९ गाथिनो विश्वामित्रः। अश्विनौ। त्रिष्टुप्।
धे॒नुः प्र॒त्नस्य॒ काम्यं॒ दुहा॑ना॒ ऽन्तः पु॒त्रश्च॑रति॒ दक्षि॑णायाः ।
आ द्यो॑त॒निं व॑हति शु॒भ्रया॑मो॒षस॒: स्तोमो॑ अ॒श्विना॑वजीगः ॥१॥
सु॒युग् व॑हन्ति॒ प्रति॑ वामृ॒तेनो॒र्ध्वा भ॑वन्ति पि॒तरे॑व॒ मेधा॑: ।
जरे॑थाम॒स्मद् वि प॒णेर्म॑नी॒षां यु॒वोरव॑श्चकृ॒मा या॑तम॒र्वाक् ॥२॥
सु॒युग्भि॒रश्वै॑: सु॒वृता॒ रथे॑न॒ दस्रा॑वि॒मं शृ॑णुतं॒ श्लोक॒मद्रे॑: ।
किम॒ङ्ग वां॒ प्रत्यव॑र्तिं॒ गमि॑ष्ठा॒ ऽऽहुर्विप्रा॑सो अश्विना पुरा॒जाः ॥३॥
आ म॑न्येथा॒मा ग॑तं॒ कच्चि॒देवै॒र्विश्वे॒ जना॑सो अ॒श्विना॑ हवन्ते ।
इ॒मा हि वां॒ गोऋ॑जीका॒ मधू॑नि॒ प्र मि॒त्रासो॒ न द॒दुरु॒स्रो अग्रे॑ ॥४॥
ति॒रः पु॒रू चि॑दश्विना॒ रजां॑स्याङ्गू॒षो वां॑ मघवाना॒ जने॑षु ।
एह या॑तं प॒थिभि॑र्देव॒यानै॒र्दस्रा॑वि॒मे वां॑ नि॒धयो॒ मधू॑नाम् ॥५॥
पु॒रा॒णमोक॑: स॒ख्यं शि॒वं वां॑ यु॒वोर्न॑रा॒ द्रवि॑णं ज॒ह्नाव्या॑म् ।
पुन॑: कृण्वा॒नाः स॒ख्या शि॒वानि॒ मध्वा॑ मदेम स॒ह नू स॑मा॒नाः ॥६॥
अश्वि॑ना वा॒युना॑ यु॒वं सु॑दक्षा नि॒युद्भि॑श्च स॒जोष॑सा युवाना ।
नास॑त्या ति॒रोअ॑ह्न्यं जुषा॒णा सोमं॑ पिबतम॒स्रिधा॑ सुदानू ॥७॥
अश्वि॑ना॒ परि॑ वा॒मिष॑: पुरू॒चीरी॒युर्गी॒र्भिर्यत॑माना॒ अमृ॑ध्राः ।
रथो॑ ह वामृत॒जा अद्रि॑जूत॒: परि॒ द्यावा॑पृथि॒वी या॑ति स॒द्यः ॥८॥
अश्वि॑ना मधु॒षुत्त॑मो यु॒वाकु॒: सोम॒स्तं पा॑त॒मा ग॑तं दुरो॒णे ।
रथो॑ ह वां॒ भूरि॒ वर्प॒: करि॑क्रत् सु॒ताव॑तो निष्कृ॒तमाग॑मिष्ठः ॥९॥
९ gāthino viśvāmitraḥ | aśvinau | triṣṭup | dhe॒nuḥ pra॒tnasya॒ kāmyaṃ॒ duhā॑nā॒ ’ntaḥ pu॒traśca॑rati॒ dakṣi॑ṇāyāḥ | ā dyo॑ta॒niṃ va॑hati śu॒bhrayā॑mo॒ṣasa॒: stomo॑ a॒śvinā॑vajīgaḥ || १ || su॒yug va॑hanti॒ prati॑ vāmṛ॒teno॒rdhvā bha॑vanti pi॒tare॑va॒ medhā॑: | jare॑thāma॒smad vi pa॒ṇerma॑nī॒ṣāṃ yu॒vorava॑ścakṛ॒mā yā॑tama॒rvāk || २ || su॒yugbhi॒raśvai॑: su॒vṛtā॒ rathe॑na॒ dasrā॑vi॒maṃ śṛ॑ṇutaṃ॒ śloka॒madre॑: | kima॒ṅga vāṃ॒ pratyava॑rtiṃ॒ gami॑ṣṭhā॒ ’’hurviprā॑so aśvinā purā॒jāḥ || ३ || ā ma॑nyethā॒mā ga॑taṃ॒ kacci॒devai॒rviśve॒ janā॑so a॒śvinā॑ havante | i॒mā hi vāṃ॒ goṛ॑jīkā॒ madhū॑ni॒ pra mi॒trāso॒ na da॒duru॒sro agre॑ || ४ || ti॒raḥ pu॒rū ci॑daśvinā॒ rajāṃ॑syāṅgū॒ṣo vāṃ॑ maghavānā॒ jane॑ṣu | eha yā॑taṃ pa॒thibhi॑rdeva॒yānai॒rdasrā॑vi॒me vāṃ॑ ni॒dhayo॒ madhū॑nām || ५ || pu॒rā॒ṇamoka॑: sa॒khyaṃ śi॒vaṃ vāṃ॑ yu॒vorna॑rā॒ dravi॑ṇaṃ ja॒hnāvyā॑m | puna॑: kṛṇvā॒nāḥ sa॒khyā śi॒vāni॒ madhvā॑ madema sa॒ha nū sa॑mā॒nāḥ || ६ || aśvi॑nā vā॒yunā॑ yu॒vaṃ su॑dakṣā ni॒yudbhi॑śca sa॒joṣa॑sā yuvānā | nāsa॑tyā ti॒roa॑hnyaṃ juṣā॒ṇā somaṃ॑ pibatama॒sridhā॑ sudānū || ७ || aśvi॑nā॒ pari॑ vā॒miṣa॑: purū॒cīrī॒yurgī॒rbhiryata॑mānā॒ amṛ॑dhrāḥ | ratho॑ ha vāmṛta॒jā adri॑jūta॒: pari॒ dyāvā॑pṛthi॒vī yā॑ti sa॒dyaḥ || ८ || aśvi॑nā madhu॒ṣutta॑mo yu॒vāku॒: soma॒staṃ pā॑ta॒mā ga॑taṃ duro॒ṇe | ratho॑ ha vāṃ॒ bhūri॒ varpa॒: kari॑krat su॒tāva॑to niṣkṛ॒tamāga॑miṣṭhaḥ || ९ ||