५ वामदेवो गौतमः। वायुः। अनुष्टुप्।
वि॒हि होत्रा॒ अवी॑ता॒ विपो॒ न रायो॑ अ॒र्यः ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥१॥
नि॒र्यु॒वा॒णो अश॑स्तीर्नि॒युत्वाँ॒ इन्द्र॑सारथिः ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥२॥
अनु॑ कृ॒ष्णे वसु॑धिती ये॒माते॑ वि॒श्वपे॑शसा ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥३॥
वह॑न्तु त्वा मनो॒युजो॑ यु॒क्तासो॑ नव॒तिर्नव॑ ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥४॥
वायो॑ श॒तं हरी॑णां यु॒वस्व॒ पोष्या॑णाम् ।
उ॒त वा॑ ते सह॒स्रिणो॒ रथ॒ आ या॑तु॒ पाज॑सा ॥५॥
५ vāmadevo gautamaḥ | vāyuḥ | anuṣṭup | vi॒hi hotrā॒ avī॑tā॒ vipo॒ na rāyo॑ a॒ryaḥ | vāya॒vā ca॒ndreṇa॒ rathe॑na yā॒hi su॒tasya॑ pī॒taye॑ || १ || ni॒ryu॒vā॒ṇo aśa॑stīrni॒yutvām॒̐ indra॑sārathiḥ | vāya॒vā ca॒ndreṇa॒ rathe॑na yā॒hi su॒tasya॑ pī॒taye॑ || २ || anu॑ kṛ॒ṣṇe vasu॑dhitī ye॒māte॑ vi॒śvape॑śasā | vāya॒vā ca॒ndreṇa॒ rathe॑na yā॒hi su॒tasya॑ pī॒taye॑ || ३ || vaha॑ntu tvā mano॒yujo॑ yu॒ktāso॑ nava॒tirnava॑ | vāya॒vā ca॒ndreṇa॒ rathe॑na yā॒hi su॒tasya॑ pī॒taye॑ || ४ || vāyo॑ śa॒taṃ harī॑ṇāṃ yu॒vasva॒ poṣyā॑ṇām | u॒ta vā॑ te saha॒sriṇo॒ ratha॒ ā yā॑tu॒ pāja॑sā || ५ ||