७ गाथिनो विश्वामित्रः। उषा। त्रिष्टुप्।
उषो॒ वाजे॑न वाजिनि॒ प्रचे॑ता॒: स्तोमं॑ जुषस्व गृण॒तो म॑घोनि ।
पु॒रा॒णी दे॑वि युव॒तिः पुरं॑धि॒रनु॑ व्र॒तं च॑रसि विश्ववारे ॥१॥
उषो॑ दे॒व्यम॑र्त्या॒ वि भा॑हि च॒न्द्रर॑था सू॒नृता॑ ई॒रय॑न्ती ।
आ त्वा॑ वहन्तु सु॒यमा॑सो॒ अश्वा॒ हिर॑ण्यवर्णां पृथु॒पाज॑सो॒ ये ॥२॥
उष॑: प्रती॒ची भुव॑नानि॒ विश्वो॒र्ध्वा ति॑ष्ठस्य॒मृत॑स्य के॒तुः ।
स॒मा॒नमर्थं॑ चरणी॒यमा॑ना च॒क्रमि॑व नव्य॒स्या व॑वृत्स्व ॥३॥
अव॒ स्यूमे॑व चिन्व॒ती म॒घोन्यु॒षा या॑ति॒ स्वस॑रस्य॒ पत्नी॑ ।
स्व१र्जन॑न्ती सु॒भगा॑ सु॒दंसा॒ आन्ता॑द् दि॒वः प॑प्रथ॒ आ पृ॑थि॒व्याः ॥४॥
अच्छा॑ वो दे॒वीमु॒षसं॑ विभा॒तीं प्र वो॑ भरध्वं॒ नम॑सा सुवृ॒क्तिम् ।
ऊ॒र्ध्वं म॑धु॒धा दि॒वि पाजो॑ अश्रे॒त् प्र रो॑च॒ना रु॑रुचे र॒ण्वसं॑दृक् ॥५॥
ऋ॒ताव॑री दि॒वो अ॒र्कैर॑बो॒ध्या रे॒वती॒ रोद॑सी चि॒त्रम॑स्थात् ।
आ॒य॒तीम॑ग्न उ॒षसं॑ विभा॒तीं वा॒ममे॑षि॒ द्रवि॑णं॒ भिक्ष॑माणः ॥६॥
ऋ॒तस्य॑ बु॒ध्न उ॒षसा॑मिष॒ण्यन् वृषा॑ म॒ही रोद॑सी॒ आ वि॑वेश ।
म॒ही मि॒त्रस्य॒ वरु॑णस्य मा॒या च॒न्द्रेव॑ भा॒नुं वि द॑धे पुरु॒त्रा ॥७॥
७ gāthino viśvāmitraḥ | uṣā | triṣṭup | uṣo॒ vāje॑na vājini॒ prace॑tā॒: stomaṃ॑ juṣasva gṛṇa॒to ma॑ghoni | pu॒rā॒ṇī de॑vi yuva॒tiḥ puraṃ॑dhi॒ranu॑ vra॒taṃ ca॑rasi viśvavāre || १ || uṣo॑ de॒vyama॑rtyā॒ vi bhā॑hi ca॒ndrara॑thā sū॒nṛtā॑ ī॒raya॑ntī | ā tvā॑ vahantu su॒yamā॑so॒ aśvā॒ hira॑ṇyavarṇāṃ pṛthu॒pāja॑so॒ ye || २ || uṣa॑: pratī॒cī bhuva॑nāni॒ viśvo॒rdhvā ti॑ṣṭhasya॒mṛta॑sya ke॒tuḥ | sa॒mā॒namarthaṃ॑ caraṇī॒yamā॑nā ca॒krami॑va navya॒syā va॑vṛtsva || ३ || ava॒ syūme॑va cinva॒tī ma॒ghonyu॒ṣā yā॑ti॒ svasa॑rasya॒ patnī॑ | sva१rjana॑ntī su॒bhagā॑ su॒daṃsā॒ āntā॑d di॒vaḥ pa॑pratha॒ ā pṛ॑thi॒vyāḥ || ४ || acchā॑ vo de॒vīmu॒ṣasaṃ॑ vibhā॒tīṃ pra vo॑ bharadhvaṃ॒ nama॑sā suvṛ॒ktim | ū॒rdhvaṃ ma॑dhu॒dhā di॒vi pājo॑ aśre॒t pra ro॑ca॒nā ru॑ruce ra॒ṇvasaṃ॑dṛk || ५ || ṛ॒tāva॑rī di॒vo a॒rkaira॑bo॒dhyā re॒vatī॒ roda॑sī ci॒trama॑sthāt | ā॒ya॒tīma॑gna u॒ṣasaṃ॑ vibhā॒tīṃ vā॒mame॑ṣi॒ dravi॑ṇaṃ॒ bhikṣa॑māṇaḥ || ६ || ṛ॒tasya॑ bu॒dhna u॒ṣasā॑miṣa॒ṇyan vṛṣā॑ ma॒hī roda॑sī॒ ā vi॑veśa | ma॒hī mi॒trasya॒ varu॑ṇasya mā॒yā ca॒ndreva॑ bhā॒nuṃ vi da॑dhe puru॒trā || ७ ||