९ श्यावाश्व आत्रेयः। मरुतः। बृहती, ३, ७ सतोबृहती ।
अग्ने॒ शर्ध॑न्त॒मा ग॒णं पि॒ष्टं रु॒क्मेभि॑र॒ञ्जिभि॑: ।
विशो॑ अ॒द्य म॒रुता॒मव॑ ह्वये दि॒वश्चि॑द् रोच॒नादधि॑ ॥१॥
यथा॑ चि॒न्मन्य॑से हृ॒दा तदिन्मे॑ जग्मुरा॒शस॑: ।
ये ते॒ नेदि॑ष्ठं॒ हव॑नान्या॒गम॒न् तान् व॑र्ध भी॒मसं॑दृशः ॥२॥
मी॒ळहुष्म॑तीव पृथि॒वी परा॑हता॒ मद॑न्त्येत्य॒स्मदा ।
ऋक्षो॒ न वो॑ मरुत॒: शिमी॑वाँ॒ अमो॑ दु॒ध्रो गौरि॑व भीम॒युः ॥३॥
नि ये रि॒णन्त्योज॑सा॒ वृथा॒ गावो॒ न दु॒र्धुर॑: ।
अश्मा॑नं चित् स्वर्यं१ पर्व॑तं गि॒रिं प्र च्या॑वयन्ति॒ याम॑भिः ॥४॥
उत् ति॑ष्ठ नू॒नमे॑षां॒ स्तोमै॒: समु॑क्षितानाम् ।
म॒रुतां॑ पुरु॒तम॒मपू॑र्व्यं॒ गवां॒ सर्ग॑मिव ह्वये ॥५॥
यु॒ङ्ग्ध्वं ह्यरु॑षी॒ रथे॑ यु॒ङ्ग्ध्वं रथे॑षु रो॒हित॑: ।
यु॒ङ्ग्ध्वं हरी॑ अजि॒रा धु॒रि वोळह॑वे॒ वहि॑ष्ठा धु॒रि वोळह॑वे ॥६॥
उ॒त स्य वा॒ज्य॑रु॒षस्तु॑वि॒ष्वणि॑रि॒ह स्म॑ धायि दर्श॒तः ।
मा वो॒ यामे॑षु मरुतश्चि॒रं क॑र॒त् प्र तं रथे॑षु चोदत ॥७॥
रथं॒ नु मारु॑तं व॒यं श्र॑व॒स्युमा हु॑वामहे ।
आ यस्मि॑न् त॒स्थौ सु॒रणा॑नि॒ बिभ्र॑ती॒ सचा॑ म॒रुत्सु॑ रोद॒सी ॥८॥
तं व॒: शर्धं॑ रथे॒शुभं॑ त्वे॒षं प॑न॒स्युमा हु॑वे ।
यस्मि॒न् त्सुजा॑ता सु॒भगा॑ मही॒यते॒ सचा॑ म॒रुत्सु॑ मीळहु॒षी ॥९॥
९ śyāvāśva ātreyaḥ | marutaḥ | bṛhatī, ३, ७ satobṛhatī | agne॒ śardha॑nta॒mā ga॒ṇaṃ pi॒ṣṭaṃ ru॒kmebhi॑ra॒ñjibhi॑: | viśo॑ a॒dya ma॒rutā॒mava॑ hvaye di॒vaści॑d roca॒nādadhi॑ || १ || yathā॑ ci॒nmanya॑se hṛ॒dā tadinme॑ jagmurā॒śasa॑: | ye te॒ nedi॑ṣṭhaṃ॒ hava॑nānyā॒gama॒n tān va॑rdha bhī॒masaṃ॑dṛśaḥ || २ || mī॒ḷahuṣma॑tīva pṛthi॒vī parā॑hatā॒ mada॑ntyetya॒smadā | ṛkṣo॒ na vo॑ maruta॒: śimī॑vām॒̐ amo॑ du॒dhro gauri॑va bhīma॒yuḥ || ३ || ni ye ri॒ṇantyoja॑sā॒ vṛthā॒ gāvo॒ na du॒rdhura॑: | aśmā॑naṃ cit svaryaṃ१ parva॑taṃ gi॒riṃ pra cyā॑vayanti॒ yāma॑bhiḥ || ४ || ut ti॑ṣṭha nū॒name॑ṣāṃ॒ stomai॒: samu॑kṣitānām | ma॒rutāṃ॑ puru॒tama॒mapū॑rvyaṃ॒ gavāṃ॒ sarga॑miva hvaye || ५ || yu॒ṅgdhvaṃ hyaru॑ṣī॒ rathe॑ yu॒ṅgdhvaṃ rathe॑ṣu ro॒hita॑: | yu॒ṅgdhvaṃ harī॑ aji॒rā dhu॒ri voḷaha॑ve॒ vahi॑ṣṭhā dhu॒ri voḷaha॑ve || ६ || u॒ta sya vā॒jya॑ru॒ṣastu॑vi॒ṣvaṇi॑ri॒ha sma॑ dhāyi darśa॒taḥ | mā vo॒ yāme॑ṣu marutaści॒raṃ ka॑ra॒t pra taṃ rathe॑ṣu codata || ७ || rathaṃ॒ nu māru॑taṃ va॒yaṃ śra॑va॒syumā hu॑vāmahe | ā yasmi॑n ta॒sthau su॒raṇā॑ni॒ bibhra॑tī॒ sacā॑ ma॒rutsu॑ roda॒sī || ८ || taṃ va॒: śardhaṃ॑ rathe॒śubhaṃ॑ tve॒ṣaṃ pa॑na॒syumā hu॑ve | yasmi॒n tsujā॑tā su॒bhagā॑ mahī॒yate॒ sacā॑ ma॒rutsu॑ mīḷahu॒ṣī || ९ ||