५ धरुण अङ्गिरसः। अग्निः । त्रिष्टुप्।
प्र वे॒धसे॑ क॒वये॒ वेद्या॑य॒ गिरं॑ भरे य॒शसे॑ पू॒र्व्याय॑ ।
घृ॒तप्र॑सत्तो॒ असु॑रः सु॒शेवो॑ रा॒यो ध॒र्ता ध॒रुणो॒ वस्वो॑ अ॒ग्निः ॥१॥
ऋ॒तेन॑ ऋ॒तं ध॒रुणं॑ धारयन्त य॒ज्ञस्य॑ शा॒के प॑र॒मे व्यो॑मन् ।
दि॒वो धर्म॑न् ध॒रुणे॑ से॒दुषो॒ नॄञ्जा॒तैरजा॑ताँ अ॒भि ये न॑न॒क्षुः ॥२॥
अं॒हो॒युव॑स्त॒न्व॑स्तन्वते॒ वि वयो॑ म॒हद् दु॒ष्टरं॑ पू॒र्व्याय॑ ।
स सं॒वतो॒ नव॑जातस्तुतुर्यात् सिं॒हं न क्रु॒द्धम॒भित॒: परि॑ ष्ठुः ॥३॥
मा॒तेव॒ यद् भर॑से पप्रथा॒नो जनं॑जनं॒ धाय॑से॒ चक्ष॑से च ।
वयो॑वयो जरसे॒ यद्दधा॑न॒: परि॒ त्मना॒ विषु॑रूपो जिगासि ॥४॥
वाजो॒ नु ते॒ शव॑सस्पा॒त्वन्त॑मु॒रुं दोघं॑ ध॒रुणं॑ देव रा॒यः ।
प॒दं न ता॒युर्गुहा॒ दधा॑नो म॒हो रा॒ये चि॒तय॒न्नत्रि॑मस्पः ॥५॥
५ dharuṇa aṅgirasaḥ | agniḥ | triṣṭup | pra ve॒dhase॑ ka॒vaye॒ vedyā॑ya॒ giraṃ॑ bhare ya॒śase॑ pū॒rvyāya॑ | ghṛ॒tapra॑satto॒ asu॑raḥ su॒śevo॑ rā॒yo dha॒rtā dha॒ruṇo॒ vasvo॑ a॒gniḥ || १ || ṛ॒tena॑ ṛ॒taṃ dha॒ruṇaṃ॑ dhārayanta ya॒jñasya॑ śā॒ke pa॑ra॒me vyo॑man | di॒vo dharma॑n dha॒ruṇe॑ se॒duṣo॒ nṝñjā॒tairajā॑tām̐ a॒bhi ye na॑na॒kṣuḥ || २ || aṃ॒ho॒yuva॑sta॒nva॑stanvate॒ vi vayo॑ ma॒had du॒ṣṭaraṃ॑ pū॒rvyāya॑ | sa saṃ॒vato॒ nava॑jātastuturyāt siṃ॒haṃ na kru॒ddhama॒bhita॒: pari॑ ṣṭhuḥ || ३ || mā॒teva॒ yad bhara॑se paprathā॒no janaṃ॑janaṃ॒ dhāya॑se॒ cakṣa॑se ca | vayo॑vayo jarase॒ yaddadhā॑na॒: pari॒ tmanā॒ viṣu॑rūpo jigāsi || ४ || vājo॒ nu te॒ śava॑saspā॒tvanta॑mu॒ruṃ doghaṃ॑ dha॒ruṇaṃ॑ deva rā॒yaḥ | pa॒daṃ na tā॒yurguhā॒ dadhā॑no ma॒ho rā॒ye ci॒taya॒nnatri॑maspaḥ || ५ ||