७ गाथिनो विश्वामित्रः। ऋभवः, ५-७ इन्द्र ऋभवश्च । जगती।
इ॒हेह॑ वो॒ मन॑सा ब॒न्धुता॑ नर उ॒शिजो॑ जग्मुर॒भि तानि॒ वेद॑सा ।
याभि॑र्मा॒याभि॒: प्रति॑जूतिवर्पस॒: सौध॑न्वना य॒ज्ञियं॑ भा॒गमा॑न॒श ॥१॥
याभि॒: शची॑भिश्चम॒साँ अपिं॑शत॒ यया॑ धि॒या गामरि॑णीत॒ चर्म॑णः ।
येन॒ हरी॒ मन॑सा नि॒रत॑क्षत॒ तेन॑ देव॒त्वमृ॑भव॒: समा॑नश ॥२॥
इन्द्र॑स्य स॒ख्यमृ॒भव॒: समा॑नशु॒र्मनो॒र्नपा॑तो अ॒पसो॑ दधन्विरे ।
सौ॒ध॒न्व॒नासो॑ अमृत॒त्वमेरि॑रे वि॒ष्ट्वी शमी॑भिः सु॒कृत॑: सुकृ॒त्यया॑ ॥३॥
इन्द्रे॑ण याथ स॒रथं॑ सु॒ते सचाँ॒ अथो॒ वशा॑नां भवथा स॒ह श्रि॒या ।
न व॑: प्रति॒मै सु॑कृ॒तानि॑ वाघत॒: सौध॑न्वना ऋभवो वी॒र्या॑णि च ॥४॥
इन्द्र॑ ऋ॒भुभि॒र्वाज॑वद्भि॒: समु॑क्षितं सु॒तं सोम॒मा वृ॑षस्वा॒ गभ॑स्त्योः ।
धि॒येषि॒तो म॑घवन् दा॒शुषो॑ गृ॒हे सौ॑धन्व॒नेभि॑: स॒ह म॑त्स्वा॒ नृभि॑: ॥५॥
इन्द्र॑ ऋभु॒मान् वाज॑वान् मत्स्वे॒ह नो॒ऽस्मिन् त्सव॑ने॒ शच्या॑ पुरुष्टुत ।
इ॒मानि॒ तुभ्यं॒ स्वस॑राणि येमिरे व्र॒ता दे॒वानां॒ मनु॑षश्च॒ धर्म॑भिः ॥६॥
इन्द्र॑ ऋ॒भुभि॑र्वा॒जिभि॑र्वा॒जय॑न्नि॒ह स्तोमं॑ जरि॒तुरुप॑ याहि य॒ज्ञिय॑म् ।
श॒तं केते॑भिरिषि॒रेभि॑रा॒यवे॑ स॒हस्र॑णीथो अध्व॒रस्य॒ होम॑नि ॥७॥
७ gāthino viśvāmitraḥ | ṛbhavaḥ, ५-७ indra ṛbhavaśca | jagatī | i॒heha॑ vo॒ mana॑sā ba॒ndhutā॑ nara u॒śijo॑ jagmura॒bhi tāni॒ veda॑sā | yābhi॑rmā॒yābhi॒: prati॑jūtivarpasa॒: saudha॑nvanā ya॒jñiyaṃ॑ bhā॒gamā॑na॒śa || १ || yābhi॒: śacī॑bhiścama॒sām̐ apiṃ॑śata॒ yayā॑ dhi॒yā gāmari॑ṇīta॒ carma॑ṇaḥ | yena॒ harī॒ mana॑sā ni॒rata॑kṣata॒ tena॑ deva॒tvamṛ॑bhava॒: samā॑naśa || २ || indra॑sya sa॒khyamṛ॒bhava॒: samā॑naśu॒rmano॒rnapā॑to a॒paso॑ dadhanvire | sau॒dha॒nva॒nāso॑ amṛta॒tvameri॑re vi॒ṣṭvī śamī॑bhiḥ su॒kṛta॑: sukṛ॒tyayā॑ || ३ || indre॑ṇa yātha sa॒rathaṃ॑ su॒te sacām॒̐ atho॒ vaśā॑nāṃ bhavathā sa॒ha śri॒yā | na va॑: prati॒mai su॑kṛ॒tāni॑ vāghata॒: saudha॑nvanā ṛbhavo vī॒ryā॑ṇi ca || ४ || indra॑ ṛ॒bhubhi॒rvāja॑vadbhi॒: samu॑kṣitaṃ su॒taṃ soma॒mā vṛ॑ṣasvā॒ gabha॑styoḥ | dhi॒yeṣi॒to ma॑ghavan dā॒śuṣo॑ gṛ॒he sau॑dhanva॒nebhi॑: sa॒ha ma॑tsvā॒ nṛbhi॑: || ५ || indra॑ ṛbhu॒mān vāja॑vān matsve॒ha no॒’smin tsava॑ne॒ śacyā॑ puruṣṭuta | i॒māni॒ tubhyaṃ॒ svasa॑rāṇi yemire vra॒tā de॒vānāṃ॒ manu॑ṣaśca॒ dharma॑bhiḥ || ६ || indra॑ ṛ॒bhubhi॑rvā॒jibhi॑rvā॒jaya॑nni॒ha stomaṃ॑ jari॒turupa॑ yāhi ya॒jñiya॑m | śa॒taṃ kete॑bhiriṣi॒rebhi॑rā॒yave॑ sa॒hasra॑ṇītho adhva॒rasya॒ homa॑ni || ७ ||