॒ta tyadā॒śvaśvya॒miṣaṃ॑ sto॒tṛbhya॒ ā bha॑ra || १० ||