८ प्रजापतिर्वैश्वामित्रः, प्रजापतिर्वाच्यो वा। विश्वे देवाः। त्रिष्टुप्।
न ता मि॑नन्ति मा॒यिनो॒ न धीरा॑ व्र॒ता दे॒वानां॑ प्रथ॒मा ध्रु॒वाणि॑ ।
न रोद॑सी अ॒द्रुहा॑ वे॒द्याभि॒र्न पर्व॑ता नि॒नमे॑ तस्थि॒वांस॑: ॥१॥
षड् भा॒राँ एको॒ अच॑रन् बिभर्त्यृ॒तं वर्षि॑ष्ठ॒मुप॒ गाव॒ आगु॑: ।
ति॒स्रो म॒हीरुप॑रास्तस्थु॒रत्या॒ गुहा॒ द्वे निहि॑ते॒ दर्श्येका॑ ॥२॥
त्रि॒पा॒ज॒स्यो वृ॑ष॒भो वि॒श्वरू॑प उ॒त त्र्यु॒धा पु॑रु॒ध प्र॒जावा॑न् ।
त्र्य॒नी॒कः प॑त्यते॒ माहि॑नावा॒न् त्स रे॑तो॒धा वृ॑ष॒भः शश्व॑तीनाम् ॥३॥
अ॒भीक॑ आसां पद॒वीर॑बोध्यादि॒त्याना॑मह्वे॒ चारु॒ नाम॑ ।
आप॑श्चिदस्मा अरमन्त दे॒वीः पृथ॒ग् व्रज॑न्ती॒: परि॑ षीमवृञ्जन् ॥४॥
त्री ष॒धस्था॑ सिन्धव॒स्त्रिः क॑वी॒नामु॒त त्रि॑मा॒ता वि॒दथे॑षु स॒म्राट् ।
ऋ॒ताव॑री॒र्योष॑णास्ति॒स्रो अप्या॒स्त्रिरा दि॒वो वि॒दथे॒ पत्य॑मानाः ॥५॥
त्रिरा दि॒वः स॑वित॒र्वार्या॑णि दि॒वेदि॑व॒ आ सु॑व॒ त्रिर्नो॒ अह्न॑: ।
त्रि॒धातु॑ रा॒य आ सु॑वा॒ वसू॑नि॒ भग॑ त्रातर्धिषणे सा॒तये॑ धाः ॥६॥
त्रिरा दि॒वः स॑वि॒ता सो॑षवीति॒ राजा॑ना मि॒त्रावरु॑णा सुपा॒णी ।
आप॑श्चिदस्य॒ रोद॑सी चिदु॒र्वी रत्नं॑ भिक्षन्त सवि॒तुः स॒वाय॑ ॥७॥
त्रिरु॑त्त॒मा दू॒णशा॑ रोच॒नानि॒ त्रयो॑ राज॒न्त्यसु॑रस्य वी॒राः ।
ऋ॒तावा॑न इषि॒रा दू॒ळभा॑स॒स्त्रिरा दि॒वो वि॒दथे॑ सन्तु दे॒वाः ॥८॥
८ prajāpatirvaiśvāmitraḥ, prajāpatirvācyo vā | viśve devāḥ | triṣṭup | na tā mi॑nanti mā॒yino॒ na dhīrā॑ vra॒tā de॒vānāṃ॑ pratha॒mā dhru॒vāṇi॑ | na roda॑sī a॒druhā॑ ve॒dyābhi॒rna parva॑tā ni॒name॑ tasthi॒vāṃsa॑: || १ || ṣaḍ bhā॒rām̐ eko॒ aca॑ran bibhartyṛ॒taṃ varṣi॑ṣṭha॒mupa॒ gāva॒ āgu॑: | ti॒sro ma॒hīrupa॑rāstasthu॒ratyā॒ guhā॒ dve nihi॑te॒ darśyekā॑ || २ || tri॒pā॒ja॒syo vṛ॑ṣa॒bho vi॒śvarū॑pa u॒ta tryu॒dhā pu॑ru॒dha pra॒jāvā॑n | trya॒nī॒kaḥ pa॑tyate॒ māhi॑nāvā॒n tsa re॑to॒dhā vṛ॑ṣa॒bhaḥ śaśva॑tīnām || ३ || a॒bhīka॑ āsāṃ pada॒vīra॑bodhyādi॒tyānā॑mahve॒ cāru॒ nāma॑ | āpa॑ścidasmā aramanta de॒vīḥ pṛtha॒g vraja॑ntī॒: pari॑ ṣīmavṛñjan || ४ || trī ṣa॒dhasthā॑ sindhava॒striḥ ka॑vī॒nāmu॒ta tri॑mā॒tā vi॒dathe॑ṣu sa॒mrāṭ | ṛ॒tāva॑rī॒ryoṣa॑ṇāsti॒sro apyā॒strirā di॒vo vi॒dathe॒ patya॑mānāḥ || ५ || trirā di॒vaḥ sa॑vita॒rvāryā॑ṇi di॒vedi॑va॒ ā su॑va॒ trirno॒ ahna॑: | tri॒dhātu॑ rā॒ya ā su॑vā॒ vasū॑ni॒ bhaga॑ trātardhiṣaṇe sā॒taye॑ dhāḥ || ६ || trirā di॒vaḥ sa॑vi॒tā so॑ṣavīti॒ rājā॑nā mi॒trāvaru॑ṇā supā॒ṇī | āpa॑ścidasya॒ roda॑sī cidu॒rvī ratnaṃ॑ bhikṣanta savi॒tuḥ sa॒vāya॑ || ७ || triru॑tta॒mā dū॒ṇaśā॑ roca॒nāni॒ trayo॑ rāja॒ntyasu॑rasya vī॒rāḥ | ṛ॒tāvā॑na iṣi॒rā dū॒ḷabhā॑sa॒strirā di॒vo vi॒dathe॑ santu de॒vāḥ || ८ ||