५ पूरुरात्रेयः। अग्निः। अनुष्टुप्, ५ पंक्तिः।
आ य॒ज्ञैर्दे॑व॒ मर्त्य॑ इ॒त्था तव्यां॑समू॒तये॑ ।
अ॒ग्निं कृ॒ते स्व॑ध्व॒रे पू॒रुरी॑ळी॒ताव॑से ॥१॥
अस्य॒ हि स्वय॑शस्तर आ॒सा वि॑धर्म॒न् मन्य॑से ।
तं नाकं॑ चि॒त्रशो॑चिषं म॒न्द्रं प॒रो म॑नी॒षया॑ ॥२॥
अ॒स्य वासा उ॑ अ॒र्चिषा॒ य आयु॑क्त तु॒जा गि॒रा ।
दि॒वो न यस्य॒ रेत॑सा बृ॒हच्छोच॑न्त्य॒र्चय॑: ॥३॥
अ॒स्य क्रत्वा॒ विचे॑तसो द॒स्मस्य॒ वसु॒ रथ॒ आ ।
अधा॒ विश्वा॑सु॒ हव्यो॒ऽग्निर्वि॒क्षु प्र श॑स्यते ॥४॥
नू न॒ इद्धि वार्य॑मा॒सा स॑चन्त सू॒रय॑: ।
ऊर्जो॑ नपाद॒भिष्ट॑ये पा॒हि श॒ग्धि स्व॒स्तय॑ उ॒तैधि॑ पृ॒त्सु नो॑ वृ॒धे ॥५॥
५ pūrurātreyaḥ | agniḥ | anuṣṭup, ५ paṃktiḥ | ā ya॒jñairde॑va॒ martya॑ i॒tthā tavyāṃ॑samū॒taye॑ | a॒gniṃ kṛ॒te sva॑dhva॒re pū॒rurī॑ḷī॒tāva॑se || १ || asya॒ hi svaya॑śastara ā॒sā vi॑dharma॒n manya॑se | taṃ nākaṃ॑ ci॒traśo॑ciṣaṃ ma॒ndraṃ pa॒ro ma॑nī॒ṣayā॑ || २ || a॒sya vāsā u॑ a॒rciṣā॒ ya āyu॑kta tu॒jā gi॒rā | di॒vo na yasya॒ reta॑sā bṛ॒hacchoca॑ntya॒rcaya॑: || ३ || a॒sya kratvā॒ vice॑taso da॒smasya॒ vasu॒ ratha॒ ā | adhā॒ viśvā॑su॒ havyo॒’gnirvi॒kṣu pra śa॑syate || ४ || nū na॒ iddhi vārya॑mā॒sā sa॑canta sū॒raya॑: | ūrjo॑ napāda॒bhiṣṭa॑ye pā॒hi śa॒gdhi sva॒staya॑ u॒taidhi॑ pṛ॒tsu no॑ vṛ॒dhe || ५ ||