११ गाथिनो विश्वामित्रः। यूपः, ६-१० यूपाः, ८ विश्वे देवा वा, ११ व्रश्चनः । त्रिष्टुप्, ३, ७ अनुष्टुप्।
अ॒ञ्जन्ति॒ त्वाम॑ध्व॒रे दे॑व॒यन्तो॒ वन॑स्पते॒ मधु॑ना॒ दैव्ये॑न ।
यदू॒र्ध्वस्तिष्ठा॒ द्रवि॑णे॒ह ध॑त्ता॒द् यद् वा॒ क्षयो॑ मा॒तुर॒स्या उ॒पस्थे॑ ॥१॥
समि॑द्धस्य॒ श्रय॑माणः पु॒रस्ता॒द् ब्रह्म॑ वन्वा॒नो अ॒जरं॑ सु॒वीर॑म् ।
आ॒रे अ॒स्मदम॑तिं॒ बाध॑मान॒ उच्छ्र॑यस्व मह॒ते सौभ॑गाय ॥२॥
उच्छ्र॑यस्व वनस्पते॒ वर्ष्म॑न्पृ पृथि॒व्या अधि॑ ।
सुमि॑ती मी॒यमा॑नो॒ वर्चो॑ धा य॒ज्ञवा॑हसे ॥३॥
युवा॑ सु॒वासा॒: परि॑वीत॒ आगा॒त् स उ॒ श्रेया॑न् भवति॒ जाय॑मानः ।
तं धीरा॑सः क॒वय॒ उन्न॑यन्ति स्वा॒ध्यो॒३ मन॑सा देव॒यन्त॑: ॥४॥
जा॒तो जा॑यते सुदिन॒त्वे अह्नां॑ सम॒र्य आ वि॒दथे॒ वर्ध॑मानः ।
पु॒नन्ति॒ धीरा॑ अ॒पसो॑ मनी॒षा दे॑व॒या विप्र॒ उदि॑यर्ति॒ वाच॑म् ॥५॥
यान् वो॒ नरो॑ देव॒यन्तो॑ निमि॒म्युर्वन॑स्पते॒ स्वधि॑तिर्वा त॒तक्ष॑ ।
ते दे॒वास॒: स्वर॑वस्तस्थि॒वांस॑: प्र॒जाव॑द॒स्मे दि॑धिषन्तु॒ रत्न॑म् ॥६॥
ये वृ॒क्णासो॒ अधि॒ क्षमि॒ निमि॑तासो य॒तस्रु॑चः ।
ते नो॑ व्यन्तु॒ वार्यं॑ देव॒त्रा क्षे॑त्र॒साध॑सः ॥७॥
आ॒दि॒त्या रु॒द्रा वस॑वः सुनी॒था द्यावा॒क्षामा॑ पृथि॒वी अ॒न्तरि॑क्षम् ।
स॒जोष॑सो य॒ज्ञम॑वन्तु दे॒वा ऊ॒र्ध्वं कृ॑ण्वन्त्वध्व॒रस्य॑ के॒तुम् ॥८॥
हं॒सा इ॑व श्रेणि॒शो यता॑नाः शु॒क्रा वसा॑ना॒: स्वर॑वो न॒ आगु॑: ।
उ॒न्नी॒यमा॑नाः क॒विभि॑: पु॒रस्ता॑द् दे॒वा दे॒वाना॒मपि॑ यन्ति॒ पाथ॑: ॥९॥
शृङ्गा॑णी॒वेच्छृ॒ङ्गिणां॒ सं द॑दृश्रे च॒षाल॑वन्त॒: स्वर॑वः पृथि॒व्याम् ।
वा॒घद्भि॑र्वा विह॒वे श्रोष॑माणा अ॒स्माँ अ॑वन्तु पृत॒नाज्ये॑षु ॥१०॥॥
वन॑स्पते श॒तव॑ल्शो॒ वि रो॑ह स॒हस्र॑वल्शा॒ वि व॒यं रु॑हेम ।
यं त्वाम॒यं स्वधि॑ति॒स्तेज॑मानः प्रणि॒नाय॑ मह॒ते सौभ॑गाय ॥११॥॥
