९ गाथिनो विश्वामित्रः। अग्निः। बृहती, ९ त्रिष्टुप्।
सखा॑यस्त्वा ववृमहे दे॒वं मर्ता॑स ऊ॒तये॑ ।
अ॒पां नपा॑तं सु॒भगं॑ सु॒दीदि॑तिं सु॒प्रतू॑र्तिमने॒हस॑म् ॥१॥
काय॑मानो व॒ना त्वं यन्मा॒तॄरज॑गन्न॒पः ।
न तत् ते॑ अग्ने प्र॒मृषे॑ नि॒वर्त॑नं॒ यद् दू॒रे सन्नि॒हाभ॑वः ॥२॥
अति॑ तृ॒ष्टं व॑वक्षि॒थाथै॒व सु॒मना॑ असि ।
प्रप्रा॒न्ये यन्ति॒ पर्य॒न्य आ॑सते॒ येषां॑ स॒ख्ये असि॑ श्रि॒तः ॥३॥
ई॒यि॒वांस॒मति॒ स्रिध॒: शश्व॑ती॒रति॑ स॒श्चत॑: ।
अन्वी॑मविन्दन् निचि॒रासो॑ अ॒द्रुहो॒ऽप्सु सिं॒हमि॑व श्रि॒तम् ॥४॥
स॒सृ॒वांस॑मिव॒ त्मना॒ ऽग्निमि॒त्था ति॒रोहि॑तम् ।
ऐनं॑ नयन्मात॒रिश्वा॑ परा॒वतो॑ दे॒वेभ्यो॑ मथि॒तं परि॑ ॥५॥
तं त्वा॒ मर्ता॑ अगृभ्णत दे॒वेभ्यो॑ हव्यवाहन ।
विश्वा॒न् यद् य॒ज्ञाँ अ॑भि॒पासि॑ मानुष॒ तव॒ क्रत्वा॑ यविष्ठ्य ॥६॥
तद् भ॒द्रं तव॑ दं॒सना॒ पाका॑य चिच्छदयति ।
त्वां यद॑ग्ने प॒शव॑: स॒मास॑ते॒ समि॑द्धमपिशर्व॒रे ॥७॥
आ जु॑होता स्वध्व॒रं शी॒रं पा॑व॒कशो॑चिषम् ।
आ॒शुं दू॒तम॑जि॒रं प्र॒त्नमीड्यं॑ श्रु॒ष्टी दे॒वं स॑पर्यत ॥८॥
त्रीणि॑ श॒ता त्री स॒हस्रा॑ण्य॒ग्निं त्रिं॒शच्च॑ दे॒वा नव॑ चासपर्यन् ।
औक्ष॑न् घृ॒तैरस्तृ॑णन् ब॒र्हिर॑स्मा॒ आदिद्धोता॑रं॒ न्य॑सादयन्त ॥९॥
९ gāthino viśvāmitraḥ | agniḥ | bṛhatī, ९ triṣṭup | sakhā॑yastvā vavṛmahe de॒vaṃ martā॑sa ū॒taye॑ | a॒pāṃ napā॑taṃ su॒bhagaṃ॑ su॒dīdi॑tiṃ su॒pratū॑rtimane॒hasa॑m || १ || kāya॑māno va॒nā tvaṃ yanmā॒tṝraja॑ganna॒paḥ | na tat te॑ agne pra॒mṛṣe॑ ni॒varta॑naṃ॒ yad dū॒re sanni॒hābha॑vaḥ || २ || ati॑ tṛ॒ṣṭaṃ va॑vakṣi॒thāthai॒va su॒manā॑ asi | praprā॒nye yanti॒ parya॒nya ā॑sate॒ yeṣāṃ॑ sa॒khye asi॑ śri॒taḥ || ३ || ī॒yi॒vāṃsa॒mati॒ sridha॒: śaśva॑tī॒rati॑ sa॒ścata॑: | anvī॑mavindan nici॒rāso॑ a॒druho॒’psu siṃ॒hami॑va śri॒tam || ४ || sa॒sṛ॒vāṃsa॑miva॒ tmanā॒ ’gnimi॒tthā ti॒rohi॑tam | ainaṃ॑ nayanmāta॒riśvā॑ parā॒vato॑ de॒vebhyo॑ mathi॒taṃ pari॑ || ५ || taṃ tvā॒ martā॑ agṛbhṇata de॒vebhyo॑ havyavāhana | viśvā॒n yad ya॒jñām̐ a॑bhi॒pāsi॑ mānuṣa॒ tava॒ kratvā॑ yaviṣṭhya || ६ || tad bha॒draṃ tava॑ daṃ॒sanā॒ pākā॑ya cicchadayati | tvāṃ yada॑gne pa॒śava॑: sa॒māsa॑te॒ sami॑ddhamapiśarva॒re || ७ || ā ju॑hotā svadhva॒raṃ śī॒raṃ pā॑va॒kaśo॑ciṣam | ā॒śuṃ dū॒tama॑ji॒raṃ pra॒tnamīḍyaṃ॑ śru॒ṣṭī de॒vaṃ sa॑paryata || ८ || trīṇi॑ śa॒tā trī sa॒hasrā॑ṇya॒gniṃ triṃ॒śacca॑ de॒vā nava॑ cāsaparyan | aukṣa॑n ghṛ॒tairastṛ॑ṇan ba॒rhira॑smā॒ ādiddhotā॑raṃ॒ nya॑sādayanta || ९ ||