६ सुतंभर आत्रेयः। अग्निः । त्रिष्टुप्।
प्राग्नये॑ बृह॒ते य॒ज्ञिया॑य ऋ॒तस्य॒ वृष्णे॒ असु॑राय॒ मन्म॑ ।
घृ॒तं न य॒ज्ञ आ॒स्ये॒३ सुपू॑तं॒ गिरं॑ भरे वृष॒भाय॑ प्रती॒चीम् ॥१॥
ऋ॒तं चि॑कित्व ऋ॒तमिच्चि॑किद्ध्यृ॒तस्य॒ धारा॒ अनु॑ तृन्धि पू॒र्वीः ।
नाहं या॒तुं सह॑सा॒ न द्व॒येन॑ ऋ॒तं स॑पाम्यरु॒षस्य॒ वृष्ण॑: ॥२॥
कया॑ नो अग्न ऋ॒तय॑न्नृ॒तेन॒ भुवो॒ नवे॑दा उ॒चथ॑स्य॒ नव्य॑: ।
वेदा॑ मे दे॒व ऋ॑तु॒पा ऋ॑तू॒नां नाहं पतिं॑ सनि॒तुर॒स्य रा॒यः ॥३॥
के ते॑ अग्ने रि॒पवे॒ बन्ध॑नास॒: के पा॒यव॑: सनिषन्त द्यु॒मन्त॑: ।
के धा॒सिम॑ग्ने॒ अनृ॑तस्य पान्ति॒ क आस॑तो॒ वच॑सः सन्ति गो॒पाः ॥४॥
सखा॑यस्ते॒ विषु॑णा अग्न ए॒ते शि॒वास॒: सन्तो॒ अशि॑वा अभूवन् ।
अधू॑र्षत स्व॒यमे॒ते वचो॑भिर्ऋजूय॒ते वृ॑जि॒नानि॑ ब्रु॒वन्त॑: ॥५॥
यस्ते॑ अग्ने॒ नम॑सा य॒ज्ञमीट्ट॑ ऋ॒तं स पा॑त्यरु॒षस्य॒ वृष्ण॑: ।
तस्य॒ क्षय॑: पृ॒थुरा सा॒धुरे॑तु प्र॒सर्स्रा॑णस्य॒ नहु॑षस्य॒ शेष॑: ॥६॥
६ sutaṃbhara ātreyaḥ | agniḥ | triṣṭup | prāgnaye॑ bṛha॒te ya॒jñiyā॑ya ṛ॒tasya॒ vṛṣṇe॒ asu॑rāya॒ manma॑ | ghṛ॒taṃ na ya॒jña ā॒sye॒३ supū॑taṃ॒ giraṃ॑ bhare vṛṣa॒bhāya॑ pratī॒cīm || १ || ṛ॒taṃ ci॑kitva ṛ॒tamicci॑kiddhyṛ॒tasya॒ dhārā॒ anu॑ tṛndhi pū॒rvīḥ | nāhaṃ yā॒tuṃ saha॑sā॒ na dva॒yena॑ ṛ॒taṃ sa॑pāmyaru॒ṣasya॒ vṛṣṇa॑: || २ || kayā॑ no agna ṛ॒taya॑nnṛ॒tena॒ bhuvo॒ nave॑dā u॒catha॑sya॒ navya॑: | vedā॑ me de॒va ṛ॑tu॒pā ṛ॑tū॒nāṃ nāhaṃ patiṃ॑ sani॒tura॒sya rā॒yaḥ || ३ || ke te॑ agne ri॒pave॒ bandha॑nāsa॒: ke pā॒yava॑: saniṣanta dyu॒manta॑: | ke dhā॒sima॑gne॒ anṛ॑tasya pānti॒ ka āsa॑to॒ vaca॑saḥ santi go॒pāḥ || ४ || sakhā॑yaste॒ viṣu॑ṇā agna e॒te śi॒vāsa॒: santo॒ aśi॑vā abhūvan | adhū॑rṣata sva॒yame॒te vaco॑bhirṛjūya॒te vṛ॑ji॒nāni॑ bru॒vanta॑: || ५ || yaste॑ agne॒ nama॑sā ya॒jñamīṭṭa॑ ṛ॒taṃ sa pā॑tyaru॒ṣasya॒ vṛṣṇa॑: | tasya॒ kṣaya॑: pṛ॒thurā sā॒dhure॑tu pra॒sarsrā॑ṇasya॒ nahu॑ṣasya॒ śeṣa॑: || ६ ||