६ गाथिनो विश्वामित्रः। विश्वे देवाः। त्रिष्टुप्।
प्र मे॑ विवि॒क्वाँ अ॑विदन्मनी॒षां धे॒नुं चर॑न्तीं॒ प्रयु॑ता॒मगो॑पाम् ।
स॒द्यश्चि॒द् या दु॑दु॒हे भूरि॑ धा॒सेरिन्द्र॒स्तद॒ग्निः प॑नि॒तारो॑ अस्याः ॥१॥
इन्द्र॒: सु पू॒षा वृष॑णा सु॒हस्ता॑ दि॒वो न प्री॒ताः श॑श॒यं दु॑दुह्रे ।
विश्वे॒ यद॑स्यां र॒णय॑न्त दे॒वाः प्र वोऽत्र॑ वसवः सु॒म्नम॑श्याम् ॥२॥
या जा॒मयो॒ वृष्ण॑ इ॒च्छन्ति॑ श॒क्तिं न॑म॒स्यन्ती॑र्जानते॒ गर्भ॑मस्मिन् ।
अच्छा॑ पु॒त्रं धे॒नवो॑ वावशा॒ना म॒हश्च॑रन्ति॒ बिभ्र॑तं॒ वपूं॑षि ॥३॥
अच्छा॑ विवक्मि॒ रोद॑सी सु॒मेके॒ ग्राव्णो॑ युजा॒नो अ॑ध्व॒रे म॑नी॒षा ।
इ॒मा उ॑ ते॒ मन॑वे॒ भूरि॑वारा ऊ॒र्ध्वा भ॑वन्ति दर्श॒ता यज॑त्राः ॥४॥
या ते॑ जि॒ह्वा मधु॑मती सुमे॒धा अग्ने॑ दे॒वेषू॒च्यत॑ उरू॒ची ।
तये॒ह विश्वाँ॒ अव॑से॒ यज॑त्रा॒ना सा॑दय पा॒यया॑ चा॒ मधू॑नि ॥५॥
या ते॑ अग्ने॒ पर्व॑तस्येव॒ धारास॑श्चन्ती पी॒पय॑द् देव चि॒त्रा ।
ताम॒स्मभ्यं॒ प्रम॑तिं जातवेदो॒ वसो॒ रास्व॑ सुम॒तिं वि॒श्वज॑न्याम् ॥६॥
६ gāthino viśvāmitraḥ | viśve devāḥ | triṣṭup | pra me॑ vivi॒kvām̐ a॑vidanmanī॒ṣāṃ dhe॒nuṃ cara॑ntīṃ॒ prayu॑tā॒mago॑pām | sa॒dyaści॒d yā du॑du॒he bhūri॑ dhā॒serindra॒stada॒gniḥ pa॑ni॒tāro॑ asyāḥ || १ || indra॒: su pū॒ṣā vṛṣa॑ṇā su॒hastā॑ di॒vo na prī॒tāḥ śa॑śa॒yaṃ du॑duhre | viśve॒ yada॑syāṃ ra॒ṇaya॑nta de॒vāḥ pra vo’tra॑ vasavaḥ su॒mnama॑śyām || २ || yā jā॒mayo॒ vṛṣṇa॑ i॒cchanti॑ śa॒ktiṃ na॑ma॒syantī॑rjānate॒ garbha॑masmin | acchā॑ pu॒traṃ dhe॒navo॑ vāvaśā॒nā ma॒haśca॑ranti॒ bibhra॑taṃ॒ vapūṃ॑ṣi || ३ || acchā॑ vivakmi॒ roda॑sī su॒meke॒ grāvṇo॑ yujā॒no a॑dhva॒re ma॑nī॒ṣā | i॒mā u॑ te॒ mana॑ve॒ bhūri॑vārā ū॒rdhvā bha॑vanti darśa॒tā yaja॑trāḥ || ४ || yā te॑ ji॒hvā madhu॑matī sume॒dhā agne॑ de॒veṣū॒cyata॑ urū॒cī | taye॒ha viśvām॒̐ ava॑se॒ yaja॑trā॒nā sā॑daya pā॒yayā॑ cā॒ madhū॑ni || ५ || yā te॑ agne॒ parva॑tasyeva॒ dhārāsa॑ścantī pī॒paya॑d deva ci॒trā | tāma॒smabhyaṃ॒ prama॑tiṃ jātavedo॒ vaso॒ rāsva॑ suma॒tiṃ vi॒śvaja॑nyām || ६ ||