५ वव्रिरात्रेयः। अग्निः। गायत्री, ३-४ अनुष्टुप्, ५ विराड् रूपा।
अ॒भ्य॑व॒स्थाः प्र जा॑यन्ते॒ प्र व॒व्रेर्व॒व्रिश्चि॑केत । उ॒पस्थे॑ मा॒तुर्वि च॑ष्टे ॥१॥
जु॒हु॒रे वि चि॒तय॒न्तोऽनि॑मिषं नृ॒म्णं पा॑न्ति । आ दृ॒ळहां पुरं॑ विविशुः ॥२॥
आ श्वै॑त्रे॒यस्य॑ ज॒न्तवो॑ द्यु॒मद् व॑र्धन्त कृ॒ष्टय॑: ।
नि॒ष्कग्री॑वो बृ॒हदु॑क्थ ए॒ना मध्वा॒ न वा॑ज॒युः ॥३॥
प्रि॒यं दु॒ग्धं न काम्य॒मजा॑मि जा॒म्योः सचा॑ ।
घ॒र्मो न वाज॑जठ॒रोऽद॑ब्ध॒: शश्व॑तो॒ दभ॑: ॥४॥
क्रीळ॑न् नो रश्म॒ आ भु॑व॒: सं भस्म॑ना वा॒युना॒ वेवि॑दानः ।
ता अ॑स्य सन् धृ॒षजो॒ न ति॒ग्माः सुसं॑शिता व॒क्ष्यो॑ वक्षणे॒स्थाः ॥५॥
५ vavrirātreyaḥ | agniḥ | gāyatrī, ३-४ anuṣṭup, ५ virāḍ rūpā | a॒bhya॑va॒sthāḥ pra jā॑yante॒ pra va॒vrerva॒vriści॑keta | u॒pasthe॑ mā॒turvi ca॑ṣṭe || १ || ju॒hu॒re vi ci॒taya॒nto’ni॑miṣaṃ nṛ॒mṇaṃ pā॑nti | ā dṛ॒ḷahāṃ puraṃ॑ viviśuḥ || २ || ā śvai॑tre॒yasya॑ ja॒ntavo॑ dyu॒mad va॑rdhanta kṛ॒ṣṭaya॑: | ni॒ṣkagrī॑vo bṛ॒hadu॑ktha e॒nā madhvā॒ na vā॑ja॒yuḥ || ३ || pri॒yaṃ du॒gdhaṃ na kāmya॒majā॑mi jā॒myoḥ sacā॑ | gha॒rmo na vāja॑jaṭha॒ro’da॑bdha॒: śaśva॑to॒ dabha॑: || ४ || krīḷa॑n no raśma॒ ā bhu॑va॒: saṃ bhasma॑nā vā॒yunā॒ vevi॑dānaḥ | tā a॑sya san dhṛ॒ṣajo॒ na ti॒gmāḥ susaṃ॑śitā va॒kṣyo॑ vakṣaṇe॒sthāḥ || ५ ||