६ सुतंभर आत्रेयः। अग्निः । जगती।
जन॑स्य गो॒पा अ॑जनिष्ट॒ जागृ॑विर॒ग्निः सु॒दक्ष॑: सुवि॒ताय॒ नव्य॑से ।
घृ॒तप्र॑तीको बृह॒ता दि॑वि॒स्पृशा॑ द्यु॒मद् वि भा॑ति भर॒तेभ्य॒: शुचि॑: ॥१॥
य॒ज्ञस्य॑ के॒तुं प्र॑थ॒मं पु॒रोहि॑तम॒ग्निं नर॑स्त्रिषध॒स्थे समी॑धिरे ।
इन्द्रे॑ण दे॒वैः स॒रथं॒ स ब॒र्हिषि॒ सीद॒न्नि होता॑ य॒जथा॑य सु॒क्रतु॑: ॥२॥
अस॑म्मृष्टो जायसे मा॒त्रोः शुचि॑र्म॒न्द्रः क॒विरुद॑तिष्ठो वि॒वस्व॑तः ।
घृ॒तेन॑ त्वावर्धयन्नग्न आहुत धू॒मस्ते॑ के॒तुर॑भवद् दि॒वि श्रि॒तः ॥३॥
अ॒ग्निर्नो॑ य॒ज्ञमुप॑ वेतु साधु॒या ऽग्निं नरो॒ वि भ॑रन्ते गृ॒हेगृ॑हे ।
अ॒ग्निर्दू॒तो अ॑भवद्धव्य॒वाह॑नो॒ऽग्निं वृ॑णा॒ना वृ॑णते क॒विक्र॑तुम् ॥४॥
तुभ्ये॒दम॑ग्ने॒ मधु॑मत्तमं॒ वच॒स्तुभ्यं॑ मनी॒षा इ॒यम॑स्तु॒ शं हृ॒दे ।
त्वां गिर॒: सिन्धु॑मिवा॒वनी॑र्म॒हीरा पृ॑णन्ति॒ शव॑सा व॒र्धय॑न्ति च ॥५॥
त्वाम॑ग्ने॒ अङ्गि॑रसो॒ गुहा॑ हि॒तमन्व॑विन्दञ्छिश्रिया॒णं वने॑वने ।
स जा॑यसे म॒थ्यमा॑न॒: सहो॑ म॒हत् त्वामा॑हु॒: सह॑सस्पु॒त्रम॑ङ्गिरः ॥६॥
६ sutaṃbhara ātreyaḥ | agniḥ | jagatī | jana॑sya go॒pā a॑janiṣṭa॒ jāgṛ॑vira॒gniḥ su॒dakṣa॑: suvi॒tāya॒ navya॑se | ghṛ॒tapra॑tīko bṛha॒tā di॑vi॒spṛśā॑ dyu॒mad vi bhā॑ti bhara॒tebhya॒: śuci॑: || १ || ya॒jñasya॑ ke॒tuṃ pra॑tha॒maṃ pu॒rohi॑tama॒gniṃ nara॑striṣadha॒sthe samī॑dhire | indre॑ṇa de॒vaiḥ sa॒rathaṃ॒ sa ba॒rhiṣi॒ sīda॒nni hotā॑ ya॒jathā॑ya su॒kratu॑: || २ || asa॑mmṛṣṭo jāyase mā॒troḥ śuci॑rma॒ndraḥ ka॒viruda॑tiṣṭho vi॒vasva॑taḥ | ghṛ॒tena॑ tvāvardhayannagna āhuta dhū॒maste॑ ke॒tura॑bhavad di॒vi śri॒taḥ || ३ || a॒gnirno॑ ya॒jñamupa॑ vetu sādhu॒yā ’gniṃ naro॒ vi bha॑rante gṛ॒hegṛ॑he | a॒gnirdū॒to a॑bhavaddhavya॒vāha॑no॒’gniṃ vṛ॑ṇā॒nā vṛ॑ṇate ka॒vikra॑tum || ४ || tubhye॒dama॑gne॒ madhu॑mattamaṃ॒ vaca॒stubhyaṃ॑ manī॒ṣā i॒yama॑stu॒ śaṃ hṛ॒de | tvāṃ gira॒: sindhu॑mivā॒vanī॑rma॒hīrā pṛ॑ṇanti॒ śava॑sā va॒rdhaya॑nti ca || ५ || tvāma॑gne॒ aṅgi॑raso॒ guhā॑ hi॒tamanva॑vindañchiśriyā॒ṇaṃ vane॑vane | sa jā॑yase ma॒thyamā॑na॒: saho॑ ma॒hat tvāmā॑hu॒: saha॑saspu॒trama॑ṅgiraḥ || ६ ||