६ सुतंभर आत्रेयः। अग्निः । गायत्री।
अ॒ग्निं स्तोमे॑न बोधय समिधा॒नो अम॑र्त्यम् । ह॒व्या दे॒वेषु॑ नो दधत् ॥१॥
तम॑ध्व॒रेष्वी॑ळते दे॒वं मर्ता॒ अम॑र्त्यम् । यजि॑ष्ठं॒ मानु॑षे॒ जने॑ ॥२॥
तं हि शश्व॑न्त॒ ईळ॑ते स्रु॒चा दे॒वं घृ॑त॒श्चुता॑ । अ॒ग्निं ह॒व्याय॒ वोळह॑वे ॥३॥
अ॒ग्निर्जा॒तो अ॑रोचत॒ घ्नन् दस्यू॒ञ्ज्योति॑षा॒ तम॑: । अवि॑न्द॒द् गा अ॒पः स्व॑: ॥४॥
अ॒ग्निमी॒ळेन्यं॑ क॒विं घृ॒तपृ॑ष्ठं सपर्यत । वेतु॑ मे शृ॒णव॒द्धव॑म् ॥५॥
अ॒ग्निं घृ॒तेन॑ वावृधु॒: स्तोमे॑भिर्वि॒श्वच॑र्षणिम् । स्वा॒धीभि॑र्वच॒स्युभि॑: ॥६॥
६ sutaṃbhara ātreyaḥ | agniḥ | gāyatrī | a॒gniṃ stome॑na bodhaya samidhā॒no ama॑rtyam | ha॒vyā de॒veṣu॑ no dadhat || १ || tama॑dhva॒reṣvī॑ḷate de॒vaṃ martā॒ ama॑rtyam | yaji॑ṣṭhaṃ॒ mānu॑ṣe॒ jane॑ || २ || taṃ hi śaśva॑nta॒ īḷa॑te sru॒cā de॒vaṃ ghṛ॑ta॒ścutā॑ | a॒gniṃ ha॒vyāya॒ voḷaha॑ve || ३ || a॒gnirjā॒to a॑rocata॒ ghnan dasyū॒ñjyoti॑ṣā॒ tama॑: | avi॑nda॒d gā a॒paḥ sva॑: || ४ || a॒gnimī॒ḷenyaṃ॑ ka॒viṃ ghṛ॒tapṛ॑ṣṭhaṃ saparyata | vetu॑ me śṛ॒ṇava॒ddhava॑m || ५ || a॒gniṃ ghṛ॒tena॑ vāvṛdhu॒: stome॑bhirvi॒śvaca॑rṣaṇim | svā॒dhībhi॑rvaca॒syubhi॑: || ६ ||