११ gāthino viśvāmitraḥ | yūpaḥ, ६-१० yūpāḥ, ८ viśve devā vā, ११ vraścanaḥ | triṣṭup, ३, ७ anuṣṭup | a॒ñjanti॒ tvāma॑dhva॒re de॑va॒yanto॒ vana॑spate॒ madhu॑nā॒ daivye॑na | yadū॒rdhvastiṣṭhā॒ dravi॑ṇe॒ha dha॑ttā॒d yad vā॒ kṣayo॑ mā॒tura॒syā u॒pasthe॑ || १ || sami॑ddhasya॒ śraya॑māṇaḥ pu॒rastā॒d brahma॑ vanvā॒no a॒jaraṃ॑ su॒vīra॑m | ā॒re a॒smadama॑tiṃ॒ bādha॑māna॒ ucchra॑yasva maha॒te saubha॑gāya || २ || ucchra॑yasva vanaspate॒ varṣma॑npṛ pṛthi॒vyā adhi॑ | sumi॑tī mī॒yamā॑no॒ varco॑ dhā ya॒jñavā॑hase || ३ || yuvā॑ su॒vāsā॒: pari॑vīta॒ āgā॒t sa u॒ śreyā॑n bhavati॒ jāya॑mānaḥ | taṃ dhīrā॑saḥ ka॒vaya॒ unna॑yanti svā॒dhyo॒३ mana॑sā deva॒yanta॑: || ४ || jā॒to jā॑yate sudina॒tve ahnāṃ॑ sama॒rya ā vi॒dathe॒ vardha॑mānaḥ | pu॒nanti॒ dhīrā॑ a॒paso॑ manī॒ṣā de॑va॒yā vipra॒ udi॑yarti॒ vāca॑m || ५ || yān vo॒ naro॑ deva॒yanto॑ nimi॒myurvana॑spate॒ svadhi॑tirvā ta॒takṣa॑ | te de॒vāsa॒: svara॑vastasthi॒vāṃsa॑: pra॒jāva॑da॒sme di॑dhiṣantu॒ ratna॑m || ६ || ye vṛ॒kṇāso॒ adhi॒ kṣami॒ nimi॑tāso ya॒tasru॑caḥ | te no॑ vyantu॒ vāryaṃ॑ deva॒trā kṣe॑tra॒sādha॑saḥ || ७ || ā॒di॒tyā ru॒drā vasa॑vaḥ sunī॒thā dyāvā॒kṣāmā॑ pṛthi॒vī a॒ntari॑kṣam | sa॒joṣa॑so ya॒jñama॑vantu de॒vā ū॒rdhvaṃ kṛ॑ṇvantvadhva॒rasya॑ ke॒tum || ८ || haṃ॒sā i॑va śreṇi॒śo yatā॑nāḥ śu॒krā vasā॑nā॒: svara॑vo na॒ āgu॑: | u॒nnī॒yamā॑nāḥ ka॒vibhi॑: pu॒rastā॑d de॒vā de॒vānā॒mapi॑ yanti॒ pātha॑: || ९ || śṛṅgā॑ṇī॒vecchṛ॒ṅgiṇāṃ॒ saṃ da॑dṛśre ca॒ṣāla॑vanta॒: svara॑vaḥ pṛthi॒vyām | vā॒ghadbhi॑rvā viha॒ve śroṣa॑māṇā a॒smām̐ a॑vantu pṛta॒nājye॑ṣu || १० || || vana॑spate śa॒tava॑lśo॒ vi ro॑ha sa॒hasra॑valśā॒ vi va॒yaṃ ru॑hema | yaṃ tvāma॒yaṃ svadhi॑ti॒steja॑mānaḥ praṇi॒nāya॑ maha॒te saubha॑gāya || ११ || ||