५ पूरुरात्रेयः। अग्निः। अनुष्टुप्, ५ पंक्तिः।
बृ॒हद् वयो॒ हि भा॒नवेऽर्चा॑ दे॒वाया॒ग्नये॑ ।
यं मि॒त्रं न प्रश॑स्तिभि॒र्मर्ता॑सो दधि॒रे पु॒रः ॥१॥
स हि द्युभि॒र्जना॑नां॒ होता॒ दक्ष॑स्य बा॒ह्वोः ।
वि ह॒व्यम॒ग्निरा॑नु॒षग्भगो॒ न वार॑मृण्वति ॥२॥
अ॒स्य स्तोमे॑ म॒घोन॑: स॒ख्ये वृ॒द्धशो॑चिषः ।
विश्वा॒ यस्मि॑न् तुवि॒ष्वणि॒ सम॒र्ये शुष्म॑माद॒धुः ॥३॥
अधा॒ ह्य॑ग्न एषां सु॒वीर्य॑स्य मं॒हना॑ ।
तमिद् य॒ह्वं न रोद॑सी॒ परि॒ श्रवो॑ बभूवतुः ॥४॥
नू न॒ एहि॒ वार्य॒मग्ने॑ गृणा॒न आ भ॑र ।
ये व॒यं ये च॑ सू॒रय॑: स्व॒स्ति धाम॑हे॒ सचो॒तैधि॑ पृ॒त्सु नो॑ वृ॒धे ॥५॥
५ pūrurātreyaḥ | agniḥ | anuṣṭup, ५ paṃktiḥ | bṛ॒had vayo॒ hi bhā॒nave’rcā॑ de॒vāyā॒gnaye॑ | yaṃ mi॒traṃ na praśa॑stibhi॒rmartā॑so dadhi॒re pu॒raḥ || १ || sa hi dyubhi॒rjanā॑nāṃ॒ hotā॒ dakṣa॑sya bā॒hvoḥ | vi ha॒vyama॒gnirā॑nu॒ṣagbhago॒ na vāra॑mṛṇvati || २ || a॒sya stome॑ ma॒ghona॑: sa॒khye vṛ॒ddhaśo॑ciṣaḥ | viśvā॒ yasmi॑n tuvi॒ṣvaṇi॒ sama॒rye śuṣma॑māda॒dhuḥ || ३ || adhā॒ hya॑gna eṣāṃ su॒vīrya॑sya maṃ॒hanā॑ | tamid ya॒hvaṃ na roda॑sī॒ pari॒ śravo॑ babhūvatuḥ || ४ || nū na॒ ehi॒ vārya॒magne॑ gṛṇā॒na ā bha॑ra | ye va॒yaṃ ye ca॑ sū॒raya॑: sva॒sti dhāma॑he॒ saco॒taidhi॑ pṛ॒tsu no॑ vṛ॒dhe || ५ ||